अर्थमन्त्री जनार्दन शर्माले पदबाट राजीनामा दिएसँगै केही समयको लागि अर्थमन्त्रालय नेतृत्वविहीन हुने भएको छ ।
आज गठन भएको संसदीय विशेष समितिको समय १० दिनको लागि तोकिएको छ । उक्त समितिले निकालेको निष्कर्षमा अर्थमन्त्री निर्दोष पाइए उनी नै पुन: अर्थमन्त्री हुनेछन् । निर्धारित समयभित्रै समितिले आफ्नो प्रतिवेदन दिएपनि कम्तिमा १० दिन अर्थमन्त्रालय मन्त्रीविहीन हुने भएको हो ।
नेकपा माओवादी केन्द्रका नेता एवम् सांसद वर्षमान पुनले जनार्दन शर्माले छानबिनका लागि पदबाट राजीनामा दिएको भन्दै उनी निर्दोष भएमा पुनः अर्थमन्त्री बन्ने बताए । बुधबार संसद् बैठकबाट बाहिरिने क्रममा सञ्चारकर्मीहरुसँगको कुराकानीमा नेता पुनले छानबिनपछि निर्दोष भएमा शर्मा पुन: दोहोरिने दाबी गरेका हुन्।
अर्थमन्त्री प्रकरणमा दलहरुबीचको सहमतिमा ११ सदस्यीय संसदीय छानबिन विशेष समिति गठन भइसकेको छ । प्रतिनिधि सभा बैठकबाट समिति गठन अनुमोदन भएको छ ।
समितिमा खगराज अधिकारी, देव गुरुङ्, पुष्पा भुषाल, प्रदीपकुमार ज्ञवाली, भानुभक्त ढकाल, बिमला बिक, लक्ष्मणलाल कर्ण, शक्तिबहादुर बस्नेत, सरला कुमारी यादव, सीताराम महतो र सुरेन्द्रप्रसाद यादव रहने छ्न् । समितिले १० दिनमा जिम्मेवारी पुरा गर्नुपर्ने छ ।
पुनले भने ‘यसअघि रामशरण मतहका विषयमा पनि कुरो उठेपछि उहाँले नैतिकताका आधारमा राजीनामा दिनुभयो र पछि निर्दोष भएपछि अर्थमन्त्री बन्नुभएको थियो,’ उनले भने, ‘उहाँले निर्दोष छु भन्नुभएको छ। छानबिनबाट उहाँ निर्दोष हुनुभयो भने उहाँ नै अर्थमन्त्री हो। पार्टीले तत्काल अर्को मानिस पठाउँदैन।’
शर्माले संसदीय छानबिन समितिको स्वागत गर्दै जतिवटा समिति बनाए पनि आफू तयार रहेको बताए । यस विषयमा एमालेले संसद बहिष्कार गर्नु पूर्वाग्रहको पराकाष्टा भएको शर्माको भनाई छ । उनले बजेट निर्माणमा कुनै गल्ती नगरेको दाबी पनि गरे ।
न्द्यीक्ष्ःभ्