नेकपा (एकीकृत समाजवादी) का सम्मानित नेता झलनाथ खनालले अर्थमन्त्री जनार्दन शर्मामाथि उठेका प्रश्नको जवाफ सम्बन्धित पार्टी र व्यक्तिले दिनुपर्ने बताएका छन् ।
बुधबार संसद भवनबाहिर सञ्चारकर्मीसँग कुरा गर्दै उनले विषय गम्भीर भएकोले लापरबाही गर्न नहुने बताए। “सबै कुरा पारदर्शी हुनुपर्छ भनेर संविधान लेख्ने, गल्ती, कमजोरी भएको छ भने यसको जिम्मेवारी लिनुपर्छ। घटनाक्रमको राम्रो छानबिन गरेर सत्य, तथ्य बाहिर आउनुपर्यो”, उनले भने।
अर्थमन्त्रीको राजनीनामा समेत स्वभाविक रहेको उनको भनाइ छ। “अत्यन्तै गम्भीर घटना हो। कति सत्य हो, यस्ता घटना घट्न थाले भने मुलुकमा मात्रै होइन, धेरै कुरामा प्रश्न उठ्छ। तर, गल्ती, कमजोरी हो भन्ने कुरा ढाँकछोप गर्नै सक्दैन”, खनालले थपे ।
बजेट भाषणको अघिल्लो रात अर्थमन्त्रालयमा असम्बन्धित व्यक्तिलाई प्रवेश गराएर करको दर हेरफेर गरेको आरोप खेप्दै आएका अर्थमन्त्री शर्माको प्रतिपक्ष दल एमाले राजीनामा माग्दै संसदीय छानविन समिति गठनगर्नुपर्ने कुरामा अडिक रहँदै आएको छ ।
तर अर्थमन्त्री शर्माले आफुले कुनै गल्ती नगरेको स्पष्टीकरण दिँदै आएका छन् । शर्माले आफुले जनपक्षीय बजेट ल्याएको दाबी गर्दै विरोधीले आफुलाई सिध्याउन षड्यन्त्र गरेको आरोप लगाएका थिए ।
