विराटनगर मुख्य कार्यालय रहेको कोसी अनलाइनले प्रधान सम्पादक र सम्पादकसहित आठ पत्रकारलाई पारिश्रमिक नदिएको पाइएको छ। लामो समयदेखि आफूले पाउनुपर्ने पारिश्रमिक नपाएपछि कोसी अनलाइनका सम्पादकसहित आठ पत्रकार आन्दोलित बनेका छन्।
कोसीले हालैमात्र राष्ट्रिय समाचार समिति (रासस) को प्रमुख बनेका धर्मेन्द्र झालाई समेत भुक्तानी गरेको छैन। पूर्वप्रधानसम्पादकसमेत रहेका झाले असार १ गतेको चेक पाएको थिए। तर चेकअनुसार बैंकमा जाँदा मौज्दात भएको छैन।
सम्पादक पदबाट हालै राजीनामा दिएका सुविद गुरागाईंका झासहितका पत्रकारहरूलाई महिनौंदेखि कोसीले तलब दिएको छैन।
कोसीका सञ्चालक प्रभात खड्काले गुरागाईंलाई असार ५ गते, माधव काफ्लेलाई असार ५ गते र गोविन्द कुँवरलाई असार १० गतेको चेक दिएका थिए। चेकअनुसार बैंकमा जाँदा मौज्दात नभएको पाइएपछि पत्रकारहरूले फेसबुकमै स्टाटस लेखेका छन्।
कानुनतः तीन पटक चेक बाउन्स भएपछि बैंकिङ कसुरमा निवेदन दिन पाइन्छ। तलब नपाएका पत्रकारहरूले चेक बाउन्सको तयारीमा लागेका छन्। ‘पत्रकार महासंघका पदाधिकारीहरूकहाँ गएर हामी गुनासो राख्दैछौं, त्यहाँबाट के कस्तो पहल हुन्छ त्यसपछि कानुनी प्रक्रियामा जान्छौं,’ गुरागाईंले भने।
तलबको समस्याबाट पीडित भएपछि कोसी अनलाइनबाट पत्रकारहरूले काम छोडेका थिए। काम छोडेको महिनौं बित्दा पनि पारिश्रमिक नपाएको उनीहरूको गुनासो छ।
बर्दियाका पत्रकार सनत सापकोटा, विराटनगरकी अंकिता ताम्राकार र बेलबारीकी बबिता लिम्बूले जागिर छोडेको महिनौं बित्दा पनि पारिश्रमिक पाएका छैनन्। त्यसअघि काम छोडेका पत्रकार जीवन खड्का अझै पनि श्रम कार्यालयमा धाइरहेका छन्। श्रम कार्यालयमा उनले उजुरी दिएपछि कार्यालयले कोसी अनलाइनलाई तलब भुक्तानी दिन निर्देशन दिएको थियो।
तर, अनलाइनका सञ्चालकले उनीविरूद्ध उच्च अदालत, विराटनगरमा उल्टै मुद्दा हालेका थिए। उच्चले पनि खड्काकै पक्षमा आदेश दियो। श्रम कार्यालय हुँदै कोसी अनलाइनमा त्यसको जानकारी पुगिसकेको छ।
‘यति दिन्छु उति दिन्छु भन्दै अहिले बार्गेनिङ चलिरहेको छ,’ खड्काले भने। उनले एक लाख ५० हजार रुपैयाँ भुक्तानी पाउन बाँकी रहेको बताइएको छ। आधाजति तलब भुक्तानी भए पनि बाँकी रकम भुक्तानी नभइसकेको उनीहरूले बताएका छन्।
‘पैसा खोई? भन्दा चेक बाउन्स गराउनु नि भनिन्छ। नियुक्ति–पत्र र सम्मानजनक बहिर्गमनको प्रश्न धेरै टाढाको कुरा भो। के यसरी नै चल्छ नेपालको मिडिया र पत्रकारिता?,’ गुरागाईंले फेसबुकमा आक्रोश पोखेका छन्।
उनकै स्टाटसमा खड्काले अतिरञ्जित रूपमा सामाजिक सन्जालमा जथाभावी लेखेका हरेक कुराहरूको जवाफ दिनु उचित नहोला भनी कमेन्ट गरेका छन्।
‘पछिलो समयमा समग्र आर्थिक र व्यावसायिक कठिनाई व्यवसाय गर्नेहरू हरेकले भोगिरहेका छौं। यो बीचमा म आफैं धेरै दिनबाट बिरामी भएकोले केही समय तलमाथि भाको हो,’ खड्काले भनेका छन्, ‘चेक लिनेदिने गर्दा पनि केही समय तलमाथि हुन्छ भन्ने मौखिक सहमति हाम्रो बीचमा भएको हो!’ उनले व्यवस्थापनले सबैको हरहिसाब भुक्तान गर्ने बताएका छन्।
दोस्रो पटक कोसीका बारे स्टाटस लेख्दै सम्पादक गुरगाईंले नियोजित रूपमा आफूहरूलाई पारिश्रमिक नदिन सञ्चालक खड्काले चेकमा नमिल्ने हस्ताक्षर गरेको बताएका छन्। उनका अनुसार सञ्चालक खड्काको हस्ताक्षर नमिलेको र बैंक खातामा पर्याप्त रकम नभएको पाइएको छ।
‘आज कोसी अनलाइनका सञ्चालक प्रभात खड्काले मलाई पारिश्रमिकबापत दिएको चेकको हस्ताक्षर पनि मिल्दैन भनेर बैंकले प्रमाणित गरिदियो,’ उनले लेखेका छन्।
कोसीले तलब नदिएपछि सम्पादक गुरागाईंले आफूसहित अरू सातै जनाको पारिश्रमिक दिलाउने गरी पहल थालिदिन पत्रकार महासंघ मोरङका अध्यक्ष सञ्जीव खनालसमक्ष आग्रह गरिएको बताएका छन्। पत्रकार महासंघबाट पनि पहल नभएमा महासंघकै कार्यालय परिसरमा धर्ना बस्ने गुरागाईंले चेतावनी दिए।
