नेकपा एकीकृत समाजवादीले बागमती प्रदेश सरकार तत्काल हेरफेर नगर्ने निर्णय गरेको छ। सोमबार काठमाडौँमा बसेको सचिवालय बैठकले सो निर्णय गरेको हो।
बागमतीमा कांग्रेस र माओवादीका सांसदहरुले मुख्यमन्त्री फेर्नको लागि हस्ताक्षर संकलन गरिसकेको अवस्थामा एकीकृत समाजवादीले भने यथास्थितिमा तत्काल हेरफेर नगर्ने निर्णय गरेको हो।
बागमती प्रदेश सरकार हेरफेर गर्नुपरेमा मधेस प्रदेश बाहेकका सबै प्रदेशमा नेपाली कांग्रेस, माओवादी केन्द्र र नेकपा एकीकृत समाजवादीको समन्वय र सहकार्यमा सन्तुलन मिलाएर सरकार गठन हुनुपर्ने एकीकृत समाजवादीको सचिवालय बैठकमा छलफल भएको महासचिव बेदुराम भुसालले जानकारी दिए।
सचिवालय बैठकमा स्थानीय निर्वाचनको समीक्षा र पाँच दलीय गठबन्धनमा भएका कमीकमजोरीमा थप प्रस्ट हुनुपर्ने कुरा पनि उठेको थियो। बैठकले पार्टीका तर्फबाट निर्वाचित जनप्रतिनिधिलाई प्रशिक्षण दिने निर्णय पनि गरेको छ। पार्टीबाट उम्मेदवार भई वैशाख ३० मा भएको स्थानीय चुनाव जितेका जनप्रतिनिधिलाई साउन ४ र ५ गते प्रशिक्षण दिने कार्यक्रम तय भएको छ।
प्रदेश १ र बागमतीमा नेकपा एकीकृतको नेतृत्वमा सरकार छ । सबैलाई भागबण्डा मिलाउनको लागि बागमती प्रदेशमा १८ मन्त्री छन् भने प्रदेश १ मा १४ जनाको मन्त्रिपरिषद् छ ।