सरकारी स्वामित्वको नेपाल आयल निगमले पेट्रोलियम पदार्थमा मूल्यवृद्धि गरेको छ ।
इण्डियन आयल कर्पोरेशन लिमिटेडबाट असार १७, मा प्राप्त नयाँ मूल्यसूची अनुसार विक्री मूल्य समायोजन गर्नुपर्ने देखिएको भन्दै निगमले पेट्रोल, डिजेल, मट्टितेल र हवाई इन्धन आन्तरिकमा मूल्यवृद्धि गरेको हो । खाना पकाउने ग्याँस सिलिण्डर र हवाई इन्धन (बाह्य) मा भने मूल्य यथावत राखिएको छ ।
आज मध्यरातबाट लागू हुने गरी निगमले पेट्रोलमा प्रति लिटर दुई रुपैयाँ, डिजेल/मट्टितेलमा प्रति लिटर नौ रुपैयाँ र हवाई इन्धन (आन्तरिकतर्फ) प्रति लिटर रु.पाँच ले वृद्धि गरेको जनाएको छ ।
नयाँ मूल्यसूची अनुसार अब पेट्रोलको मूल्य लिटरको १८१ रुपैयाँ पुगेको छ भने एक लिटर डिजेल र मट्टितेल किन्नको लागि १७२ रुपैयाँ खर्च गर्नुपर्छ । त्यस्तै हवाई इन्धन (आन्तरिक) को मूल्य मूल्य १९० कायम भएको छ । हवाई इन्धनको मूल्य बढेसँगै वायुसेवा सञ्चालक संघले मूल्यवृद्धि गर्न सक्नेछ ।
निगमले विदेशी मुद्रा खर्च गरी महंगो मूल्यमा आयात गर्नुपर्ने पेट्रोलियम पदार्थको प्रयोग सकेसम्म कम गरी विद्युत लगायतका स्वदेशी ऊर्जाको खपत बढाउन समेत आग्रह गरेको छ ।
