२०७४ सालमा भएको प्रतिनिधि सभा सदस्य निर्वाचनमा केही चर्चित अनुहारहरूले पराजय भोग्नुपर्यो तीमध्ये दुईजना अहिले राष्ट्रिय सभा सदस्य छन् । आज हामीले पराजय भोगेका २५ चर्चित अनुहारको बारेमा जानकारी दिन गइरहेका छौं । २०७४ सालको निर्वाचनमा सहभागी भएका भएका केही राजनीतिक दलहरू अर्को दलमा गाभिएका छन् भने केही एक दलबाट टुक्रिएर नयाँ दल बनेका छन् । त्यसैले उक्त समयमा भएका केही दलहरूको नाम अहिले छैन ।
२०७४ सालको प्रतिनिधि सभा र प्रदेश सभा निर्वाचन दुई चरणमा भएको थियो । पहिलो चरणमा २०७४ साल मंसिर १० गते र दोस्रो चरणमा मंसिर २१ गते सम्पन्न भएको थियो । नेकपा एमाले र माओवादी केन्द्र तालमेल गरेर निर्वाचनमा होमिएका थिए ।
हामीले तयार पारेको २५ चर्चित अनुहारहरूमा नेपाली कांग्रेसका धेरै अनुहारहरू देखिन्छन् । कांग्रेसका १६ जना, तत्कालिन राष्ट्रिय प्रजातन्त्र पार्टी (प्रजातान्त्रिक) का तीन जना, माओवादी केन्द्रका दुई जना, नेकपा एमाले, राप्रपा, विवेकशील साझा पार्टी र तत्कालिन संघीय समाजवादी फोरम नेपालका १/१ जना छन् ।
सुरु गरौं नेपाली कांग्रेसबाट, प्रतिनिधि सभा सदस्य निर्वाचनमा प्रत्यक्ष तर्फ पराजित हुनेमा विश्व प्रकाश शर्मा, शुनिल कुमार शर्मा, महेश आचार्य, डा. शेखर कोइराला, राम हरि खतिवडा, विमलेन्द्र निधि, डा.राम शरण महत, अर्जुन नरसिंह के.सी., प्रकाश शरण महत, नविन्द्र राज जोशी, मोहन बहादुर बस्नेत, महालक्ष्मी उपाध्याय(डिना), रामचन्द्र पौडेल, पूर्ण बहादुर खड्का, आरजु राणा देउवा र रमेश लेखक हुन् ।
त्यस्तै राप्रपा प्रजातान्त्रिकबाट सुनील बहादुर थापा, पशुपति शमशेर ज.ब.रा र विक्रम पाण्डे पराजित हुँदा माओवादी केन्द्रका नारायण काजी श्रेष्ठ र झक्कु प्रसाद सुवेदीले पनि अघिल्लो निर्वाचनमा पराजय भोग्नुपर्यो ।
त्यस्तैगरी एमालेका वामदेव गौतम, विवेकशील साझाका रवीन्द्र मिश्र, राप्रपाका कमल थापा र संघीय समाजवादी फोरमका अशोक कुमार राई प्रतिनिधि सभामा छिर्न सकेनन् । माथि उल्लेख गरिएकामध्ये अहिले संघीय समाजवादी फोरम अरू पार्टीहरूसँग गाभिएर नयाँ पार्टी बनेको छ भने राप्रपाको पनि एकता भएको छ तर कमल थापाले राप्रपा नेपाल नामक पार्टीको गठन गरेका छन् । बामदेव गौतमले पनि एमाले छाडेर नयाँ पार्टी गठन गर्ने प्रकिया सुरु गरेका छन् ।
झापाको क्षेत्र नम्बर १ मा पराजित भएका विश्व प्रकाश शर्मा १४ औं महाधिवेशनबाट नेपाली कांग्रेसको महामन्त्रीमा निर्वाचित भए । उनी २०७४ सालको संसदीय निर्वाचनमा नेकपा माओवादी केन्द्रका राम कार्की भनिने सुरेन्द्र कुमार कार्कीसँग दुई हजार ८६३ मतले पराजित भएका थिए । २०७० सालको दोस्रो संविधानसभाको निर्वाचनमा शर्मा एमालेका रविन कोइरालासँग पराजित भएका थिए । भर्खरै सम्पन्न भएको स्थानीय तहको निर्वाचनमा झापाको मेचीनगर नगरपालिकाको प्रमुख पदमा प्रदेश कमिटीले गरेको निर्णय लत्याउँदै शर्माले केन्द्रबाट अर्का उम्मेदवार आधिकारीक भएको भन्दै परिपत्र नै जारी गराएका थिए । प्रदेश कमिटीले उक्त नगरको प्रमुख पदमा केशवराज पाण्डेलाई टिकट दिएको थियो ।
निर्वाचनको अन्तिम परिणाम आउँदा प्रदेश सभाबाट राजीनामा दिएका एमालेका गोपालचन्द्र बुढाथोकी २६,४७८ मतका साथ प्रमुख पदमा निर्वाचित हुँदा केन्द्रबाट आधिकारिक उम्मेदवार तोकिएका कांग्रेसका इन्द्र बहादुर बुढाथोकीले २१,३११ मत पाए । सिटौला र शर्माको शक्ति सर्घषको असर झापामा बेलाबेला देखिँदै आएको छ । कतिपयले त शर्मालाई संघीय चुनावमा र संविधानसभा सदस्यमा पराजित गराउन सिटौलाको हात रहेको बताउने गरेका छन् ।
धनकुटाको क्षेत्र नम्बर १ मा तात्कालिन राप्रपा प्रजातान्त्रिकका सुनील बहादुर थापा पराजित भए । उक्त क्षेत्रबाट एमालेका राजेन्द्र कुमार राई ३७,३३३ मतका साथ निर्वाचित हुँदा थापाले २६,८७४ मत पाएका थिए । तिनै थापा २०७७ साल साउन दोस्रो साता नेपाली कांग्रेसमा प्रवेश गरे । सानेपास्थित कांग्रेसको पार्टी कार्यालयमा उनलाई सहमहामन्त्री पद दिएर पार्टी प्रवेश गराइएको थियो । १४ औं महाधिवेशनमा थापा केन्द्रीय सदस्यमा निर्वाचित भएका छन् । उनी पूर्वप्रधानमन्त्री सूर्यबहादुर थापाका छोरा हुन् । उनी दोस्रो संविधान सभाको चुनावमा धनकुटा क्षेत्र नम्बर २ बाट उम्मेदवार बनेका थिए । थापा चुनावमा विजयी भएर दुई पटक मन्त्रीसमेत भइसकेका छन् ।
नोबेल मेडिकल कलेज एण्ड शिक्षण अस्पतालका सञ्चालक समेत रहेका शुनिल कुमार शर्मा मोरङ क्षेत्र नम्बर ३ मा एमालेका भानुभक्त ढकालसँग पराजित भए । ढकाल केही समय स्वास्थ्यमन्त्री समेत बनेका थिए । शर्मा ढकालसँग एक हजार ९०७ मतान्तरले पराजित भएका हुन् ।
दुईपटक अर्थमन्त्री भएका महेश आचार्य २०७४ सालको संसदीय निर्वाचनमा माओवादी केन्द्रका अमन लाल मोदीसँग ६ हजार ७२८ मतले पराजित भए । तिनै आचार्य गत मंसिरमा भएको नेपाली कांग्रेसको १४ औं महाधिवेशनमा उपसभापति पदमा पराजित हुन पुगे । दुई पदको लागि सात जनाको चुनावी प्रतिस्पर्धामा आचार्य ५८९ मतका साथ छैटौँ स्थानमा रहे ।
डा. शेखर कोइराला एमालेका लाल बाबु पंण्डितसँग झिनो मतान्तरले पराजित हुन पुगे । मोरङको क्षेत्र नम्बर ६ मा पंण्डितले ३३,९४१ मतका साथ प्रतिनिधि सभाको सिट सुरक्षित गर्दा कोइराला ३३,२६६ मतमा रोकिन् पुगे । तिनै कोइराला १४ औँ महाधिवेशनमा सभापतिको आकांक्षी थिए पहिलो चरणमा कुनै पनि उम्मेदवारले ५० प्रतिशत मत कटाउन नसकेपछि दोस्रो चरणमा भएको निर्वाचनमा कोइराला अहिलेका प्रधानमन्त्री समेत रहेका शेर बहादुर देउवासँग ८७८ मतान्तरले पराजित हुन पुगे । देउवा २,७३३ मतका साथ निर्वाचित हुँदा कोइरालाले १,८५५ मत पाए ।
जनता समाजवादी पार्टीका वरिष्ठ नेता अशोक राई सुनसरीको क्षेत्र नम्बर १ मा एमालेका जय कुमार राईसँग २२ हजार ४०५ मतान्तरले पराजित हुन पुगे । तत्कालिन संघीय समाजवादी फोरममा आबद्ध राईलाई अघिल्लो संसदीय चुनावमा नेपाली कांग्रेसको समर्थन थियो । सुनसरी क्षेत्र नम्बर १ मा कांग्रेसले राईलाई सर्मथन गरेपछि समाजवादीले क्षेत्र नम्बर ४ मा ज्ञानेन्द्रबहादुर कार्कीलाई समर्थन गरेको थियो । अघिल्लो चुनावताका अर्थमन्त्री रहेका कार्की अहिले सञ्चारमन्त्री छन् । पहिलोपटक सुनसरीबाट चुनाव लडेका राई त्यसअगाडि खोटाङ र उदयपुरबाट चुनाव लड्दै आएका थिए ।
ओखलढुंगा क्षेत्र नम्बर १ मा कांग्रेसका राम हरि खतिवडा एमालेका यज्ञ राज सुनुवारसँग पराजित भए । निर्वाचित सुनुवारले ३२,५८० मत पाउँदा खतिवडाले २७,३२७ मत पाएका थिए । उनी पाँच हजार २५३ मतले पराजित भएका हुन् । कांग्रेसको १४ औं महाधिवेशनबाट खतिवडा केन्द्रीय सदस्यमा निर्वाचित भएका छन् ।
पराजित हुने चर्चित अनुहारमा पर्छन् कांग्रेस नेता विमलेन्द्र निधि । उनी धनुषा-३ मा तात्कालिन *राष्ट्रिय जनता पार्टी, नेपालका राजेन्द्र महतोसँग दुई हजार ९०३ मतले पराजित भएका थिए । महतो अहिले लोकतान्त्रिक समाजवादी पार्टीमा छन् भने निधि गत मंसिरमा सम्पन्न भएको नेपाली कांग्रेसको १४ औं महाधिवेशनमा सभापतिका उम्मेदवार बनेका थिए । २५० मत पाएका निधिले दोस्रो चरणमा भएको मतदानमा शेर बहादुर देउवालाई समर्थन गर्ने निर्णय गरेका थिए ।
पूर्वअर्थमन्त्री समेत रहेका डा. राम शरण महत अघिल्लो संसदीय चुनावमा नुवाकोट-१ मा पराजित भए । उनी माओवादी केन्द्रका हितबहादुर तामाङसँग आठ हजार ५५३ मतले पराजित भएका हुन् । सोही जिल्लाको क्षेत्र नम्बरमा २ मा अर्जुन नरसिंह के.सी. एमालेका नारायण प्रसाद खतिवडासँग १० हजार ५५७ मतले पराजित भएका थिए ।
काठमाडौं क्षेत्र नम्बर १ मा विवेकशील साझा पार्टीका रवीन्द्र मिश्र झिनो मतान्तरले कांग्रेसका प्रकाशमान सिंहसँग पराजित हुन पुगे । सिंह १० हजार ९३६ मतका साथ निर्वाचित हुँदा पूर्व सञ्चारकर्मी समेत रहेका मिश्रले १० हजार ११८ मत पाए । उनी ८१८ मतान्तरले पराजित हुन पुगेका हुन् ।
सिंहले नेपाली कांग्रेसको १४ औं महाधिवेशनमा सभापतिको लागि प्रतिस्पर्धा गर्दा ३७१ मत पाएका थिए । पहिलो चरणमा कुनै पनि उम्मेदवारले सदर मतको ५० प्रतिशत कटाउन नसकेकाको दोस्रो चरणको मतदानमा उनले देउवालाई समर्थन गर्ने निर्णय गरेका थिए । सिंह पत्नी सिर्जना सिंह २०७९ को स्थानीय तह निर्वाचनमा काठमाडौं महानगरको प्रमुख पदमा उम्मेदवारी दिएकी थिइन् । मेयर पदमा स्वतन्त्र उम्मेदवार वालेन्द्र साह ६१,७६७ मतका साथ निर्वाचित हुँदा सिंह ३८,३४१ मतका साथ दोस्रो स्थानमा रहिन् ।
अघिल्लो प्रतिनिधि सभा निर्वाचनमा पराजय भोगेका चर्चित २५ जनाको विस्तृत विवरण
काठमाडौं क्षेत्र नम्बर ५ मा कांग्रेसका प्रकाश शरण महत एमालेका इश्वर पोखरेलसँग नौ हजार ८६० मतले पराजित हुन पुगे । पोखरेल २३,०२९ मतका साथ निर्वाचित हुँदा महतले १३,१६९ मत पाएका थिए । अहिले पोखरेल एमालेका बरिष्ठ उपाध्यक्ष छन् भने १४ औं महाधिवेशनमा महामन्त्री पदमा पराजित भएका महत अहिले नेपाली कांग्रेसका प्रवक्ता छन् । महामन्त्रीमा गगन थापा ३,०२३ र विश्वप्रकाश शर्मा १,९८४ मतका साथ निर्वाचित हुँदा महतले १,५५६ मत पाएका थिए । सोही पदका उम्मेदवार डा. मीनेन्द्र रिजालले ८०९ मत पाएपछि रक्षामन्त्रीबाट राजीनामा दिएका थिए । २०७४ सालको स्थानीय चुनावमा काठमाडौं महानगरको प्रमुख पदमा पराजित रन्जु न्यौपाने आगामी चुनावमा सोही क्षेत्रबाट लड्ने घोषणा गरेकी छिन् ।
झक्कु प्रसाद सुवेदी नेपाली राजनीतिमा परिचित नाम हो । पहिलो संविधानसभा निर्वाचनमा उनले काठमाडौं २ मा एमालेका तत्कालिन महासचिव माधव नेपाललाई फराकिलो मतान्तरले पराजित गर्न सफल भएका थिए । रोल्पाका तिनै सुवेदी अघिल्लो चुनावमा काठमाडौं क्षेत्र नम्बर ६ मा कांग्रेसका भिमसेन दास प्रधानसँग १,३०० मतान्तरले पराजित हुन पुगे । प्रधानले १६,७८५ मत पाउँदा माओवादी केन्द्रका सुवेदीले १५,४८५ मत पाएका थिए ।
झिनो मतान्तरले पराजित हुनेमा नविन्द्र राज जोशी पर्छन् । मष्तिष्कघात भएर नर्भिक अस्पतालमा उपचार गराउँदै गर्दा जोशीको २०७७ साल चैत १३ गते बेलुका निधन भयो । तिनै जोशी अघिल्लो चुनावमा काठमाडौं क्षेत्र नम्बरमा ८ मा एमालेका जीवन राम श्रेष्ठसँग ४४४ मतान्तरले पराजित भएका थिए । श्रेष्ठ अहिले नेकपा एकीकृत समाजवादी छन् भने केही दिन अगाडिदेखि उनले पर्यटनमन्त्रीको जिम्मेबारी सम्हालेका छन् ।
सिन्धुपाल्चोक-१ बाट माओवादी केन्द्रका अग्नि प्रसाद सापकोटा ४०,५०९ मतका साथ निर्वाचित हुँदा कांग्रेसका मोहन बहादुर बस्नेतले २९,७९८ मत पाए । अहिले सभामुख समेत रहेका सापकोटा १० हजार ७०६ मतान्तरले निर्वाचित भएका थिए । बस्नेत दुइपटक सम्म मन्त्री भइसकेका व्यक्ति हुन् । धेरै कमलाई मात्र थाहा होला बस्नेत र शेर बहादुर देउवा नातामा साढुभाई पर्छन् । सोही जिल्लाको क्षेत्र नम्बर २ मा तात्कालिन राप्रपा (प्रजातान्त्रिक)का पशुपति शमशेर ज.ब.रा एमालेका शेर बहादुर तामाङसँग पराजित हुन पुगे । केपी शर्मा ओलीको सरकारमा तामाङ खानेपानी मन्त्री समेत भएका थिए भने उनकी श्रीमती उषाकला राई मुख्यमन्त्री शेरधन राईको पालामा प्रदेश १ को सामाजिक विकास मन्त्री भएकी थिइन् ।
कमल थापा अघिल्लो चुनावमा मकवानपुर-१ मा एमालेका कृष्ण प्रसाद दाहालसँग पाँच हजार ९७३ मतान्तरले पराजित भए । निर्वाचित दाहालले ४० हजार ६३१ मत पाउँदा थापाले ३४,६५८ मत पाएका थिए । गत मंसिर भएको राप्रपाको पहिलो एकता महाधिवेशनमा कमल थापा अध्यक्षमा पराजित हुन पुगे । राजेन्द्र लिङ्देन १,८१७ मत का साथ अध्यक्षमा निर्वाचित हुँदा थापाले १,६१७ मत पाए ।
अध्यक्षमा पराजित भएपछि थापाले राप्रपा नेपाल नामको पार्टी गठन गर्दै उक्त पार्टीको अध्यक्ष बने । तर भर्खरै सम्पन्न भएको स्थानीय तह निर्वाचनमा १८ नगरप्रमुख सहित २४६ जनाले उक्त पार्टीबाट उम्मेदवारी दर्ता गराए पनि कोही पनि विजयी हुन सकेनन् ।
पराजित हुनेमा अर्को अनुहार हो महालक्ष्मी उपाध्याय (डिना), १४ औं महाधिवेशनबाट सहमहामन्त्री पदमा निर्वाचित डिना अघिल्लो निर्वाचनमा एमालेका विरोध खतिवडासँग पराजित भएकी थिइन् । मकवानपुर-२ मा खतिवडा ४६,४८१ मतका साथ निर्वाचित हुँदा उपाध्यायले ३४,०९० भोट पाएकी थिइन् । १२ हजार ३९१ मतान्तरले निर्वाचित भएका खतिवडा अहिले माधव नेपाल नेतृत्वको नेकपा एकृकीत समाजवादी पार्टीमा आवद्ध छन् । खतिवडा आठ महिना स्वास्थ्य मन्त्री समेत बनेका छन् ।
नेकपा माओवादी केन्द्रका अध्यक्ष पुष्पकमल दाहाल “प्रचण्ड” चितवन क्षेत्र नम्बर ३ बाट प्रतिनिधि सभा सदस्यमा निर्वाचित भए । प्रचण्डसँग चुनावी प्रतिस्पर्धा गरेका तात्कालिन राप्रपा (प्रजातान्तिक) का विक्रम पाण्डे नौ हजार ३४१ मतले पराजित भए । पूर्वमन्त्री समेत रहेका पाण्डेले ३८,९३५ मत पाउँदा निर्वाचित प्रचण्डले ४८,२७६ मत पाएका थिए । तिनै पाण्डे गत मंसिरमा भएको राप्रपाको एकता महाधिवेशनबाट सर्वाधिक मतका साथ उपाध्यक्षमा निर्वाचित भएका छन् ।
गोरखा क्षेत्र नम्बर २ मा तात्कालिन नयाँ शक्ति पार्टीका संयोजक डा. बाबुराम भट्टराई ३१,८०७ मतका साथ निर्वाचित हुँदा माओवादी केन्द्रका नारायणकाजी श्रेष्ठले २४,९३३ मत पाए । प्रतिनिधि सभा निर्वाचनमा भट्टराईसँग पराजित भएका श्रेष्ठ दुई वर्षपछि गण्डकी प्रदेशबाट राष्ट्रिय सभामा निर्वाचित भए । एमाले र माओवादी केन्द्रको मिलनपछि बनेको नेकपाका प्रवक्ता हुँदा उनलाई राष्ट्रिय सभाको टिकट दिइएको थियो । गण्डकी प्रदेशमा नेकपाको एकल बहुमत थियो । प्रदेशका स्थानीय तहहरुमा पनि नेकपाकै बहुमत भएकाले श्रेष्ठले सहजै जितेका हुन् । राष्ट्रियसभा निर्वाचनमा प्रदेश सभा सदस्यको ४८ र स्थानीय तह प्रमुख उपप्रमुखको १८ मतभार हुन्छ ।
नेपाली कांग्रेसका वरिष्ठ नेता रामचन्द्र पौडेल अघिल्लो चुनावमा एमालेका कृष्ण कुमार श्रेष्ठसँग ६ हजार ८०२ मतान्तरले पराजित हुन पुगे । श्रेष्ठ अहिले नेकपा एकीकृत समाजवादीमा छन् भने उनले लगभग आठ महिना श्रम तथा रोजगारी मन्त्रीको जिम्मेबारी समेत सम्हालिसकेका छन् । मन्त्री भएको चार दिनमै सम्पत्ती विवरण सार्वजनिक गरेका श्रेष्ठ अरबौँ सम्पत्तिका मालिक समेत हुन् ।
तत्कालिन नेकपा एमालेमा रहेका वामदेव गौतम बर्दियाको क्षेत्र नम्बर १ मा कांग्रेसका संजय कुमार गौतमसँग पराजित भएका हुन् । अहिले वामदेवले नयाँ पार्टी गठनको लागि निर्वाचन आयोगमा निवेदन दिएका छन् । संजय कुमार गौतम ४४,८२९ मतका साथ निर्वाचित हुँदा वामदेव गौतम ४४,०७६ मतमै रोकिएका थिए ।
प्रतिनिधि सभाको निर्वाचनमा पराजित भएका वामदेव गौतमलाई २०७७ साल असोज १ गते राष्ट्रिय सभा सदस्यमा मनोनित गरिएको थियो । उक्त समयमा उनी एमालेका उपाध्यक्ष थिए । तत्कालीन अर्थमन्त्री डा. युवराज खतिवडाको कार्यकाल सकिएपछि राष्ट्रियसभामा राष्ट्रपतिले मनोनित गर्ने तीनमध्ये एक सिट खाली थियो । उक्त खाली सिटमा गौतम मनोनित भएका हुन् ।
कांग्रेसका पूर्णबहादुर खड्का अघिल्लो चुनावमा एमालेका ध्रुवकुमार शाहीसँग पराजित हुन पुगे । सुर्खेतको क्षेत्र नम्बर १ मा शाही ३६,७६९ मतका साथ निर्वाचित हुँदा खड्काले ३३,३७७ मत पाएका थिए । उनी तीन हजार ३८२ मतान्तरले पराजित हुन पुगेका हुन् । तिनै खड्का १४ औं महाधिवेशनमा उपसभापतिमा सर्वाधिक मतका साथ निर्वाचित भए । दुई उपसभापति मध्येमा खड्काले २,१२१ मत पाउँदा धनराज गुरुङ १,९०८ मतका साथ निर्वाचित भए । सोही पदका उम्मेदवार विजयकुमार गच्छदार दुई मतले पराजित भएका थिए ।
पराजित हुनेमा अर्को चर्चित अनुहार हो आरजु राणा देउवा । प्रधानमन्त्री शेर बहादुर देउवा पत्नी समेत रहेकी राणा अघिल्लो निर्वाचनमा कैलाली क्षेत्र नम्बर ५ मा एमालेका नारद मुनि रानासँग पराजित भईन् । राना २७,२०२ मतका साथ निर्वाचित हुँदा राणाले २२,३२२ मत पाएकी थिइन् । नेपाली कांग्रेसको १४ औं महाधिवेशनमा महिला कोटाबाट राणा केन्द्रीय सदस्यमा निर्वाचित भएकी छन् ।
पराजित हुनेमा कांग्रेसका रमेश लेखक पनि पर्छन् । कन्चनपुर क्षेत्र नम्बर ३ मा लेखक झिनो मतान्तरले पराजित भएका थिए । एमालेका दीपक प्रकाश भट्ट २६,३६४ मतका साथ निर्वाचित हुँदा लेखकले २६,१०६ मत पाएका थिए । उनी २५८ मतले पराजित भएका हुन् । लेखक १४ औं महाधिवेशनबाट केन्द्रीय सदस्यमा निर्वाचित भएका छन् ।
२५ जनाको सूचीमा नअटेका पराजित अन्यमा भीष्मराज आङ्देम्बे, उद्धव थापा, डा. बंशीधर मिश्र, राजन भट्टराई, दमन नाथ ढुङ्गाना, दीप कुमार उपाध्याय, डा. गोविन्द राज पोखरेल, पशुपति दयाल मिश्रा लगायत छन् ।
प्रतिनिधि सभा सदस्यमा प्रत्यक्षतर्फ निर्वाचित १६५ जना र पराजित भएर दोस्रो स्थानमा रहेकाहरूको विस्तृत विवरण
* सच्चाइएको राजेन्द्र महत्तो तत्कालित *राष्ट्रिय जनता पार्टी, नेपालमा हुनुपर्नेमा भुलवस राष्ट्रिय प्रजातन्त्र पार्टी, नेपाल भएकोमा यसलाई सच्चाइएको छ । सम्पादक