भारत सरकारले नेपालका विभिन्न जिल्लामा रहेका संस्थाहरूलाई ७५ वटा एम्बुलेन्स र १७ वटा विद्यालय बस उपहारस्वरुप प्रदान गरेको छ ।
भारतीय दूतावासमा आज आयोजित एक कार्यक्रममा नवनियुक्त राजदूत नवीन श्रीवास्तवले विभिन्न सरकारी, गैरसरकारी तथा गैर नाफामूलक संस्थाहरुलाई बस र एम्बुलेन्सको चाबी प्रदान गरेका हुन् । उक्त कार्यक्रममा शिक्षा,विज्ञान तथा प्रविधि मन्त्री देवेन्द्र पौडेलको उपस्थिती थियो ।
भारत स्वतन्त्र भएको ७५ वर्षको उत्सव मनाउन अघि सारेको “India@75 आजादीका अमृत महोत्सव” कै एक हिस्साको रुपमा रहेको दुतावासले जनाएको छ ।
स्वास्थ्य र शिक्षा क्षेत्रमा पूर्वाधार पक्षलाई सुदृढ गर्ने नेपाल सरकारको प्रयासलाई टेवा पुर्याउन नेपाल–भारत विकास साझेदारी कार्यक्रम अन्तर्गत यस्ता किसिमका सहयोग लामो समयदेखि चलिआएको बताएको छ ।
कार्यक्रममा मन्त्री पौडेलले भारत सरकारको सहयोगमा नेपालमा सञ्चालित विभिन्न विकास परियोजनाको प्रशंसा गरेका थिए ।
सन् १९९४ यता नेपालका विविध जिल्लामा अवस्थित विभिन्न हितग्राही संस्थाहरुलाई ९४० वटा एम्बुलेन्स र १८४ वटा विद्यालय बस उपहारस्वरुप प्रदान गरिएको दुतावासका अधिकारीहरूले जनाएका छन् ।