पहिलो घरबार बिग्रिएपछि डिप्रेसनबाट मुक्त हुनेक्रममा रहेकी चिकित्सक अप्सरा (परिवर्तित नाम) को विराटनगरस्थित नोबेल मेडिकल शिक्षण अस्पतालमा कार्यरत डाक्टर अञ्जन (परिवर्तित नाम) सँग भेट भयो । अप्सराका बिरामी एनआइसियूमा थिए।

सन् २०१९ तिर बिरामी आफन्त भेट्नका लागि नोबेल आएकी ती २९ वर्षीय अप्सराले बिरामीको स्वास्थ्यवस्थाका बारेमा परामर्श लिन अञ्जनसँग सम्पर्क गरिन्। त्यसअघि नै अञ्जनले बिरामीमार्फत अप्सराको नम्बर लिइसकेका थिए। सामान्य चिनजानपछि नै अञ्जनले अप्सरालाई बिहेको प्रस्ताव राखे।

‘उहाँसँग पाँच मिनेटजति गफ भएको थियो,’ उनी विगत सम्झिँदै भन्छिन्, ‘पछि मेरो आफन्तसँग उहाँले मेरो नम्बर माग्नु भएछ। फोन आएपछि बिरामीकै बारेमा कुराकानी भयो। पछि उहाँले निरन्तर फोन गर्न थाल्नुभयो। पाँच दिनपछि नै उहाँले मेरो घरमा बिहेको कुरा भयो भनेर भन्नुभयो र मसँग बिहेको प्रस्ताव राख्नुभयो।’

तर पहिलै नै घरबार बिग्रेका कारण अप्सराले उनको प्रस्ताव अस्वीकार गरिन्। अप्सराको सन् २०१५ मा भारतका एक जनासँग बिहे भएको थियो। जतिबेला उनी २२ वर्षकी थिइन्। तर ससुरालले आफूमाथि गरको दमन सहन नसकेपछि उनीहरूको डिभोर्स भएको थियो।

त्यसपछि उनी डिप्रेसनमा गइन्। एकपटक आत्महत्याको प्रयास पनि गरिन्। तर मर्न सकिनन्। र, मेडिकल लाइन नै उनको जिउने सहारा बनिरहेको थियो। डाक्टर अञ्जनले प्रस्ताव राख्दा पनि उनले आफूमाथि परेको व्यथा सुनाइन्। तर पनि अञ्जनले उनलाई फोन गरिरहे। बिहेका लागि दबाब दिइरहे।

उनी पहिलो घरबार बिग्रिएकाले त्यसको तनावबाट मुक्त हुन सकेकी थिइनन्। अञ्जनले निरन्तर फोन गरिरहँदा उनी त्यो तनावबाट मुक्त हुँदै गइन्। ‘आफ्नो समय मिलेसम्म फोन उठाएर कुरा गर्थें,’ उनी भन्छिन्, ‘उहाँ त्यसबेला एमडी गर्दै हुनुहुन्थ्यो। उहाँलाई मैले टार्दै लगेँ। तर उहाँकी बहिनीले मलाई भावनात्मक दबाब दिइन्, जसका कारण म बिहेका लागि तयार भएँ।’

त्यसबीचमा अञ्जनकी बहिनी अस्मिताले उनलाई फेसबुकमा फ्रेन्ड रिक्वेस्ट पठाइन्। कुराकानीका क्रममा अस्मिताले आफ्नो दाइलाई डाक्टर भाउजू चाहिएको भन्दै उनलाई बिहेको दबाब दिन थालिन्। करिब १० पटकजति अस्मितालाई टारेकी पनि थिइन्।

तर अस्मिताले आफ्नो पनि घरबार बिग्रिएर बसेको भन्दै बिहेका लागि दबाब दिन थालेपछि उनको केही पनि लागेन। ‘बहिनीले अमेरिकामा सेटल भएको केटा थियो, डिभोर्स गरेर बसेकी छु, बितेको कुराले केही पनि हुँदैन भनेपछि आश पलायो,’ उनी भन्छिन्, ‘आफूले जस्तै पीडा भोगेकी नन्द पाउने रहेछु भन्ने मलाई लाग्यो।’

२०७७ पुस ४ गते, विवाह पञ्चमीको दिनमा अञ्जनको परिवारले बिहेको कुरा गर्न अप्सराको परिवारलाई विराटनगर बोलायो। अप्सराको बुबा, काका र काकाको छोरा विराटनगर आएर पारिवारिक भेटघाट गरे। बुबाले अप्सराको विगतबारे अञ्जन र उनको परिवारलाई सुनाए। आफ्नो छोरीको पनि यस्तै भएको भन्दै उनीहरूले सहमति जनाएपछि ‘मगनी’ भयो।

अप्सरा भने काठमाडौँ बसेर एमडीको इन्ट्रान्सको तयारी गर्दै थिइन्। भेटौं भनेर अञ्जनले कल गरे। अप्सराले सीधै अस्वीकार गरिन्, जसरी अञ्जनले भेट्नका लागि राखेको हरेक प्रस्ताव नकार्थिन्। तर त्यसपटक भने ‘बिहे फिक्स’ भएको भन्दै अञ्जनले ब्लाकमेल गरे।

इन्ट्रान्स सकिएपछि भेट्ने सहमति भयो। जाँच सकिएपछि भेट्ने भए तपाईं नै काठमाडौं आउनू भनिन्। तर कोभिडका कारण अस्पतालमा काम धेरै भएका कारण आउन नसक्ने भन्दै अञ्जनले उनलाई नै बोलाए। भेटघाट गर्दैमा के हुन्छ र भन्ने प्रश्न मनमा लिएर उनी फ्लाइटमा विराटनगर आइन्। त्यसअघि नै उनले धरानमा कार्यरत आफ्नी डाक्टर साथीलाई केही दिन तिम्रोमा बस्छु भनेर आफ्नो व्यवस्था मिलाएकी थिइन्।

विराटनगर उत्रिनेबित्तिकै अञ्जनले उनलाई भेडेटार जाने प्रस्ताव राखे। भेडेटार पुगेपछि रात पनि यतै बस्ने भन्दै अञ्जनले उनलाई कन्भिन्स गराउन खोजे। मानेकी थिइनन् तर पूर्वका बारे जानकार नभएकै कारण उनी राजी भइन्।

तर त्यो रात। अप्सराको मञ्जुरीबेगर नै दुईबीच शरीर साटासाट भयो। त्यसपछि उनी धेरै रोइन्। बिहे गर्ने नै हो भनेर फकाएपछि उनी फकिइन्।

केही दिनको बसाइपछि उनी काठमाडौं फर्किइन्। अञ्जन पनि काममा व्यस्त भए। केही दिनपछि नै अञ्जनका बुबा राजकुमारले अप्सराका बुबालाई फोनमा बिहे रद्द भएको सुनाए। ‘तपाईंकी छोरीको पहिलेको घरबार बिग्रिएको छ, यो थाहा भए भने त बिहेमा पाहुना पनि आउँदैनन् भनेर उहाँहरू टाढिन खोज्नुभयो,’ उनी भन्छिन्, ‘मैले उहाँलाई फोन गरेर यो सब सुनाएँ। उहाँ पनि आफ्नै परिवारको पक्ष लिन थाल्नुभयो। त्यसपछि मैले मेरो परिवारमा हामीबीच शरीर साटासाट गरेको कुरा सुनाएँ। उहाँहरूले मलाई गाली गर्नुभयो। केही दिन अघिसम्म नातेदार बन्न तयार हाम्रो दुई परिवारबीच विवाद सुरु भयो।’

त्यसपछि अप्सराले कानुनी बाटो रोजिन्। जिल्ला प्रहरी कार्यालय धनकुटामा उनले जबरजस्ती करणीको जाहेरी दिइन्। त्यसपछि अञ्जन पक्राउ पर्नुभयो। अञ्जन हिरासतमा पुगेपछि अप्सरा र उनका परिवारसँग मिलापत्रका लागि थुप्रै अनुरोध आए।

बिहे गर्ने प्रतिबद्धतासाथ अञ्जनका परिवारले माफी मागेपछि अप्सराको परिवार लचिलो बन्यो। त्यसपछि सरकारी वलिकले धनकुटाको पाथीभरामा बिहे गरेपछि सहमतिमै यौन सम्पर्क भएको भन्न सुझाव दिए। ‘दुवै जना डाक्टर हौ, मिलिहाल भन्नुभयो,’ उनले भनिन्, ‘सबै ठिक हुन्छ भनेर उहाँले यसो भन्न भनेर प्लान गरिदिनुभयो। परिवार मिलेपछि म पनि होस्टाइल बन्न बाध्य भएँ। उहाँहरूले जसो भन्नुभयो मैले त्यसै गरेँ। तर पनि जजले हामीलाई बिहेको फोटो खोइ त? भनेर प्रश्न गर्दा हामी अकमक्क बन्यौं। धेरै प्रयासपछि उहाँ फागुन ७ गते एक लाख ५० हजार धरौटीमा छुट्नुभयो।’

अञ्जन धरौटीमा छुटेकै दिन धनकुटाबाट विराटनगर फर्किँदै गर्दा दुवै परिवारले धुमधामका साथ भेटेडारस्थित पाथीभरामा उनीहरूको बिहे गरिदियो। त्यसको दुई दिनपछि विराटनगरको एसियाटिकमा उनीहरूले धुमधाम बिहे गरे।

अप्सराका बुबाको ४० लाख रुपैयाँजति खर्च भयो। १० लाख रुपैयाँ त उनलेले ऋण लिएर राजकुमार झाको अकाउन्टमा हालिदिएका थिए। पछि उच्चमा मुद्दा पुग्यो। उच्चमा मुद्दा पुग्दा अप्सरा गर्भवती भइसकेकी थिएँ। बलात्कारबाट उनी गर्भवती बनेकी थिइन्।

तर सोही रिपोर्ट देखाएर अञ्जनले सफाइ पाए। सफाइ नपाउन्जेल त अप्सरालाई अञ्जनको परिवारले राम्रै व्यवहार गरेको थियो। तर सफाइ पाएपछि भने उनको पास्ट कोट्याएर दुःख दिन थाले। सहनै नसकिनेगरी भन्न थाले। दिनदिनै दुःख र टर्चर पाए पनि आफू गर्भवती भएकै कारण चुपचाप रहिन्।

अनेक दुःख सहेर कात्तिक ७ गते नोबेलमै सन्तानलाई जन्म दिइन्। अपरेसन गरेर बच्चा निकालेका कारण उनी निकै कमजोर थिइन्। ११ दिन अस्पताल बसाइपछि उनी डिस्चार्ज त भइन् तर दुई दिनपछि नै नानी बिरामी भएपछि पुनः अस्पताल बस्नपर्ने भयो।

नानी एनआइसियूबाट डिस्चार्ज भएपछि पुनः घर फकिइन्। तर मंसिरको जाडोमा उनीहरूले १८ दिने शिशुसहित अप्सरालाई घर निकाला गरे। ‘मेरा लागि ढोका बन्द भइसकेको थियो,’ उनले भनिन्, ‘मलाई भगाउन अनेकन कोसिस गरियो। मंसिर १८ गते म नानीलाई लिएर म माइती लागेँ। म घर आउनका लागि उहाँलाई फोन गरिरहेँ। पाँच महिनापछि मञ्जुरीबिना आफैँ फर्किएँ।’

नानी चेपेर ससुराल आएकी उनलाई अञ्जनले घर लगेनन्। बरु, विराटनगरको जयलक्ष्मी होटलमा राखेर गालीगलौच र कुटपिट गरे। पछि प्रहरी आएर घर लैजान भनेपछि मात्र अप्सरा ससुराल जान पाइन्।

अञ्जनले केही दिनपछि नै अप्सरालाई ढाटमा रहेको डेरामा लगे। कोठामा उनलाई एकदमै टर्चर दिइयो। अपरेसन गरेको धेरै भएको थिएन। तर उनीमाथि करणी भयो। अप्राकृतिक रूपमा मैथुनसमेत गरियो। ‘अपरेसन गरेको शरीर पूर्ण रूपमा फिरेको पनि थिएन। म करणीको लायक भइसकेको थिइनँ। तर २०७९ वैशाख १८ गते म पुनः त्यही मान्छेबाट बलात्कृत भएँ,’ उनले भावुक हुँदै भनिन्,‘सोच्नुनस् त मलाई कति गाह्रो भयो होला!’

अप्सरा आफूमाथि हिंसा सुनाउँदै जाहेरीका लागि प्रहरी कार्यालय जाने मनसायमा थिइन्। तर अञ्जनका परिवारले अंशबन्डाको फजुल कागज बनाएर सम्बन्ध विच्छेदका लागि निवेदन दिइसक्नु भएको रहेछ। अप्सराको हस्ताक्षरबिना १५ लाख रुपैयाँ अंशबन्डाबापत दिएको र निजको पढाइ खर्चमा सकिएको भनेर लेखिएको रहेछ।

यता, उनी पुनः गर्भवती बनेकी थिइन्। अशक्त शरीर हुँदा बलात्कृत भई गर्भवती बनेकी उनी काखे नानी च्यापेर न्याय माग्दै प्रहरी कार्यालय, अदालत र एबिसी नेपाल र ओरेक धाइन्। यसरी गरिरहँदा ६ हप्ता बितेछ।

जेठ ९ गते अदालबाट फर्किँदै गर्दा उनलाई अञ्जनका भाई (अभिषेक) र सासूले कुटपिट गरे। गर्भ रहेको पेटमा लाती, मुक्का प्रहार गर्दा ६ हप्ताको गर्भ तुहियो।

विराटनगरको कोसी अस्पतालमा १६ जेठमा स्वास्थ्य परीक्षण गर्दा कुटपिट गरेको कारणले गर्भपतन भएको रिपोर्ट आयो। कुटपिटको कारणले गर्भ खेर गएको अस्पतालको रिपोर्टले पनि पुष्टि गरेपछि वैशाख १७ गते त्यो परिवारका पाँच जना सदस्यविरुद्ध उनले मोरङ प्रहरीमा ‘गर्भ संरक्षणविरुद्धको कसुर’मा जाहेरी दिइन्। उनीमाथि कुटपिट हुँदा अञ्जन भने थुनामै हुनुहुन्थ्यो।

तर त्यसभन्दा अगाडि पनि उनलाई जिउँदै जलाई दिन्छु भन्दै अञ्जनको परिवारले धाकधम्की दिने पिट्ने गर्दै आएका थिए। गर्भमा असर परी लगातार ब्लिडिङ भएपछि उनले जेठ १३ गते मोरङ अदालतमा घाउ जाँच केस फारमको लागि निवेदन दिइन्।

सोही घाउ जाँच केस फारमको तथा शरीर परीक्षणको आदेश भए पनि उक्त दिन घाउ जाँच तथा शरीर परीक्षण हुन सकेन। त्यसपछि जेठ १६ गते घाउ जाँच केस फारम हुँदा उनीहरूको कुटाइको कारण अप्सराको गर्भपतन भयो।

जाहेरी दिएपछि ज्यान मार्ने धम्की अभिषेक र उनका माइलो मामा सवार गाडीले अप्सरा चढेको सिटी सफारीलाई ठक्कर दियो। त्यसअघि पनि उनलाई ज्यान मार्ने धम्की आइरहन्थ्यो। ‘त्यसदिन म अदालतबा फर्किँदै थिएँ। २३ जेठमा अदालतको काम र घाउ जाँचको प्रतिलिपी लिएर आफ्नो डेरातर्फ फर्किनेक्रममा भट्टाचौक पुगेपछि अभिषेक र उनका मामा चढेको गाडीले ठक्कर दियो। त्यसपछि सिटी डिस ब्यालेन्स भयो। गाडी फरार भयो । त्यो सिसी टिभीमा पनि देखिन्छ। म आफू भने भाग्यबस बाँचे,’ उनले भनिन्।

अहिले उनी अस्पतालमा ड्टुटी गर्दै भ्याएको समयमा काखे नानी च्यापेर न्यायका लागि मोरङ जिल्ला अदालत धाइरहेकी छन्।

आरोपित घरमै, प्रहरीले गरेन पक्राउ

६ हप्ताको गर्भ तुहिने गरी कुटपिट गर्ने आरोपितलाई अहिलेसम्म प्रहरीले पक्राउ नगरेको पीडितको गुनासो छ। घरगाउँमा खुलेआम हिँडडुल गर्दा पनि प्रहरीले पक्राउ गर्न चासो नदेखाएको उनले बताइन्।

प्रहरीले घटनामा संलग्न फरार रहेको बताउँदै आए पनि आरोपित घर–अफिस आवत–जावत गरिरहेको उनले बताइन्। ‘खोइ! कसैलाई पनि कारबाही हुँदैन जस्तो लाग्छ,’ उनले भनिन्, ‘प्रहरीले मान्छे भेटिएको छैन भनेर भन्छ। उनीहरू खुलेआम छन्।

यता मोरङ प्रहरीका डिएसपी राजन कार्कीले गर्भ संरक्षणविरुद्धको कसुरमा उजुरी दर्ता भएकाले अहिले अनुसन्धान भइरहेको बताए। घटनामा सम्बन्धित व्यक्तिहरू फरार रहेका कारण अनुसन्धानमा समस्या भए पनि खोजी कार्यलाई तीव्रता दिइएको उनको भनाइ छ।

परिवारै मिलेर ठगी गरेको आरोप

१६ वर्षयता अमेरिका बस्दै आएका बच्चनदीप ठाकुर र विमला हाडाले ३४ वर्षीय छोरा विधान ठाकुरलाई गुमाउनु पर्‍यो। कारण थियो, राजकुमार झा, उनकी छोरी अस्मिता र उनको परिवार।

सन् २०१५ तिर। बच्चनदीप र विमलाले किक बक्सिङमा नेपालको प्रतिनिधित्व गर्ने खेलाडीसमेत रहेका छोरा विधानका लागि केटी हेर्न नेपालका ‘लमी’सँग कुरा गरे। लमीले अस्मितासँग कुरा चलाइदिए।

त्यसबेला नै उनीहरू बिहे गर्ने उत्साहका साथ विराटनगर आइपुगे। भोलिपल्टै अस्मितासँग विधानको ‘इंगेजमेन्ट’ भयो। र, त्यसको केही दिनमै उनीहरूले लगनगाँठो कसे। बच्चनदीपको परिवारले विवाहमा ३५ लाख रुपैयाँ खर्चियो।

बिहे गरेपछि विधान र अस्मिता केही दिन काठमाडौं बसे। त्यसबीचमा अस्मितालाई उनका प्रेमी सतिश ठाकुरले फोन गरिहन्थे। प्रत्येक रातको २ बजे अस्मिता फोनमा बोल्न थालेपछि विधानले सतिशलाई सोधे। तर उनले कुनै सम्बन्ध नरहेको जनाएपछि त्यो विवाद त्यतिकै साम्य भयो।

पछि विधान र उनको परिवार काठमाडौंबाट अमेरिका पुग्यो। अमेरिकामा उनीहरू अस्मिताका लागि ग्रीनकार्डसमेत बनायो। तर अस्मिता अमेरिका नजाने निधोमा पुगिन्। विधानलाई अस्मिताले छायाँमा राखेर अनेकन झुट बोलिरहिन्। सोही कारण तनावमा परेका विधानको २०१७ तिर निधन भयो। विधानको निधनपछि उनकी ५६ वर्षीया आमा अस्पतालमा मृत्युसँग लडिरहेकी छन्।

‘उनले हामीलाई छायाँमा राखिरहिन्,’ वृद्ध उमेरका बच्चनदीप भन्छन्, ‘छोरालाई तनाब दिइरहिन्। तनाबकै कारण छोरो बित्यो। उसको मृत्युको कारण अस्मिता नै थिइन्। छोरो मर्नेबित्तिकै उनले आफ्ना प्रेमी सतिशसँग बिहे गरिछन्। श्रीमती बिरामी भएपछि मैले जागिर छोड्नुप¥यो। जसका कारण मैले अहिले चरम आर्थिक समस्या झेलिरहेको छु।’