मोटोपन हाम्रो शरीरका लागी अस्वस्थ मानिन्छ, जति नै कोसिस गर्दा पनि आफ्नो शरीरको तौल घटाउन नसक्दा मानिसहरू धेरै चिन्तित देखिन्छन् ।
मोटोपनका कारण धेरै किसिमका रोगहरू उत्पन्न हुने गर्दछन् जसको कारणले कति व्यक्तिहरू मोटोपनबाट निम्तिने विभिन्न रोगको सिकार भइसकेका छन् ।
चाँडो तौल घटाउने भन्दैमा भोकै बस्नु राम्रो हुँदैन । खाली पेट बसेमा झन् विभिन्न समस्या उत्पन्न हुन सक्छन्। एक साताभित्र एक किलोग्रामभन्दा बढी तौल घटाउनु उपयुक्त हुँदैन । उसिनेको खाना मात्र खानुपर्छ भन्ने गलत धारणा राख्नु हुँदैन । स्वादका लागि केही मरमसला प्रयोग गर्न सकिन्छ तर नुन भने कमै प्रयोग गर्नु उचित हुन्छ ।
तौल घटाउन सकेको खण्डमा उच्च रक्तचाप, मधुमेह, उच्च रक्त कोलेस्ट्रोल, हृदयाघातजस्ता रोगको समेत न्यूनीकरण सकिन्छ । तौल घटाउनका लागी विभिन्न उपायहरू अपनाउन सकिन्छ । तर, यी उपाय अपनाउँदा भने केही कुरामा ध्यान दिनुपर्छ ।
शरीरको तौल बढ्दा जो कोहीलाई चिन्ता हुनु स्वभाविक हो । अझ महिलाहरुलाई बढी चिन्तित बनाउने गर्छ । महिलाहरुको पेटमा लाग्ने बोसोले उनीहरुलाई बढी तनाव दिने गर्छ । ब्यायाम र योग गर्न पनि नचाहने र शरीरमा बोसोको मात्रा बढ्यो भनेर चिन्तित हुने ब्यक्तिहरुले आफ्नो खानपिन शैलीलाई केही सुधार गरेर सन्तुलित भोजन लिएरपनि शरीरको तौल घटाउन सक्छन् ।
माटोपन कम गर्ने बेला प्रशस्त मात्रामा खाद्यपदार्थहरू खाने गर्नुपर्छ । जस्तै हरियो तरकारी, सलाद (गाजर, मुला, काँक्रो, टमाटर),ताजा फलफूल (केरा,आँपबाहेक) र माछा आदि खाद्यपदार्थहरू खाने गर्नुपर्छ ।
नियन्त्रित रूपमा खान हुने:
१.दूध: दैनिक २५० मिलिलिटर अर्थात् डेढ गिलाससम्म (चिया र कफीमा मिसाउने दूधसमेत हिसाबमा गन्ती गर्नुपर्ने हुन्छ)
२.बटर, घ्यू, तेल, क्रिम (दैनिक २ देखि ३ सानो चम्चा)
३.सुख्खा गहुँको रोटी (दैनिक ३–४ वटा मात्र)
४.पाउरोटी (ब्राउन ब्रेड भएर राम्रो, दैनिक ३–४ टुक्रा मात्र)
५.भात (दैनिक १ कचौरा)
६.दाल (दैनिक १ कचौरा)
७.आलु: मझौला आकारका दैनिक २ वटासम्म
के के खानेकुरा बार्ने
१.गुलियो बिस्कुट, केक जस्ता बेकरी खानेकुरा
२.आइसक्रिम
३.चिनी, चकलेट, मिठाई, जाम
४.घ्यू, तेलमा तारेका खानेकुरा
५.रक्सी