प्रधानमन्त्री शेर बहादुर देउवाको सिफारिसमा राष्ट्रपतिले नयाँ मन्त्रीहरू नियुक्त गरेकी छिन् ।
राष्ट्रपति कार्यालयका प्रवक्ता सागर आचार्यका अनुसार २४ जनाको मन्त्रिपरिषद्मा ३ जना राज्यमन्त्री छन् भने २१ जना मन्त्रीहरू सहभागी छन् । नेपालको संविधान अनुसार बढीमा २५ जनाको मन्त्रीपरिषद् गठन गर्न सकिन्छ ।
नेपाली कांग्रेसको १४औँ महाधिवेशनबाट महामन्त्रीमा पराजय भएसँगै डा. मिनेन्द्र रिजालले रक्षामन्त्रीको पदबाट राजीनामा दिएसँगै उक्त पद प्रधानमन्त्रीले ने सम्हालीरहेका छन् ।
प्रधानमन्त्री शेरबहादुर देउवाको नेतृत्वमा मिति २०७८ साल असार २९ गते गठन भएको मौजुदा मन्त्रिपरिषद्मा नेपालको संविधानको धारा ७६ को उपधारा (९) तथा धारा ७८ को उपधारा (१) बमोजिम प्रधानमन्त्रीको सिफारिसमा नियुक्ति र कार्यविभाजन गरी मन्त्रिपरिषद् गठन गरिएको राष्ट्रपति कार्यालयबाट जारी विज्ञप्तीमा उल्लेख छ ।
अहिलेको कार्यविभाजनमा नेपाल कम्युनिष्ट पार्टी (एकीकृत समाजवादी) का चार सासंदहरू मन्त्री बनेका छन् भने यसअगाडि स्वास्थ्य राज्यमन्त्री भएका भवानी प्रसाद खापुङलाई स्वास्थ्यमन्त्रीमा बढूवा गरिएको छ ।
पर्यटनमन्त्री प्रेमबहादुर आलेको स्थानमा जीवनराम श्रेष्ठलाई नियुक्त गरिएको छ भने सहरी विकासमन्त्रीमा मेटमणि चौधरीलाई नियुक्त गरिएको छ । यसअगाडी सो मन्त्रालय रामकुमार झाँक्रीले सम्हाल्दै आएकी थिइन् ।
त्यस्तैगरी श्रम रोजगार तथा सामाजिक सुरक्षामन्त्री कृष्णकुमार श्रेष्ठ ‘किसान’ को स्थानमा शेरबहादुर कुँवरलाई नियुक्त गरिँदा हिराचन्द्र केसीलाई स्वास्थ्य राज्यमन्त्री नियुक्त गरिएको छ ।
श्रममन्त्री भएका कुँवर गैरसासंद हुन् । अछामका कुँवर राष्ट्रियसभा सदस्य रहेर कार्यकाल सकिसकेका व्यक्ति हुन् । गत फागुनमै कुँवरको राष्ट्रिय सभाको चार वर्षे कार्यकाल सकिएको थियो।