नेपाल आयल निगमले पेट्रोलियम पदार्थको नयाँ मूल्यसूची सार्वजनिक गरेको छ। सरकारले पेट्रोलियम पदार्थमा लिँदै आएको कर कटौती गरेपछि निगमले नयाँ मूल्यसूची सार्वजनिक गरेको हो।
यसअघि शनिबार बिहान प्रधानमन्त्री निवास बालुवाटारमा बसेको सत्ता गठबन्धनको बैठकले सरकारलाई पेट्रोलियम पदार्थको मूल्य समायोजन गर्न सरकारलाई निर्देशन दिएको थियो।
उद्योग वाणिज्य तथा आपूर्तिमन्त्री दिलेन्द्रप्रसाद बडूले शनिबार पत्रकार सम्मलेनमार्फत करमा कटौती गर्दै पेट्रोलियम पदार्थको मूल्य घटाउने घोषणा गरेका हुन्। मन्त्री बडूले डिजेलमा प्रतिलिटर २९ रुपैयाँ र पेट्रोलमा २० रुपैयाँ कर कटौती गरेको जानकारी दिएका थिए।
शनिबार राति १२ बजेबाट लागु हुने गरी निगमले जारी गरेको नयाँ मूल्य सूचीमा पेट्रोलको मूल्य प्रतिलिटर १७९ कायम गरिएको छ। यस्तै डिजेल र मट्टितेलको मूल्य प्रतिलिटर १६३ कायम गरिएको छ।
नयाँ मूल्यसूची हवाई इन्धन आन्तरिक र बाह्य दुवैमा केही परिमार्जन गरिएको छैन । सरकारले आइतबार मध्यरातबाट मूल्यवृद्धि गरेपछि हवाइ भाडा समेत बढेको छ भने सार्वजनिक सवारी र मालबाहक सवारी साधनको भाडा बढेको छ ।
अब डिजेलको मूल्य घटेसँगै यातायात भाडा समायोजन हुनसक्नेछ ।
विदेशी मुद्रा खर्च गरी महंगो मूल्यमा आयात गर्नुपर्ने पेट्रोलियम पदार्थको प्रयोग सकेसम्म कम गरी विद्युत् लगायतका स्वदेशी ऊर्जाको खपत बढाउन निगमले आम उपभोक्ताहरूलाई आग्रह समेत गरेको छ ।