१४ डिब्बामा करिब ५ सय धार्मिक यात्रु बोकेर ‘भारतीय गौरब पर्यटन रेल’ आज नेपाल आइपुगेको छ ।
बिहीबार अपरान्ह साढे १ बजे उक्त रेल जनकपुर आइपुगेको हो । जानकी मन्दिरका महन्थ रामरोसन दासका अनुसार यात्रामा आएका तीर्थयात्रु एक रात जनकपुरमा बास बसेर पुनः भारत फर्कने छन् । रेल्वे सेवा सुरु भएपछि पहिलो पटक भारतीय रेल नेपाल आएको हो ।
जनकपुरधाम रेलवे स्टेशनमा नेपाल र भारतका प्रतिष्ठित व्यक्तित्वहरूले भारतबाट आएका पर्यटकहरूलाई स्वागत गर्न भेला भएका थिए ।
मधेस प्रदेशका मुख्यमन्त्री लालबाबु राउत, मधेश प्रदेशका उद्योग, पर्यटन तथा वनमन्त्री श्री शत्रुघ्न महतो, जनकपुरधामका मेयर श्री मनोजकुमार शाह, नेपाल रेलवेका महाप्रबन्धक श्री निरञ्जन झा, काठमाडौंस्थित भारतीय राजदूतावासका काउन्सिलर श्री प्रसन्न श्रीवास्तव र वीरगन्जस्थित भारतीय महावाणिज्य दूत श्री नितेश कुमारद्वारा सो अवसरमा स्वागत गरिएको थियो ।
स्थानीय राजनीतिक प्रतिनिधि, पदाधिकारी, व्यापारी, पत्रकार, नागरिक समाजका सदस्यहरुको बाक्लो उपस्थिति रहेको थियो ।
भारत सरकारको महत्वकांक्षी योजना ‘रामायण सर्किट’मा सञ्चालन हुने सो रेललाई ‘भारत गौरव पर्यटक रेल’ नाम दिईएको छ भने जनकपुर आउने पर्यटकको सुरक्षा प्रबन्धका लागि विशेष ब्यवस्था गरिएको छ ।
भारतीय पर्यटकहरुलाई जनकपुर भ्रमण गराउन मधेश प्रदेश सरकार अन्तर्गतको उद्योग, पर्यटन तथा वन मन्त्रालयले समन्वय गर्नेछ भने जानकी मन्दिर, धनुषाधाम र जनकपुरमा दैनिक हुने गंगा आरतीमा उनीहरुलाई सहभागी गराईनेछ ।
भारत र नेपालका प्रधानमन्त्रीहरूद्वारा ०२ अप्रिल २०२२ मा भारतको जयनगरदेखि नेपालको कुर्था जोड्ने रेललाई संयुक्त रूपमा उद्घाटन गरिएको थियो।