रवि लामिछानेले मंगलबार घोषणा गरेको ‘राष्ट्रिय स्वतन्त्र पार्टी’ विरुद्ध स्वतन्त्र उम्मेदवारी घोषणा गरेका नेताहरूले निर्वाचन आयोगमा उजुरी दिएका छन् ।
काभ्रे क्षेत्र नं २ बाट संघीय निर्वाचनका लागि स्वतन्त्र उम्मेदवारी घोषणा गरेका मनोज पण्डितसहितका नेताहरूले बुधबार आयोगमा पुगेर उजुरी दिएका हुन् । उनीहरूले रवि लामिछानेले घोषणा गरेको पार्टीको दर्ता रोक्न माग गरेका छन् ।
निर्वाचन आयोगका प्रमुख निर्वाचन आयुक्त दिनेश थपलियालाई बुधबार उजुरी बुझाएको छ । पण्डितले स्थानीय तहको निर्वाचनअघि नै संघीय निर्वाचनका लागि आफ्नो उम्मेदवारी घोषणा गरेका थिए ।
पण्डितसँगै पुष्कर शाह, राजकुमार बजगाईँ लगायत युवाहरूले पनि उजुरीपत्रमा हस्ताक्षर गरेका छन् ।
रवि लामिछानेले मंगलबार पूर्णकालीन राजनीति प्रवेश गरेको भन्दै राष्ट्रिय सभागृहबाट ‘राष्ट्रिय स्वतन्त्र पार्टी’ को घोषणा गरेका थिए । यद्यपि उनको पार्टी निर्वाचन आयोगमा दर्ता भइसकेको छैन । साथै उनले ‘घण्टी’ लाई आफ्नो पार्टीको चुनाव चिह्न प्रस्तावित गरेका छन् ।
यसअघि राष्ट्रिय स्वतन्त्र उम्मेदवारी अभियानका संयाेजक डम्बर शाहूलगायतले पनि साेही प्रकृतिकै उजुरी दर्ता गराएका छन् ।