नेकपा (एकीकृत समाजवादी)का नेता जीवनराम श्रेष्ठले सरकार विद्यालयहरुमा पाठ्यपुस्तक समयमा नै पुर्याउन नसक्ने गैरजिम्मेवार र असक्षमता भएको बताए । उनले ज्ञान आर्जन गर्ने पाठ्यपुस्तक नै विद्यालयहरुमा समयमा दिन नसकेर सरकारले असक्षमता देखाएको बताए ।
मंगलबार प्रतिनिधि सभा अन्तर्गतको शिक्षा तथा स्वास्थ्य समितिको बैठकमा बोल्दै श्रेष्ठले सरकारले नीति तथा कार्यक्रम र बजेटबाट शिक्षालाई उच्च प्राथमिकता राखि गुणस्तरीय शिक्षा दिने कुरामा निरन्तर गरिरहेता पनि व्यवहारमा नभएको गुनासो गरे ।
उनले भने, ‘स्थानीय तहलाई विद्यालयको जिम्मेवारी दिएका छौं । ऐनको अभावले स्थानीय तहहरुले विद्यालयहरुलाई व्यवस्थित गर्न सकेका छैनन् । एउटा कार्यकाल स्थानीय तहका नेतृत्वले पूरा गरका छन् । नयाँ नेतृत्व आएको छ । त्यहाँ त्यही समस्या रहेको छ । शिक्षा ऐन बिना स्थानीय तहले व्यवस्थित बनाउन सक्दैनन् । सरकारले यो विषयमा उच्च प्राथमिकताका साथ काम गर्नु आवश्यक छ ।’
उनले फेरि भने, ‘विद्यालयमा पठनपाठन हुने समयमा सरकारले विद्यालयहरुमा विद्यार्थीहरुको हातहातमा पाठ्यपुस्तक पुर्याउन नसक्नु असाध्यै लजास्पद र गैर जिम्मेवारीपन स्थिति अरु केही हुन सक्दैन । राज्यले नै शिक्षालाई उच्च प्राथमिकता राख्ने कुरा, गुणस्तरीय शिक्षा दिने कुरामा निरन्तर गरिरहेका छौं । नीति तथा कार्यक्रम र बजेटबाट जोड दिएको छ । जुन शिक्षा आर्जन गर्ने पुस्तक नै सरकारले दिन सकेको छैन । यो जस्तो सरकारको असक्षमता र लजास्पद आवस्था केही हुन सक्दैन ।’
त्यस्तै उनले स्थानीय तहलाई माध्यमिक तहसम्मको विद्यालयको जिम्मेवारी दिएपनि शिक्षा ऐन नभएको कारण शिक्षामा गुणस्तर कम हुँदै गएको बताए ।