जापानमा बस्दै आएको परिवारको सात करोडको जग्गा किर्ते गरी ठगी गर्नेहरु पक्राउ

जापानमा बस्दै आएको परिवारको जग्गा किर्ते गरी ठगी गर्ने गिरोहलाई प्रहरीले पक्राउ गरेको छ । किर्तीपुर नगरपालिका २ मा रहेको शान्तिदेवी लोहनीको जग्गा किर्ते गरी ठगी गर्नेहरु पक्राउ परेका हुन् ।

प्रहरीको केन्द्रीय अनुसन्धान ब्युरोले ठगी कार्यमा संलग्न पाँच जनालाई पक्राउ गरी आज सार्वजनिक गरेको छ।

पक्राउ पर्नेमा दार्चुलाको साविक उकु गाविस–६ घर भइ हाल काठमाडौंको टोखा नगरपालिका– बस्ने वर्ष ५६ को महावीर चन्द (नक्कली तारानिधी लोहनी), सिन्धुपाल्चोकको थकनी गाविस–३, हाल मेलम्ची नगरपालिका–४ घर भई हाल ललितपुर सुनाकोटी बस्ने वर्ष ४१ को गणेश बहादुर खनाल छन् ।

त्यस्तैगरी सोलुखुम्बुको साविक नेले गाविस–४ हाल परिवर्तित थुलुङ दुधकोशी गाउँपालिका–१ घर भइ बूढानीलकण्ठ–२, भंगाल बस्ने वर्ष ४० को बाबुराम कार्की, नुवाकोटको साविक दाङसिङ गाविस–८ हाल परिवर्तित तारकेश्वर गाउँपालिका–१ घर भइ हाल काठमाडौं बनस्थली बोहराटार बस्ने वर्ष ४६ को प्रेम प्रसाद खनाल र काठमाडौंको साविक काभ्रेस्थली गाविस–२,घर भइ हाल बनस्थली बस्ने ममता भन्ने वर्ष ५८ की डासी माया श्रेष्ठ रहेका छन्।

प्रहरीका अनुसार सिन्धुपाल्चोकका खनाल र सोलुखुम्बुका कार्की यसका मुख्य योजनाकर्ता हुन् । उनीहरूले आर्थिक कारोबारको व्यवस्थापन गर्ने र मालपोतसँग समन्व्य गर्ने काम गर्दथे भने । प्रेम प्रसाद खनाल र माया श्रेष्ठ खरिद कर्ता खोज्ने विचौलिया हुन् ।

प्रहरीले उनीहरुबाट नक्कली नेपाली नागरिकताका प्रमाणपत्र थान–४, जग्गाधनी पुर्जा, लिखतको प्रतिलिपि, नक्कली तारानिधी लोहनीको नामको जग्गा धनी प्रमाण पुर्जाको प्रतिलिपी, अन्य व्यक्तिको नामको नक्कली जग्गाधनी पुर्जा, विभिन्न व्यक्तिको नाममा जारि भएका जग्गा धनी दर्ता श्रेस्ता लगायतका सामग्री बरामद गरेको छ।

पक्राउ परेको गिरोहले विभिन्न स्थानका अन्दाजी ४ विघाहा जग्गासमेत विभिन्न किर्ते कागजातहरुको आधारमा नक्कली कम्पनी तथा जग्गा धनीहरु समेत खडा गरी बिक्री तथा धितो बन्धक राखी विभिन्न व्यक्तिहरुलाई ठगी गर्ने तयारी गरेको पाइएको प्रहरीले जनाएको छ।

२०५५ सालदेखि जापानमा बस्दै आएकी शान्तिदेवी लोहनीको कीर्तिपुर नगरपालिका–२ मैत्रीनगरको ११ आना २ पैसा जग्गा उक्त गिरोहले नक्कली कागजपत्र बनाएर बिक्री गरेको भेटिएको सीआईबीका प्रवक्ता एसपी श्यामकुमार महतोले जानकारी दिए।

शान्तिदेवीको नक्कली मृत्युदर्ता प्रमाणपत्र बनाएर र नक्कली श्रीमान् खडा गरेर जग्गा बिक्री गरेको पाइएको महतोले बताए। नक्कली मृत्युदर्ता र नक्कली श्रीमान् बनाएर जग्गा बिक्री गरेको आरोपमा प्रहरीले महावीर चन्द, गणेशबहादुर खनाल, बाबुराम कार्की, प्रेमप्रसाद खनाल र ममता श्रेष्ठाई पक्राउ गरेको हो।

सीआईबीका अनुसार जग्गाधनी लोहनी नेपाल आएका बखत जेठ ५ गते मालपोत कार्यालयमा वायोमेट्रिक गर्न गएका बेला जग्गा बिक्रीको रहस्य खुलेको थियो । आफ्नो नाममा रहेको जग्गा बिक्री भएको देखिएपछि पीडित पक्षले प्रहरीलाई जानकारी दिएको थियो।

सीआईबीले घटनाबारे अनुसन्धान गर्दै जाँदा जग्गा बिक्रीमा संलग्नहरूलाई पक्राउन गर्न सफलता पाएको हो।