नेपाल आयल निगमले पेट्रोलियम पदार्थमा अचाक्ली मूल्यवृद्धि गरेपछि विराटनगरमा यातायात व्यावसायी र मजदुरले सोमबार बिहान चक्काजाम गरेका छन् ।
आइतबार रातिबाट निगमले डिजेल तथा मट्टीतेलमा प्रतिलिटर २७ रुपैयाँले र पेट्रोलमा प्रतिलिटर २१ रुपैयाँले मूल्य वृद्धि गरेको हो । सम्भवत नेपाली इतिहासमा प्रतिलिटर सबैभन्दा ठूलो मात्रामा मूल्य बढाइएको यो नै पहिलो घटना हो ।
निगमले आइतबार मध्यराती लागू गरेको नयाँ मूल्यसूची अनुसार पेट्रोलको मूल्य लिटरको १९९ रुपैयाँ पुगेको छ भने डिजेल र मट्टितेलको किन्न १९२ रुपैयाँ खर्च गर्नुपर्ने छ ।
मूल्य वृद्धिको विरोधमा सार्वजनिक सवारी यातायात मजदुर र सञ्चालकले कोसी राजमार्गको विराटनगरको राजवशी चोकमा सडक खण्डमा सवारी साधन राखेर यातायात अवरुद्ध गरेका हुन् ।