भारतीय सांस्कृतिक सम्बन्ध परिषद्का अध्यक्ष डा. विनय सहस्रबुद्धेले आज राष्ट्रपति, प्रधानमन्त्री र शिक्षामन्त्रीसँग शिष्टाचार भेट गरेका छन् ।
तीन दिने नेपाल भ्रमण रहेका सहस्रबुद्धेले दुई देशबीच सांस्कृतिक सम्बन्ध प्रवर्धन एवम् शैक्षिक आदानप्रदान सुदृढ गर्ने विषयमा छलफल गरेको बताइएको छ ।
अन्तर्राष्ट्रिय योग दिवस २०२२ को उपलक्ष्यमा पशुपतिनाथ मन्दिर परिसरमा आज बिहान आयोजित कार्यक्रममा पनि उनी सहभागी भएका थिए ।
पशुपति क्षेत्र विकास कोष र पतञ्जली योगपीठसँगको सहकार्यमा भारतीय दूतावास, काठमाडौं अन्तर्गतको स्वामी विवेकानन्द सांस्कृति केन्द्रले सो कार्यक्रमको आयोजना गरेको हो । कार्यक्रममा पतञ्जली योगपीठ, काठमाडौंका झण्डै १५० जना योग पारखीहरुको सहभागिता थियो ।
आइसीसीआर छात्रवृत्ति अन्तर्गत भारतमा अध्ययन गरेका नेपालीहरु सहित अन्य नेपाली विद्यार्थीहरुलाई जोड्ने ‘सम्पर्क भारत–नेपाल भूतपूर्व विद्यार्थी सञ्जाल’ का २०० भन्दा बढी सदस्यहरुसँग डा. सहस्रबुद्घेले छलफल गरेका छन् । राजधानीको मेरियट होटलमा आज दिँउसो भएको कार्यक्रमा उनले पूर्व विद्यार्थीहरुलाई सम्बोधन गर्दै नेपाल-भारत सम्बन्धलाई मजबुत बनाउन नेपाली विद्यार्थीहरुले निर्वाह गरेको महत्वपूर्ण भूमिकाबारे चर्चा गरे ।
भारत फर्कनुअघि काठमाडौं विश्वविद्यालय, लुम्बिनी बौद्ध विश्वविद्यालयका उपकुलपति र नेपाल तथा एसियाली अनुसन्धान केन्द्र (सिनास)का निर्देशक लगायत प्रमुख शिक्षाविद् र प्राज्ञहरुसँग भेट गर्ने कार्यक्रम रहेको छ ।
