भारत सरकारको अनुदान सहयोगमा निर्माण भएको एक विद्यालय भवन उद्घाटन गरिएको छ ।
सर्लाही जिल्लाको लालबन्दी नगरपालिका-१७, रानीगञ्जमा रहेको श्रीफौद सिंह जनता मावि को दुईतले भवनको उद्घाटन गरिएको हो । उक्त भवनमा पन्ध्र वटा कक्षा कोठा, दुईवटा सिँढी र सरसफाइ सुविधा रहेको छ ।
मधेस प्रदेशका सामाजिक विकास मन्त्री नवलकिशोर साह (सुडी) तथा भारतीय महावाणिज्यदूत श्री नितेश कुमारद्वारा संयुक्त रुपमा शनिबार उक्त भवनको उद्घाटन भएको हो ।
कार्यक्रममा स्थानीय जनप्रतिनिधि, पदाधिकारी, स्थानीयबासी तथा सरोकारवालाहरुको उपस्थिति रहेको थियो ।
उक्त परियोजना भारतको स्वतन्त्रताको ७५ वर्ष मनाउने “आजादी का अमृत महोत्सव” अन्तर्गत नेपालमा यस वर्ष उद्घाटन गरिने ७५ परियोजनाहरू मध्ये एक हो।
नयाँ विद्यालय भवनले ग्रामीण क्षेत्रमा शिक्षाको वातावरण सिर्जना गर्नुका साथै सर्लाही जिल्लामा शिक्षाको विकासमा टेवा पुर्याउने विश्वास लिइएको छ ।
सर्लाही जिल्लामा छिमेकी मित्रराष्ट्रको सहयोगमा २० आयोजनाहरू सञ्चालनमा छन्। यी बाहेक विभिन्न स्वास्थ्य चौकी/एनजीओहरुलाई ३१ वटा एम्बुलेन्स र सर्लाही जिल्लामा एउटा स्कुल बस अनुदानमा उपलव्ध गराइएको अधिकारीहरूले जनाएका छन्।