झापाको मेचीनगर नगरपालिका–११ घर भएकी १० वर्षीया बालिका अर्जुनधारा नगरपालिका–११ स्थित केही दिनअघि आफ्ना मितमामाको घरमा पाहुना गएकी थिइन्। तर मंगलबार साँझ ६ बजेदेखि एकाएक बेपत्ता भइन्।
मितभान्जी बेपत्ता भएपछि मितमामाको परिवार उनको खोजीमा भौतारियो। उनलाई खोजी गरिरहेका मामालाई राति ९ः४५ बजे सामाजिक सञ्जालमा फ्रेन्ड रिक्वेस्ट आयो । रिक्वेस्ट एसेप्ट हुनेबित्तिकै मेचीनगर नगरपालिका–१३ चारआलीमा तपाईंकी भान्जी भेटिएको भन्दै म्यासेज आयो।
पटक पटक तपाइको नम्वर दिनु लोकेसन दिनु भन्दा आनकानी गर्दै दिएपछि स्थानीय सहित आफुहरु सो ठाउँमा पुगेको पिडितका मामाले बताए ।
मोटरसाइकलमा भान्जीलाई लिन त्यतातिर हुँइकिए। साढे ११ बजे भान्जी घर ल्याएपछि ती बालिकाले आफूलाई ‘अपहरण’ गरेर बलात्कार भएको घटना सुनाएकी थिइन्। सो स्थानमा हाल पक्राउ पर्ने ब्यक्ति सहित अन्य ५ जना समेत रहेको बताइएको छ ।
‘मंगलबार साँझ एक जनाले मोटरसाइकलमा आफूसहित तीन बालिकालाई चढाएर लगेको भनेकी छन्,’ अर्जुनधारा–११ का वडाध्यक्ष खगेन्द्र इङनामले केटिएम दैनिकसँग भने, ‘अर्जुनधारास्थित कोठामा लगेर तीनै बालिकासँग उनले अनैतिक सम्बन्ध राखेको भनेकी छन्। पछि भागेर उनी राति साढे ९ बजेतिर मेचीनगर–१३ चारआलीस्थित झिल जाने बाटोमा रहेको एउटा पुगेकी रहेछिन्।’
उनका अनुसार ती बालिकाले सो घरमा पुगेर खाना खाएकी थिइन्। ‘त्यो घरमा पुगेर उनले आमा भोक लाग्यो खाना छ भने दिनुस् न भनेकी रहिछन्,’ उनले थपे, ‘दही–भात र मूलाको अचार खाएको बताउँछिन्। करणीपछि उनलाई मानसिक रूपमा समस्या देखिएको छ, पटक–पटक खानाकै विषय दोहोर्याउँछिन्।’
भात खाइसकेपछि सोही घरका छोराले मामाको नाम सोधेर फेसबुकमा फ्रेन्ड रिक्वेस्ट पठाएको र भान्जी राति एक्लै आफ्नो घर आइपुगेको बताएका थिए। पछि मामाले आफ्नो घर ल्याएपछि मोटरसाइकलमा लगेका पुरुषले पैसामाथि लागुऔषध राखेर सेवन गरेको र आफूसहित तीनै जनामाथि बलात्कार गरेको खुलाएकी थिइन्।
ती बालिकाले गाउँकै एक जनालाई नामै तोकेर आरोप लगाएका कारण प्रहरीले पक्राउ गरेको वडाध्यक्ष इङनामले बताए। ‘हुलिया बताउँदै नाम तोकेपछि एक जना पक्राउ परेका छन् तर पक्राउ पर्ने गाउँकै एकदमै सोझा व्यक्ति हुन्,’ उनले भने।
झापा प्रहरी प्रवक्ता डिएसपी वसन्त पाठकका अनुसार पक्राउ पर्नेमा अर्जुनधारा नगरपालिका–११ का २८ वर्षीय विपिन राई रहेका छन्। उनलाई बुधबार प्रहरीले पक्राउ गरेर अनुसन्धान थालेको छ।
‘मंगलबार राति जबरजस्ती करणी गरेको भन्दै उजुरी परेपछि हामीले बुधबार उनलाई पक्राउ गरेका हौँ,’ उनले भने, ‘दुवै जनाको मेची अस्पतालमा स्वास्थ्य परीक्षण भएको छ। अरू विषयमा अनुसन्धान भइरहेको छ।’
मुलुकी अपराध सहिंताको दफा २२५ बमोजिम बालयौन दुरुपयोग सम्बन्धी कसुरमा ३ बर्ष कैद र ३० हजार रुपैया जरिवाना सजाय हुने कानूनी व्यवस्था रहेको छ । यस अघि पनि मेचीनगर १० की ९ बर्षीया बालिकामाथि यौन दुर्व्यवहार गरेको आरोपमा जेठ २ गते धुलाबारीका एक व्यक्ति पक्राउ परेका थिए ।