त्रिभुवन विश्वविद्यालय अन्तर्गतको काडमाडौँ बागबजारस्थित पद्मकन्या बहुमुखी क्याम्पसको व्याचलर अफ विजनेश म्यानेजम्यान्ट बीबीएम इयर २०२२ को मिस फ्रेसर अनुसा श्रेष्ठ बन्न सफल भएकी छन् ।
यस्तै ‘फस्ट रनरअप’ लिजा चौधरी र ‘सकेण्ड रनरअप’ पुस्तिका भण्डारी हुन सफल भएका छन् । काभ्रेको धुलिखेलमा आयोजित फ्रेसर कार्यक्रममा १४ जना सहभागि विद्यार्थीमध्ये उनीहरुले ती उपाधिहरु हात पार्न सफल भएका हुन् ।
मिस प्रेसर बन्न सफल भएकी श्रेष्ठले आफूले यो उपाधि जितेसँगै आफ्नो आत्मविश्वास बढेको प्रतिक्रिया दिएकी थिइन् । ‘आफूमा कति क्षमता रहेछ, के के गर्न सक्ने रहेछु भन्ने ज्ञान यो कार्यक्रमबाट लिएँ । मिस फ्रेसरमा छानिएपछि मेरो आत्मविश्वास बढेको अनुभव गरेको छु ।
साथै अब आउने बहिनीहरु र कलेजका लागि सकारात्मक योगदान पुर्याउन सक्छु भन्ने लागेको छ,’ श्रेष्ठले भनिन् । यस्तै ‘फस्ट रनरअप’ भएकी चौधरीले पनि आफूले यस्तो उपाधी हात पार्दा निकै उत्साहित भएको सुनाइन् । उनले भनिन्,‘हामीले लगनशिलताका साथ मेहेनत गरेको खण्डमा जित सम्भव छ भन्ने पाठ मैले कार्यक्रमबाट सिकेको छु ।
मेरो प्रतिभाको कदर भएकोमा खुशी पनि उत्तिकै छु।’ यस्तै ‘सेकेण्ड रनरअप’ भएकी भण्डारीले पाठनपाठनसँगै आयोजना हुने यस्ता अतिरिक्त क्रियाकलपाले आफूहरुमा भएका कमीकमजोरी सुधार गर्ने र आफ्ना प्रतिभाहरु चिन्ने मौका मिल्ने बताइन् ।
यो कार्यक्रमले आगामी दिनमा ठूला प्रतियोगितामा पनि भाग लिनका निम्ती आत्मविश्वास बढाएको उनले आफ्नो अनुभव सुनाइन् । भण्डारीले ट्यालन्टतर्फ पनि उपाधी हाँसिल गर्न सफल भएकी थिइन् । उनले नेपालमा महिलामाथि बढ्दो बलात्कार र त्यसले पार्नेमा केन्द्रीत भएर लेखेको कविता नाटकद्धारा प्रस्तुत गरेकी थिइन् । उपाधी जित्ने तीनै जनाले बलात्कार रोक्न आफूहरुले भूमिका खेल्ने साझा प्रतिवद्धता जनाएका थिए ।
कार्यक्रममा पद्मकन्या क्याम्पस, पत्रकारिता विभागकी लेक्चरर एवं पत्रकार दिपा दाहाल, डाक्टर अल्बिना क्षेत्री, किङ्स कलेजका प्रोगाम कोर्डिनेटर मिलन चौधरी जजको जिम्मेवारीमा थिए । उनीहरुले समसामयीक विषयमा केन्द्रीत भएर अधिकांश प्रश्नहरु सहभागिलाई सोधेका थिए ।
पद्मकन्या क्याम्पसले यो कार्यक्रम वर्षेनी गर्दै आएको छ । कार्यक्रम निर्देशक अग्नीधर पराजुलीले यो कार्यक्रमले विद्यार्थीको क्षमताबारे शिक्षकलाई थाहा पाउने मौका दिने, विद्यार्थीको आत्मविश्वास बढाउने, उनीहरुले नयाँ कुरा सिक्ने अवसर दिने, विद्यार्थीलाई थप अन्य कार्यक्रममा भाग लिन प्रेरित गर्ने भएकाले यो कार्यक्रम क्याम्पसले निरन्तर गर्दै आएको बताए ।
‘यो पुरै कार्यक्रमको जिम्मा हामीले यसअघिको व्याचलाई दिन्छौँ । उनीहरुले निकै मेहेनतका साथ कार्यक्रम आयोजना गर्छन् र सफल पनि हुँदै आएका छन्,’ उनले भने । कार्यक्रममा यसअघि आयोजित प्रेसर कार्यक्रममा जितेको उपाधि नयाँलाई हस्तारण गर्ने अभ्यास छ ।
कार्यक्रम वर्षेनी फरक फरक ठाउँमा हुँदै आएको छ । यो कार्यक्रमका लागि अघिल्लो सेमेस्टरका विद्यार्थीले पहिलो सेमेस्टरका विद्यार्थीलाई करिव २ साता तालिम दिने गर्छन् । धुलिखेलमा आयोजित कार्यक्रमको बीचबीचमा अन्य विद्यार्थीले पनि आफ्ना प्रतिभाहरु प्रस्तुत गरेका थिए । बीबीएम फस्ट सेमेस्टका विद्यार्थीलाई सकेन्ड समेस्टरका विद्यार्थीले स्वागत गर्नका निम्ती पनि यो कार्यक्रम गर्दै आएका छन् ।