निर्वाचन सम्पन्न भएका ७५२ स्थानीय तहको नतिजा केलाउने हो भने ३९० स्थानीय तहको प्रमुख र उपप्रमुख दुवै पदमा एउटै दलका उम्मेदवारहरू निर्वाचित भएका छन् ।
हामीले प्रमुख र उपप्रमुखमा निर्वाचित भएका उम्मेदवारहरूको विभिन्न कोणबाट तथ्याङ्क केलाउने प्रयास गरेका छौँ ।
यो तथ्याङ्कगत विश्लेषणात्मक रिपोर्टबाट पाठकहरूले निम्न प्रश्नको उत्तर पाउनुहुनेछ ।
१) कुनै एक राजनैतिक दलबाट प्रमुख पदमा निर्वाचित भएका पालिकाहरूमा उपप्रमुख पनि सोही दलबाट निर्वाचित भए त ? भए भने कति भए, भएनन् भने कुन दल प्रमुख पदमा मात्र रहे ?
२) कुनै पालिकामा दुवै पदमा एउटै दल र एउटै लिङ्ग (पुरुषमात्र) वा (महिलामात्र) निर्वाचित भए त ? छन् भने ती पालिका र उम्मेदवार कुन कुन हुन् ।
३) नेकपा एमालेबाट प्रमुख पद र एकीकृत समाजवादीले सोही पालिकाको उपप्रमुख जितेको अवस्था छ कि छैन ? अथवा एकीकृतले प्रमुख र एमाले उपप्रमुखमा विजयी भएका स्थानीय तह छन् कि छैनन् । छन् भने कुन कुन हुन् ।
४) कुनै पालिकामा विजयी भएका प्रमुख र उपप्रमुखको मत समान छ त ?
५) एउटै दलबाट प्रमुख र उपप्रमुखमा निर्वाचित भएका पालिकाहरूमा उपप्रमुख पदमा महिला उम्मेदवारहरूले पुरुषले भन्दा बढी मत पाएका छन् त ?
सत्ता गठबन्धनमा रहेका दलहरूको चुनावी तालमेलले गर्दा धेरै स्थानहरूमा एक दललाई प्रमुख र अर्को दललाई उपप्रमुख भागबन्डा गरिएको भनिए तापनि तथ्याङ्कले उक्त कुरालाई पुष्टि गर्दैन । ५१.८६ प्रतिशत पालिका प्रमुख र उपप्रमुख एउटै दलबाट निर्वाचित भएकाले प्रमुख र उपप्रमुख पदमा भागबन्डा भयो भन्ने कुरा पुष्टि नभएको हो ।
माथि दोस्रो प्रश्नमा उत्तर खोज्न हामीले एउटै दलबाट प्रमुख र उपप्रमुख पदमा पुरुष मात्रै वा महिला मात्रै निर्वाचित छन् कि छैनन् भनेर पनि हेरेका छौँ । यसरी हेर्दा ७५२ स्थानीय तहमध्ये जम्मा दुई वटा स्थानीय तहमा एउटै दलबाट एउटै लिङ्गका उम्मेदवारहरू विजयी भएको पाइयो ।
सर्लाहीको बलरा नगरपालिकामा माओवादी केन्द्रबाट प्रमुखमा रामा शङ्कर प्रसाद कुशवाह र उपप्रमुखमा सोही पार्टीका कोशिला देवी निर्वाचित भए । उपप्रमुखको नाम झट्ट सुन्दा वा हेर्दा महिला जस्तो देखिएपनि निर्वाचन आयोगको विवरणले ती व्यक्ति पुरुष भएको देखाउँछ ।
थप अपडेट : कुनै पनि पालिकाको प्रमुख र उपप्रमुख एउटै दलबाट पुरुषमात्रै हुन सक्दैनन् । किनभने स्थानीय तह निर्वाचन ऐन, २०७३ को दफा १७ (४) का अनुसार राजनीतिक दलले उम्मेदवारी मनोनयन दर्ता गर्दा गाउँपालिका अध्यक्ष र उपाध्यक्ष, नगरपालिका प्रमुख र उपप्रमुख तथा जिल्ला समन्वय समिति प्रमुख र उपप्रमुखमध्ये ५० प्रतिशत महिला उम्मेदवार रहने गरी मनोनयन पत्र पेस गर्ने व्यवस्था मिलाउनु पर्छ । एउटै दलबाट प्रमुख र उपप्रमुख पुरुष हुने कानुनी व्यवस्था छैन । निर्वाचन आयोगका प्रवक्ता शालिग्राम शर्मा पौडेललाई हामीले यसबारे जानकारी गराएपछि उनले निर्वाचन आयोगको वेवसाइटमा पुरुष भनेर उल्लेख भएकी कोशिला देवीको लिङ्ग महिला राखेर त्रुटी सच्चाएका छन् ।
त्यस्तै दैलेखको भैरवी गाउँपालिकामा नेपाली कांग्रेसबाट अध्यक्षमा रिता कुमारी शाही र उपाध्यक्षमा देवी भण्डारी निर्वाचित भए ।
लैङ्गिक हिसावबले हेर्दा १६५ स्थानीय तहको प्रमुख र उपप्रमुखमा पुरुषहरू निर्वाचित भएको समाचार यसअगाडि नै प्रकाशित भैसकेको छ भने २५ स्थानीय तहमा महिला नेतृ शीर्षकमा महिलाहरू प्रमुख पदमा निर्वाचित भएको समाचार पनि केटिएम दैनिकमा प्रकाशित भएको छ ।
फरक राजनैतिक दलबाट भएता पनि दुवै पदमा महिला निर्वाचित भएका छन् कि छैनन् भनेर हेर्ने हो भने तीन वटा पालिकाको दुवै पदमा महिलाहरू निर्वाचित भएका छन् ।
झापाको गौरीगंज गाउँपालिकाको अध्यक्षमा नेपाली कांग्रेसबाट फुलवति राजवंशी र उपाध्यक्षमा नेकपा एमालेबाट पुजन न्यौपाने (कुँवर), दैलेखको भैरवी गाउँपालिकाको बारेमा माथि नै उल्लेख भइसक्यो, त्यस्तै कैलालीको लम्कीचुहा नगरपालिकाको प्रमुख पदमा नेपाली कांग्रेसबाट सुशिला शाही र उपप्रमुखमा एमालेबाट जुना चौधरी निर्वाचित भएका छन् ।
अब लागौं पहिलो प्रश्नको उत्तर खोज्नतर्फ, मुख्य विषयमा प्रवेश गर्नुअगाडि कुन राजनैतिक दलबाट प्रमुख पदमा कति जना निर्वाचित भए भन्नेबारेमा बुझ्नुपर्ने हुन्छ । स्वतन्त्रसहित १५ राजनैतिक दलहरूका उम्मेदवारहरूले स्थानीय तहको प्रमुख पदमा जित निकालेका छन् ।
नेपाली कांग्रेसले जितेको ३२९ स्थानीय तहमध्ये १६३ वटामा सोही पार्टीले उपप्रमुख पद जित्यो, बाँकी स्थानीय तहको उपप्रमुखमा एमालेले ७६, माओवादी केन्द्रले ६९, एकीकृत समाजवादीले ११, जसपा नेपालले ५, राष्ट्रिय जनमोर्चाले ३ र राप्रपाले १ पालिकाको उपप्रमुख जिते ।
त्यस्तैगरी नेकपा एमालेले जितेका २०५ स्थानीय तहमध्ये १४३ मा उपप्रमुख पनि निर्वाचित भए । उक्त पार्टीले प्रमुख पद जितेका अन्य पालिकाहरूमा नेपाली काग्रेसले ४२, माओवादी केन्द्रले ११, जसपाले ५, स्वतन्त्रले ३ र राप्रपाले १ पालिकाको उपप्रमुख पदमा जित निकाले ।
माओवादी केन्द्रले जितेका १२१ स्थानीय तहमध्ये ४१ वटामा मात्र उपप्रमुख निर्वाचित भए । बाँकी ८० पालिकाको उपप्रमुखमा नेपाली कांग्रेसबाट ६१, नेकपा एमालेबा६ १३, एकीकृत समाजवादीबाट ५ र जसपा नेपालबाट १ जना निर्वाचित भए ।
त्यस्तैगरी जनता समाजवादी पार्टी, नेपालले जितेका ३० स्थानीय तहमध्ये १८ वटामा सोही पार्टीबाट उपप्रमुख पनि विजयी भए । बाँकी १२ पालिकामा नेपाली कांग्रेसबाट १०, नेकपा एमाले र राप्रपाबाट समान १/१ जना उपप्रमुखमा निर्वाचित भए ।
नेकपा एकीकृत समाजवादीले प्रमुख पद जितेको २० पालिकामध्ये ५ वटाको उपप्रमुख पनि सोही पार्टीबाट निर्वाचित भए बाँकी रहेका १५ पालिकामध्येमा नेपाली कांग्रेसबाट १२, नेकपा एमालेबाट २, र माओवादी केन्द्रबाट १ जना विजयी भए ।
लोकतान्त्रिक समाजवादी पार्टीले जितेको १६ पालिकामध्ये ११ पालिकामा सोही दलबाट उपप्रमुख पनि विजयी हुँदा बाँकी पालिकामा माओवादी केन्द्र र नेपाली कांग्रेसबाट समान २/२ र नेकपा एमालेबाट एक जना निर्वाचित भए । यस पार्टीले मधेश र लुम्बिनी प्रदेशमा मात्र जित निकालेको हो ।
त्यस्तैगरी नागरिक उन्मुक्ति पार्टीबाट ४ स्थानीय तहको प्रमुख निर्वाचित हुँदा ३ वटामा सोही पार्टीबाट उपप्रमुख समेत विजयी भए ।
राष्ट्रिय प्रजातन्त्र पार्टी (राप्रपा) ले चार पालिका प्रमुख जित्दा तीमध्ये झापाको हल्दीवारी गाउँपालिकाको उपाध्यक्ष पद पनि जित्यो ।
सिके राउत नेतृत्वको जनमत पार्टी (जपा) का उम्मेदवार दुई पालिकाको प्रमुख पदमा निर्वाचित हुँदा एक पालिकाको उपप्रमुख पनि जिते । सप्तरी जिल्लाको वलान-विहुल गाउँपालिकाको अध्यक्ष र उपाध्यक्ष दुवै पदमा उक्त पार्टीका उम्मेदवार विजयी भएका हुन् ।
जनता प्रगतिशिल पार्टीले रुपन्देही जिल्लाको मर्चवारी गाउँपालिकाको अध्यक्ष र उपाध्यक्ष, नेपाल मजदुर किसान पार्टीले भक्तपुरको भक्तपुर नगरपालिकाको प्रमुख र उपप्रमुख, विवेकशील साझा पार्टीले बारा जिल्लाको फेटा गाउँपालिकाको अध्यक्ष र उपाध्यक्ष पद जितेका हुन् । यी पार्टीले यहाँ उल्लेख गरेबाहेक अन्य स्थानीय तहको प्रमुख पदमा जित निकाल्न सकेनन् ।
स्वतन्त्रबाट प्रमुख पदमा १३ जना निर्वाचित भएता पनि उपप्रमुख पदमा महोत्तरी जिल्लाको बर्दिबास नगरपालिकामा तारा देवी निर्वाचित भइन् । यीबाहेक स्वतन्त्रले जितेका १२ पालिकामा विभिन्न दलका उम्मेदवारहरु उपप्रमुख पदमा निर्वाचित भए ।
अब हेरौं माथि उल्लेख गरिएको तेस्रो प्रश्नको उत्तर । एमालेले प्रमुख पद जितेका कुनै पनि पालिकामा सोही दलबाट छुट्टिएर बनेको नेकपा एकीकृत समाजवादीले उप्रप्रमुख पद जितेको छैन । तर एकीकृत समाजवादीले जितेको दुई स्थानीय तहको उपप्रमुखमा भने एमालेका उम्मेदवार विजयी भएका छन् ।
दुई दलबीच निकै तिक्तदा भएता पनि पोखरा महानगर र डोल्पाको छार्का ताङसोङ गाउँपालिकामा एकीकृत समाजवादीका प्रमुख र एमालेका उपप्रमुख मिलेर आउँदो पाँच वर्ष बिताउनुपर्ने देखिएको छ ।
कुन पालिकामा सोही दलबाट उम्मेदवारी दिएका प्रमुख र उपप्रमुखले समान मत ल्याएका छन् त ? चौथो नम्बरमा उल्लेख गरिएको यस प्रश्नको उत्तर खोज्दा एउटै दलबाट उम्मेदवारी दिएका प्रमुख र उपप्रमुखले समान मत ल्याएको भेटियो ।
धनुषाको कमला नगरपालिकामा नेपाली कांग्रेसबाट प्रमुख पदमा उम्मेदवारी दिएका विशेश्वर यादव र सोही दलबाट उपप्रमुखमा उम्मेदवारी दिएकी शिला देवी मण्डलले समान भोट पाए । उनीहरू दुवैले ३,८८७ मत पाएका हुन् ।
त्यस्तैगरी रोल्पाको थवाङ गाउँपालिकाको अध्यक्ष र उपाध्यक्षले पनि समान मत पाएका छन् । माओवादी केन्द्रबाट सो पालिकाको अध्यक्षमा विजयी भएका ऋषि केशव बुढामगर र उपाध्यक्षमा विजयी भएकी सर्मीला बुढामगरले समान २,१२२ मत पाएका हुन् ।
नेकपा एमालेका पालिका प्रमुख र उपप्रमुख पनि समान मत पाएर विजयी भएका छन् । बझाङ्गको साइपाल गाउँपालिकाका अध्यक्ष मानविर बोहरा र उपाध्यक्ष डोल्मा तामाङ्गले समान ६७५ मत पाएका हुन् ।
डोल्पाको काईके गाउँपालिकामा अध्यक्ष र उपाध्यक्षको चुनाव नै गर्नुपरेन उक्त पालिकाको अध्यक्षमा एकीकृत समाजवादीका अंगद कुमार राना निर्विरोध हुँदा उपाध्यक्षमा नेपाली कांग्रेसकी निमा बुढा निर्विरोध भईन् ।
अब लागौं प्रश्न पाँच को उत्तर खोज्न । उक्त प्रश्न थियो एउटै दलबाट वा चुनावी गठबन्धनबाट प्रमुख र उपप्रमुखमा निर्वाचित भएका पालिकाहरूमा उपप्रमुखमा महिला उम्मेदवारहरूले पुरुषले भन्दा बढी मत पाएका छन् त ?
एउटै दलबाट पालिका प्रमुख र उपप्रमुखमा विजयी भएकाहरूमा उपप्रमुख पदका ११३ जना महिलाहरूले प्रमुख पदका पुरुष उम्मेदवार भन्दा बढी मत ल्याएका छन् । दलगत रूपमा हेर्ने हो भने नेपाली काँग्रेसका ४९ एमालेका ४० माओवादी केन्द्रका १७ जसपाका ३ लोसपाका २ नेकपा एकीकृत समाजवादी र नेमकिपाका १/१ जनाले उपप्रमुख पदमा सोही दलका प्रमुख पदका उम्मेदवार भन्दा बढी भोट ल्याएका हुन् ।
धेरै मतान्तर कायम गर्नेमा पहिलो नम्बरमा छिन् रौतहटको चन्द्रपुर नगरपालिकाको उपप्रमुख जयमाला कुमारी चौधरी । उनले नेपाली कांग्रेसबाट सोही पालिकाको प्रमुख पदमा विजयी भएका सञ्जय कुमार काफ्ले भन्दा २,२१५ बढी मत पाइन । काफ्ले ९,१६३ मत ल्याएर निर्वाचित हुँदा नेपाली कांग्रेसकी चौधरीले ११, ३७८ मत पाएकी हुन् ।
त्यस्तै १ हजारदेखि १५०० बढी मत प्राप्त गर्ने महिलाहरूको सङ्ख्या तीन छ भने, ८ जनाले ५०० देखि १००० मतान्तर कायम गरेका छन् । प्रमुख पदका पुरुष उम्मेदवार भन्दा उपप्रमुख पदका ५८ महिला उम्मेदवारहरूले १०० देखि ५०० बढी मत ल्याएर विजयी भए । प्रमुखले भन्दा १ देखि १०० भोट बढी ल्याउने उपप्रमुख पदका महिला उम्मेदवारको सङ्ख्या ४३ छ । रामेछाप जिल्लाको रामेछाप नगरपालिका उपप्रमुख बाल कुमारी कार्की थापाले ६,६४० मत ल्याउँदा सोही पालिकाको प्रमुख पदमा लवश्री न्यौपानेले ६,६३९ मत पाए । यी दुवै नेपाली काँग्रेस उम्मेदवार हुन् ।
एउटै पार्टीबाट पालिका प्रमुख भन्दा भन्दा बढी भोट पाएर विजयी भएका महिला उपप्रमुखहरू
दुवै पदमा फरक दलका उम्मेदवार हुँदा उपप्रमुख पदमा विजयी भएका ४६ महिलाहरूले प्रमुख पदका पुरुष उम्मेदवार भन्दा बढी मत पाएका छन् । सबैभन्दा बढी मतान्तर कायम गर्नेमा काठमाडौँ महानगरकी उपमेयर सुनिता डंगोल हुन् । उनले स्वतन्त्र उम्मेदवार बालेन शाह भन्दा ६,८४५ मत ल्याइन् ।
त्यस्तै सबैभन्दा कम मतान्तर कायम गर्ने फरक दलका महिला उम्मेदवारहरूमा मनाङको चामे गाउँपालिकाकी उपाध्यक्ष मिङमार ढोमा लामा र डोटीको बोगटान फुड्सिल गाउँपालिका उपाध्यक्ष विष्ना देवी बम हुन् । दुवैले पालिका अध्यक्ष भन्दा ५ भोट बढी ल्याएका छन् ।
माथिका पाँच वटै प्रश्नको उत्तर पाएपछि अब लागौं प्रदेशगत विवरणतर्फ।
प्रदेश १
प्रदेश १ मा एक महानगरपालिका दुई उपमहानगरपालिका ४६ नगरपालिका र ८८ गाउँपालिका गरी कूल १३७ वटा स्थानीय तह छन् ।
उक्त प्रदेशमा स्वतन्त्रसहित ७ वटा राजनैतिक दलका उम्मेदवारहरू प्रमुख पदमा निर्वाचित भएकोमा सोही पालिकाको उपप्रमुख पदमा भने चार वटा दलका उम्मेदवार मात्र निर्वाचित भए ।
प्रदेश १ मा काँग्रेसले ६९ पालिका प्रमुख जित्दा तीमध्ये २२ वटामा उपप्रमुख पनि जित्यो । एमालेले जितेका ४७ पालिकामध्ये ३६ वटा पालिकामा उपप्रमुख पनि विजयी भए । माओवादी केन्द्रले १२ वटा पालिका जितेकोमा जम्मा २ वटा पालिकाको उपप्रमुख पद जित्न सफल भयो । उक्त पार्टीबाट भोजपुरको आमचोक गाउँपालिकाको अध्यक्षमा अशोक राई र उपाध्यक्षमा सीता राई, सोलुखुम्बुको थुलुङ दुधकोशी गाउँपालिकाको अध्यक्षमा अशिम राई र उपाध्यक्षमा सविता राई निर्वाचित भएका हुन् ।
राप्रपाले प्रदेश १ मा झापाको दमक नगरपालिका प्रमुख र हल्दीवारी गाउँपालिकाको प्रमुख र उपप्रमुख जित्न सफल भएको हो ।
मधेस प्रदेश
आठ जिल्ला समेटेर बनेको मधेस प्रदेशमा एक महानगर तीन उपमहानगर ७३ नगरपालिका र ५९ गाउँपालिका गरी कुल १३६ स्थानीय तह छन् । वैशाख ३० गते भएको निर्वाचनबाट स्वतन्त्रसहित १० वटा राजनैतिक दलका उम्मेदवारहरु प्रमुख पदमा निर्वाचित भए । तीमध्ये तराइ- मधेस लोकतान्त्रिक पार्टी (तमलोपा), बाहेक स्वतन्त्रसहित नौ राजनैतिक दलले प्रमुख पद जितेका पालिकाको उपप्रमुख पदमा आफ्ना उम्मेदवार विजयी गराउन सफल भए ।
मधेस प्रदेशमा एउटै पार्टीबाट दुवै पदमा निर्वाचित हुने स्थानीय तहको सङ्ख्या १०० छ । यीमध्ये कांग्रेसबाट ३९, एमालेबाट २१, जसपा बाट १६, लोसपाबाट १०, माओवादी केन्द्रबाट ६, नेकपा एकीकृत समाजवादीबाट ५, जनमत पार्टी (जपा), विवेकशील साझा र स्वतन्त्रबाट १/१ पालिकाका दुवै पदमा ती दलका उम्मेदवार विजयी भए ।
बागमती प्रदेश
बागमती प्रदेशका ११९ स्थानीय तहमा एक स्वतन्त्रसहित सात वटा राजनैतिक दलका उम्मेदवारहरू प्रमुख पदमा निर्वाचित भए । ती दलहरूमध्ये चार वटा दलले मात्र सोही पालिकाको उपप्रमुख पद जित्न सके । बागमती प्रदेशमा प्रमुख पदमा मात्र जित निकाल्ने दलहरूमा नेकपा एकीकृत समाजवादी, राप्रपा र स्वतन्त्र छन् ।
५८ पालिकाको प्रमुख पद जितेको काँग्रेसले तीमध्ये १७ पालिकाको उपप्रमुख पनि जित्यो भने २६ पालिकाको प्रमुख पद जितेको एमालेले तीमध्ये १४ पालिकाको उपप्रमुखमा आफ्ना उम्मेदवार विजयी गराउन सफल भयो ।
त्यस्तैगरी २७ पालिका प्रमुख जितेको माओवादी केन्द्रबाट ४ वटा पालिकामा मात्र उपप्रमुख निर्वाचित भए । अन्य २३ पालिकामा माओवादीका उम्मेदवारसँग अन्य दलका उम्मेदवारले अबको पाँच वर्ष सहकार्य गर्नुपर्ने देखिन्छ । नेमकिपाले देशभरमा एउटा मात्र पालिकाको प्रमुख र उपप्रमुख पद जितेको छ । उक्त पार्टीले भक्तपुरको भक्तपुर नगरपालिकाको दुवै पद जित्न सफल भएको हो ।
गण्डकी प्रदेश
गण्डकी प्रदेशमा ८५ स्थानीय तह छन् । एक महानगर २६ नगरपालिका र ५८ गाउँपालिका रहेको यस प्रदेशमा राष्ट्रिय जनमोर्चासहित पाँच राजनैतिक दलका उम्मेदवार प्रमुख पदमा विजयी भएका छन् तर तीनै पालिकामा भने एकीकृत समाजवादी र राष्ट्रिय जनमोर्चाले उपप्रमुख पदमा अन्य दलका उम्मेदवारहरूसँग सहकार्य गर्नुपर्ने भएको छ ।
काँग्रेसले जितेको ३६ पालिकामध्ये १७ वटामा सोही दलबाट उपप्रमुख विजयी हुँदा एमालेले जितेका ३५ मध्ये २५ पालिकामा आफ्नै दलका उम्मेदवार विजयी भए । त्यस्तै माओवादी केन्द्रबाट विजयी भएका ११ पालिकामध्येमा ७ पालिकमा सोही दलका उम्मेदवार उपप्रमुख भए ।
लुम्बिनी प्रदेश
चार उपमहानगर ३२ नगरपालिका र ७३ गाउँपालिकासहित १०९ स्थानीय तह रहेको लुम्बिनी प्रदेशमा नेपाली काँग्रेसले ४८, एमालेले २6, माओवादी केन्द्रले २५, जसपाले ३, लोसपा र राष्ट्रिय जनमोर्चाले समान २/२, जनता प्रगतिशिल पार्टी, नेपाल र राप्रपाले १/१ पालिकाको प्रमुख पदमा जित निकाले ।
तिनै पार्टीबाट जितेका पालिकामा उपप्रमुखमा भने कांग्रेसबाट ३०, एमालेबाट २३, माओवादीबाट १०, जसपा बाट तीनमध्ये दुई, लोसपाबाट दुईमध्ये एक, प्रगतिशिल पार्टी, नेपालबाट सोही पालिकाको उपप्रमुख पद जित्दा राप्रपा र राष्ट्रिय जनमोर्चाले भने आफूले प्रमुख स्थान जितेका पालिकामा उपप्रमुख जित्न सकेनन् ।
कर्णाली प्रदेश
महानगर र उपमहानगर नभएको कर्णाली प्रदेशमा २५ नगरपालिका र ५४ गाउँपालिका गरी ७९ वटा स्थानीय तह छन् । ती स्थानीय तहमध्येमा पाँच स्थानीय तहमा स्वतन्त्र उम्मेदवार विजयी भए भने एकीकृत समाजवादीले चार स्थानीय तहको प्रमुख पदमा जित निकाल्यो। तीमध्ये दुई जना निर्विरोध चयन भएका हुन् ।
नेपाली कांग्रेसले कर्णालीमा जितेको ३२ स्थानीय तहमध्ये १३ वटामा उपप्रमुख पनि जित्यो भने एमालेका उम्मेदवार निर्वाचित भएका १५ वटा पालिका मध्ये ११ वटामा उपप्रमुख पनि विजयी भए । एकीकृत समाजवादी र स्वतन्त्र उम्मेदवारले जुन पालिका जितेका हुन् ती पालिकामा सोही दलबाट उपप्रमुख उम्मेदवार विजयी हुन सकेनन् ।
सुदूरपश्चिम प्रदेश
एक उपमहानगर ३३ नगरपालिका र ५४ गाउँपालिका सहित ८८ स्थानीय तह रहेको यस प्रदेशमा बाजुराको बुढीगंगा गाउँपालिकामा पुन निर्वाचन हुने भएको छ । नतिजा आएका ८७ स्थानीय तहमध्ये दुई पालिकाको प्रमुख पदमा स्वतन्त्र उम्मेदवार सहित पाँचवटा राजनैतिक दलका उम्मेदवार विजयी भएका छन् ।
एकीकृत समाजवादी र स्वतन्त्र उम्मेदवारले प्रमुख पद जितेको स्थानमा उपप्रमुख जित्न सकेनन् भने अन्य दलले आफूले जितेका पालिकामा उपप्रमुख पनि जित्न सफल भए ।
काँग्रेसले ४० स्थानीय तहको प्रमुख पद जित्दा तीमध्ये २५ वटामा उपप्रमुख, एमालेलेले जितेका २५ स्थानीय तहमध्ये १३ वटामा उपप्रमुख, माओवादी केन्द्रले जितेका १४ स्थानीय तहमध्येमा एक पालिकामा उपप्रमुख जित्न सफल भयो ।
३९० जनाको विस्तृत विवरण
