पोखराबाट मुस्ताङका लागि आइतबार बिहान उडेको तारा एयरको ट्विनअटर ९–एनएइटी विमानमा थियो, धनुषाको मिथिला नगरपालिका–११ लोटा टोलका सात नातेदारहरूको टोली। राजनकुमार गोलेले नेतृत्व गरेको टोली मुक्तिनाथ दर्शनका लागि तारा एयरको सो विमानमार्फत जोमसोम जाँदै थिए।
बुबा–आमा, काका–काकी र मामा–माइजूलाई मुक्तिनाथ दर्शन गराएर धर्म कमाउने चाह बोकेर जहाज चढेका थिए राजनकुमार गोले। मृतकमध्ये राजन गोले नेकपा (एकीकृत समाजवादी) पार्टीका धनुषा जिल्ला सदस्य तथा धनुषा–काठमाडौं सम्पर्क मञ्चका पूर्वसचिव हुन्।
त्यसबाहेक उनी मधेस प्रदेशका उद्योग, पर्यटन तथा वनमन्त्री शत्रुधन महतोका पूर्वस्वकीय सचिवसमेत हुन्। मन्त्री महतो संघीय मन्त्री हुँदा मृतक राजन उनका स्वकीय सचिव थिए।
उनीसँगै थिए, उनका बुबा ईन्द्रबहादुर गोले, आमा राममाया तामाङ, काका पुरुषोत्तम गोले, काकी तुलसादेवी तामाङ, मामा मकरबहादुर तामाङ र माइजू सुकुमाया तामाङ। उनीहरू तीर्थस्थल घुम्न र घुमाउन निस्किएका थिए। मुक्तिनाथ दर्शन गर्न उनीहरू जोमसोम जानेक्रममा विमान दुर्घटनामा परेको थियो।
उनीहरू शुक्रबार सार्वजनिक गाडीबाट पोखरा पुगेका थिए। शनिबार त्यहाँका फेवा ताललगायत धार्मिक स्थल घुमफिर गरी आइतबार जोमसोमका लागि हवाइयात्रा गरेका थिए। तर सो विमान आइतबार दुर्घटनामा पर्यो। सात नातेदारसहित जम्मा २२ जना सवार विमान मुस्ताङको मानापाथी हिमालको फेदीस्थित थासाङ गाउँपालिका–२ न्याउरिकोटको ल्यांके खोलाको मुहाननजिक दुर्घटना भएको थियो।
सोमबार बिहान विमान दर्घटनाग्रस्त अवस्थामा फेला परेको थियो। विमानमा सवार चालकदलसहित सबैको मृत्यु भएको खबर आएको छ। एकै परिवारको सात जनाको मृत्यु भएपछि आफन्त तथा गाउँबासी शोकमग्न भएका छन्।
आइतबार पोखराबाट जोमसोमका लागि उडेको विमान सम्पर्कबिहिन भएलगत्तै गाउँवासी चिन्तित बनेका थिए। आफन्त तथा गाउँलेलाई सान्त्वना दिन मिथिला नगरपालिकाका नगरप्रमुख महेन्द्र महतो, उपप्रमुख सुनितासिंह बुढाथोकी र मधेश प्रदेश सरकार उद्योग, पर्यटन तथा वनमन्त्री शत्रुधन महतोलगायत राजनीतिक दलका नेता तथा समाजसेवीहरू लोटा गाउँ पुगेका थिए।
गाउँका सात जना दुर्घटनामा परेपछि मिथिला नगरपालिका–११ लोटा गाउँमा अहिले शोकमा रहेको नगरप्रमुख महेन्द्र महतो बताउँछन्। ‘विमान बेपत्ता भएदेखि नै गाउँ स्तब्ध बनेको थियो,’ उनले केटिएम दैनिकसँग भने, ‘राजनजी मेरा मित्र पनि हुनुहुन्थ्यो, उहाँहरू तीर्थ गर्न निस्किनुभएको थियो, तर मुक्तिनाथ दर्शन गरेर धर्म कमाउने उहाँहरूको इच्छा अधुरो रह्यो।’
महतोका अनुसार उनीहरूको परिवार दुर्घटनामा परेका आफन्तको शव बुझ्नका लागि आज काठमाडौँ गएका छन्। शव बुझेर परम्पराअनुसार स्वयम्भूमै अन्त्येष्टि गर्ने परिवारको योजना रहेको उनले सुनाए।’ हाम्रो नगरकै लागि सबैभन्दा पीडादायी खबर हो यो,’ उनले थपे,’हामी सबै हिजैदेखि उनीहरूका आफन्त भए ठाउँमा छौँ। भरसक नराम्रो खबर नआओस् भनेको बिहानै सुनेको खबरले धक्का लाग्यो।’
नगरप्रमुख महतोका अनुसार मृतकमध्ये पुरुषोत्तम तामाङ र तुलसादेवी काठमाडौँ बस्दै आएका थिए। तर स्थानीय तहको निर्वाचनका लागि उनीहरू गाउँ फर्किएका थिए। चुनाव सकिएपछि उनीहरू शुक्रबार गाउँबाट पोखरा निस्केका थिए।
