वर्षौँदेखि आफ्ना छात्राहरूमाथि यौन दुर्व्यवहार गर्ने शिक्षकको बचाउमा विद्यालय नै लागेको पाइएको छ । कैयन् पटक छात्राहरूको संवेदनशील अंगहरू चलाउने, चिमोट्ने र भित्री वस्त्र तानिदिएर यौन शोषण गरेको आरोप लागेपनि विद्यालय नै ती शिक्षकको बचाउमा उत्रिएको पाइएको हो ।
मोरङको विराटनगर महानगरपालिका–४ बरगाछीको सिर्जना ज्ञानकुञ्ज बोर्डिङ स्कुलमा गणित विषय पढाउँदै आएका ४८ वर्षीय तेजेन्द्र कर्णले छात्राहरूलाई यौन दुर्व्यवहार गर्दै आएका थिए। धेरै पटक विद्यार्थी र अभिभावकले उनको यस्तो भयानक गतिविधिबारे प्रिन्सिपललाई जानकारी गराउँदा पनि विद्यालयले कारबाही नगर्दा बारम्बार यौन दुर्व्यवहारका घटना दोहोरिएको छ।
पछिल्लो पटक कक्षा ५ मा पढ्दै गरेकी ११ वर्षीया बालिकालाई होमवर्क नगरेको भन्दै सजाय दिनेक्रममा शिक्षक कर्णले सोही व्यवहार दोहोर्याएका थिए। पढाइमा अब्बल ती बालिकाले ‘गुरु’को त्यो व्यवहारले आजित भएपछि अस्वभाविक स्वभाव देखाउने गरेकी थिइन्। परिवारले सोधपुछ गरेपछि घटना बाहिरिएको थियो।
बालिकाका अभिभावकले विद्यालय प्रशासनसँग छलफल गर्दा प्रिन्सिपल नवल श्रीवास्तवले कर्णलाई निकाल्ने आश्वासन दिएका थिए। तर यौन दुर्व्यवहारको एक वर्ष बित्नै लाग्दा पनि कर्णलाई ननिकालिएको र उनले त्यस्तै व्यवहार दोहोर्याउने गरेपछि बुधबार अभिभावकले प्रहरीलाई किटानी जाहेरी दिएका थिए। जाहेरीपछि मोरङ प्रहरीले उनलाई पक्राउ गरी हिरासतमा राखेर अनुसन्धान थालेको छ।
१३ वर्षदेखि सिर्जना ज्ञानकुञ्ज बोर्डिङ स्कुलमा पढाउँदै आएका कर्णले यसअघि पनि थुप्रै छात्राहरूमाथि यौन दुर्व्यवहार गर्ने गरेको त्यहाँ अध्ययनरत विद्यार्थी बताउँछन्। पटक–पटक घटना दोहोरिँदा पनि ती शिक्षक कारबाहीमा नपर्नु आशंकाजनक रहेका भन्दै एक विद्यार्थीले भनिन्, ‘धेरै पटक प्रिन्सिपलसामु गुनासो राख्यौँ। अहिलेसम्म उहाँलाई ननिकाल्दा समस्या दोहोरियो। यसबाट हामी विद्यार्थी पीडामा पर्यौँ।’
आर्थिक अवस्था कमजोर भएका कारण विद्यालयले ती शिक्षकलाई घर बनाउनका लागि डेढ लाख रुपैयाँ रकम उपलब्ध गराएको थियो। सोही रकम असुली गर्न विद्यालयले ती शिक्षकलाई कामबाट ननिकाल्दा विद्यार्थीहरू यौन शोषणमा परेको स्रोतले जनाएको छ।
यता, स्कुलका प्रिन्सिपल श्रीवास्तवले यसअगाडि विद्यार्थीको गुनासो नसुनेको बताउँदै अब उपरान्त कर्णलाई विद्यालयबाट निकालिएको जानकारी दिए। ‘उहाँ अनुभवी शिक्षक हो। लामो समयदेखि पढाउनुभयो। पछिल्लो समय भने उहाँप्रति धेरै कम्प्लेन आयो। एक–दुई पटक उहाँलाई निलम्बन गरेका थियौँ । अब भने बिदा गर्ने छौँ।’