प्रदेश सांसदबाट राजीनामा दिएर चार जना नेता स्थानीय तह निर्वाचनमा लडे । करोडौं बजेट परिचालन गर्न पाइने र जनतासँग नजिक भएर काम गर्न पनि पाइने भएका कारण सहजै राजीनामा दिएर स्थानीय तह निर्वाचनमा लड्ने नेताहरू हुन्, काजिमान कागते, विजय सुवेदी, गोपालचन्द्र बुढाथोकी र कृष्णबहादुर थापा । यी चारै जना नेता नेकपा एमालेका हुन् ।
कागते इलामको सूर्योदय नगरपालिकाको प्रमुख पदका लागि प्रतिस्पर्धामा उत्रिए । नेकपा (एकीकृत समाजवादी)का सम्मानित नेतासमेत रहेका पूर्वप्रधानमन्त्री झलनाथ खनालको गृहपालिका पनि यही हो । कागते खनालकै पार्टीका नेता रणबहादुर राईबाट पराजित भए ।
निर्वाचन अधिकृतको कार्यालयले सार्वजनिक गरेको विवरणअनुसार राईले १२ हजार ४३१ मत र पराजित भएका कागतेले १० हजार ५७९ मत प्राप्त गरे । राईको जितले सांसद पदबाट राजीनामा दिएर सूर्योदय नगरपालिकाको नेतृत्व गर्ने कागतेको चाहना अधुरै रह्यो।
सांसदबाट राजीनामा दिएका एकको अग्रता, एक जनाको हार, दुई जना कठिन सङ्घर्षमा
अर्का सांसद् विजय सुवेदी पनि भरतपुर महानरपालिकामा पराजित हुन पुगे । भरतपुर महानगरपालिका प्रमुखमा नेपाल कम्युनिष्ट पार्टी (माओवादी केन्द्र) उम्मेदवार रेणु दाहाल ५२ हजार ३० मत ल्याई विजयी भएकी छन् । उनले निकटतम प्रतिस्पर्धी एमालेका विजय सुवेदीलाई १२ हजार ४४९ मतान्तरले पराजित गरेकी हुन् । पराजित सुवेदीले ३९,५८१ मत ल्याएका छन् ।
पोखरा महानगरपालिकाको प्रमुख पदका प्रतिस्पर्धी रहेका कृष्णबहादुर थापा पनि पराजित भए । यो समाचार तयार पार्दासम्म पोखरा महानगरको अन्तिम मतपरिणाम सार्वजनिक हुन बाँकी नै छ । गण्डकी प्रदेश सांसदबाट राजीनामा दिएका थापालाई पोखरा महानगरको प्रमुख हुन सकेनन् ।
चार जना सासंदहरू पराजित भैरहँदा झापाको मेचीनगरमा भने प्रदेश सासंदबाट राजीनामा दिएर स्थानीय तहको नेतृत्व गर्न आइपुगेका गोपालचन्द्र बुढाथोकी विजयी भएका छन् । मंगलबार बिहान ५ बजे आएको अन्तिम मतपरिणाम अनुसार उनले गठबन्धनबाट नेपाली कांग्रेसका इन्द्र बहादुर बुढाथोकीलाई ५ हजार १६७ मतान्तरले पराजित गरेका हुन् । एमालेका बुढाथोकी २६ हजार ४७८ मत पाएर निर्वाचित हुँदा पराजित कांग्रेसका इन्द्र बहादुर बुढाथोकीले २१ हजार ३११ मत ल्याए ।
प्रदेश सासंदबाट राजीनामा दिएकामध्ये बुढाथोकीले मात्रै एमालेको इज्जत राखेको भन्दै उनको चर्चा परिचर्चा हुन थालेको छ ।
कांग्रेस महामन्त्री विश्वप्रकाशको गृहनगरमा प्रमुख /उपप्रमुख एमाले निर्वाचित
