सुनसरीको इटहरी उपमहानगरपालिकाकी एक युवतीलाई १५ वर्षको उमेरमा बलात्कार गरी फरार भएका प्रिन्सिपललाई प्रहरीले फेरि खोज्न थालेको छ।
सात वर्षअगाडि आफ्नै छात्रालाई दुई वर्षसम्म बलात्कार गरेको आरोप लागेका इटहरीको ब्लुमिङ लोटस इङ्लिस सेकेन्डरी स्कुलका तत्कालीन प्रिन्सिपल राज खड्काको प्रहरीले पुनः खोजी थालेको हो।
इलाका प्रहरी कार्यालय धरानका प्रहरी नायव निरीक्षक (सई) दीपक कट्वालका अनुसार सोमबार (आज) केन्द्रीय अनुसन्धान ब्युरोलाई खड्काको खोजीमा समन्वय गरिदिन पत्राचार गरिएको छ।
जिल्ला प्रहरी कार्यालय सुनसरीले खड्का काठमाडौँमा रहेको आशंका रहेको उल्लेख गर्दै सिआइबीलाई पत्र पठाएको सई कटवालले केटिएम दैनिकलाई बताए ।
दुई वर्षसम्म पटक–पटक बलात्कार गरेको भन्दै इटहरीकी एक छात्राले सात वर्षअघि सिन्धुलीको कमलामाई गाउँपालिका–७ घर भइ इटहरीमा अध्यापन गराउँदै आएका ३१ वर्षीय खड्काविरुद्ध किटानी जाहेरी दिएकी थिइन्।
स्कुलकै होस्टलमा बस्दै आएकी ती किशोरीले २०७४ साल भदौ २ गते इलाका प्रहरी कार्यालय धरान पुगेर किटानी जाहेरी दिएकी थिइन्।
२०७२ मा कक्षा ९ मा पढ्दादेखि उनीमाथि प्रिन्सिपलले स्कुलको अफिस, होस्टेल, बाथरूम, साइन्स ल्याब, कम्प्युटर ल्याब, जताततै पटक–पटक जबरजस्ती करणी गरेको उनको आरोप थियो।
जाहेरी परेपछि प्रहरीले ती प्रिन्सिपलविरुद्ध जबरजस्ती करणीको मुद्दा चलाएको थियो। तर प्रहरीले तीन महिनापछि मात्र जिल्ला अदालत सरकारी वकिलको कार्यालमा मुद्दा पुर्याएको थियो।
अदालतमा मुद्दा चल्नुअघि नै फरार बनेका ती प्रिन्सिपल पक्राउ नपरेपछि २०७६ साल असारमा अदालतले सो मुद्दा मुलतबीमा राखेको थियो। धरानका सइ कट्वालका अनुसार सो मुद्दाको अहिलेसम्म फैसला भइसकेको छैन।
‘जाहेरीलगत्तै आरोपित फरार भएपछि सो मुद्दाको फैसला हुन सकेको छैन,’ उनले भने, ‘हामीले अथक खोज्दा पनि भेट्न सकेनौँ। अहिले काठमाडौँतिर रहेको पीडितको आशंका छ। सोहीअनुरूप आज सिआइबीलाई पत्राचार गरिएको हो । हामी संयुक्त रूपमा आरोपितको खोजी गरी अदालतमा बुझाउँछौँ।’
अहिले तीन वर्षपछि पुनः पीडित आफ्नो पुरानो मुद्दाको ‘फाइल’ खोज्दै प्रहरीसमक्ष पुगेपछि सुनसरी प्रहरीले खड्कालाई पक्राउ गर्न सिआइबीसमक्ष पत्राचार गरेको हो। पीडित पक्षका अनुसार ती प्रिन्सिपल अहिले पनि काठमाडौँमा एक विद्यालय सञ्चालन गरिरहेका छन्।
इटहरीमा प्रदर्शन
काठमाडौंमा बलात्कारमा हदम्याद हटाउनुपर्छ भन्दै आन्दोलन भैरहेको समयमा सुनसरीको इटहरीमा पनि प्रदर्शन गरिएको छ ।
बलात्कार र यौनजन्य हिंसाका पीडकलाई कारवाही गर भन्दै महिला संजाल इटहरीको ब्यानरमा गरिएको प्रदर्शनमा सहभागीहरूले “न्याय पाउन म्याद किन, बलात्कार जस्तो जघन्य अपराधमा हदम्याद नलागोस्, अन्तरराष्ट्रिय कानुनको सम्मान गर” लगायतका नारा लेखिएका प्लेकार्ड बोकेका थिए ।
किशोरी, महिला र पुरुषहरू उपस्थित उक्त प्रदर्शनमा सामाजिक अभियान्ता सावित्री सुवेदी पनि पुगेकी थिइन् ।