आठ दिन अगाडि बढेको पेट्रोलियम पदार्थको मूल्य पुन: बढेको छ । वैशाख ३१ गते पेट्रोल, डिजेल र मट्टितेलमा प्रतिलिटर १० रुपैयाँ वृद्धि गरेको निगमले ८ दिनपछि आज मध्यरातबाट लागु हुने गरी मुल्य बढाएको हो ।
निगमले पेट्रोल, डिजेल र मट्टितेलमा प्रतिलिटर रु १० का दरले वृद्धि गरेको छ । अबदेखि पेट्रोलको मूल्य लिटरको १८० पुगेको छ भने डिजेल, मट्टितेलको मूल्य १६३ पुगेको छ ।
खाना पकाउने एलपी ग्यासमा दुई सय रुपैयाँ बृद्धि गर्दै १८०० पुर्याइएको छ ।
नेपाल आयल निगमका सह प्रवक्ता पुस्कर कार्कीले मूल्य समायोजनपछि पनि निगमलाई पेट्रोलमा प्रतिलिटर १४.६४ रुपैयाँ, डिजेलमा २६.८२ रुपैयाँ र खाना पकाउने ग्याँस सिलिन्डरमा ८७९.७५ रुपैयाँ घाटा भएको बताएका छन् ।
मट्टितेल र हवाई इन्धनमा भने निगमलाई नाफा छ । मट्टितेलमा प्रतिलिटर २२.११ रुपैयाँ, हवाई इन्धन आन्तरिकमा १३.८९ रुपैयाँ र हवाई इन्धन बाह्यमा ५९.८१ रुपैयाँ नाफा रहेको निगमले आज जारी गरेको प्रेस विज्ञप्तिमा उल्लेख छ ।
आन्तरिक हवाई इन्धनमा पनि प्रतिलिटर रु १० रुपैयाँ वृद्धि गरेर १६६ पुर्याइएको छ । यससँगै वायुसेवा संचालक संघले हवाई भाडादर पनि बढाउन सक्ने आँकलन गरिएको छ ।