धरान उपमहानगरपालिकाको प्रमुखमा स्वतन्त्र उम्मेदवार हर्कराज साम्पाङ विजयी भएका छन्। आइतबार दिउँसो सार्वजनिक अन्तिम मतपरिणामअनुसार साम्पाङ ४ हजार ७६२ मतान्तरसहित धरान प्रमुखमा विजयी भएका हुन्।
लौरो चुनाव चिह्न लिएर चुनावी मैदानमा होमिएका राईले २० हजार ८२१ मत पाउँदा उनका निकटतम् प्रतिस्पर्धी गठबन्धनका तर्फबाट नेपाली कांग्रेसका किशोर राईले १६ हजार ५९ मत प्राप्त गरे। प्रमुखमा विजयी राईले २०७५ सालको उपनिर्वाचनमा ४२२ मत प्राप्त गरेका थिए।
यस्तै, नेकपा (एमाले)का मञ्जु भण्डारी सुवेदीले १२ हजार ८२५ मत प्राप्त गरिन्। उनी यसअगाडि सोही उपमहानगरको उपप्रमुख थिइन् ।
उपप्रमुखमा गठबन्धनको तर्फबाट नेकपा (माओवादी केन्द्र)का अइन्द्र विक्रम बेघा २० हजार ५१० मतसहित निर्वाचित भए।
उनका प्रतिद्वन्द्वी नेकपा (एमाले)का पदमप्रसाद लिम्बूले १७ हजार ६०६ मत प्राप्त गरे।
२० वडा रहेको धरान उपमहानगरमा वडा नं १, ३, ९, ११, १६, १८ र २० मा नेपाली कांग्रेसका उम्मेदवार विजयी भएका छन् । वडा नं २, ४, ५, ७, ८, १०, १२, १३, १५, १७ र १९ मा एमाले, वडा नं ६ मा स्वतन्त्र तथा वडा नं १४ मा राष्ट्रिय प्रजातन्त्र पार्टीका उम्मेदवार विजयी भएका छन्।