विराटनगर महानगरपालिकाको उपमेयरमा निर्वाचित एमालेकी शिल्पा कार्कीले पाएको भन्दा बदर मत बढी भएको पाइएको छ ।
उपमेयरमा निर्वाचित एमाले उम्मेदवार शिल्पा कार्कीले २५ हजार ६८० मत पाएकी छन् । मुख्य निर्वाचन अधिकृतको कार्यालयका अनुसार उपमेयर पदमा मात्रै ३४ हजार १६७ मत बदर भएको छ ।
एक लाख ३३ हजार १४२ मतदाता रहेको विराटनगरमा ८९ हजार ६७८ मत खसेको थियो । जसमध्ये मेयरमा ६८ हजार ३६ र उपमेयर पदमा ५५ हजार २२९ मत सदर भएको थियो । मेयरमा २१ हजार ३५८ र उपमेयरमा ३४ हजार १६७ मत बदर भएको छ ।
उपमेयर पदमा बदर भएको मत करिब ३८ प्रतिशत हो । मेयरमा करिब २४ प्रतिशत मत बदर भएको छ । २०७४ सालको स्थानीय निर्वाचनमा विराटनगरको मेयर– उपमेयरमा २४ प्रतिशत मत बदर भएको थियो ।
विराटनगर महानगरपालिकामा ३२ हजार ७९७ मत गणणा हुँदा उपप्रमुखको झण्डै ४० प्रतिशत मत बदर भएको थियो । ।
मुख्य निर्वाचन अधिकृतको कार्यालय विराटनगरका सूचना अधिकारी हेमबहादुर बुढाथोकीका अनुसार बदरमध्ये अधिकांश मत उम्मेदवार नभएको चुनाव चिह्नमा परेको छ ।
कस्ले कति मत पाए ?
निर्वाचन आयोगले सार्वजनिक गरेको अन्तिम मतपरिणाम अनुसार प्रमुख पदमा गठबन्धनबाट नेपाली कांग्रेसका उम्मेदवार नागेश कोइराला आठ हजार ७१५ मतान्तरले निर्वाचित भएका हुन् ।
उनले ३०१७० मत ल्याएर निर्वाचित हुँदा निकटतम् प्रतिस्पर्धी नेकपा एमालेका सागर कुमाले थापाले २१४५५ मत ल्याए ।
सोही पदमा जसपा त्यागेर स्वतन्त्र उम्मेदवारी दिएका उमेश कुमार यादवले ८७९५, राप्रपाका प्रहलाद प्रसाद साहले ५२१६ मत ल्याए ।
त्यस्तैगरी सिके राउत जनमत पार्टीका अरुण कुमार मण्डलले ६२०, विवेकशील साझा पार्टीका अमलेश कुमार कर्णले ३६३, नेकपा (मार्क्सवादी लेनिनवादी)का देवी पौडेलले १७९ नेकपा (समाजवादी) सोने लाल राजवंशीले १२६, पिछडा वर्ग निषाद दलित जनजाती पार्टीले १२३ मत ल्याउँदा अन्य उम्मेदवारहरूले १०० मत पनि कटाउन सकेनन् ।
उपप्रमुखमा एमालेकी शिल्पा कार्की भारी मतान्तरले विजयी भइन् । कार्कीले गठबन्धनबाट जसपाका अमरेन्द्र यादवलाई ११ हजार ४६१ मतको अन्तरले पराजित गरेकी हुन् । उनले २५६८० मत पाउँदा निकतम प्रतिस्पर्धी जसपाका यादवले जम्मा १४२१९ मत पाए ।
सोही पदामा राप्रपाकी विन्दा कुमारी लुइटेल आचार्यले ६४०१, माओवादीबाट विद्रोह गरेर स्वतन्त्र उम्मेदवारी दिएकी नमिता न्यौपानेले ५११७ मत पाइन् ।
त्यस्तैगरी सोही पदमा जनमत पार्टीकी अन्नु कुमारी कामतले ११३३, लोकतान्त्रिक समाजवादी पार्टी नेपालकी सहनाज खातुनले ८०८, स्वतन्त्र उम्मेदवार गंगा देवी सुवेदीले ६७७, विवेकशील साझा पार्टीकी श्रृजु पराजुलीले ३५३, नेकपा (मार्क्सवादी लेनिनवादी)की चन्द्रकला सिवाकोटीले २०१, स्वतन्त्र उम्मेदवार बसुन्धरा देवी झाले १९७, नेकपा (समाजवादी) लक्ष्मी राजवंशीले १५५, पिछडा वर्ग निषाद दलित जनजाती पार्टीकी हफीजन खातुनले १२४, नेपाली कांग्रेस (बी.पी.) की माया ओझाले १२२ र संघीय लोकतान्त्रिक राष्ट्रिय मञ्चकी चन्द्रकला शर्माले ४२ मत पाइन् ।
