झापाको बिर्तामोड नगरपालिकामा नेकपा एमालेले मेयर र उपमेयर जितेको छ ।
शुक्रबार सम्पन्न मतगणनामा प्रमुख पदमा एमाले उम्मेदवार पवित्रादेवी महतारा १६५२० मत ल्याई विजयी भएकी छन् । उनले निकटतम प्रतिद्वन्द्वी नेपाली कांग्रेस उम्मेदवार भोजराज सिटौलालाई ३ हजार ७५८ मतान्तरले पराजित गरेकी हुन् । पराजित भोजराज सिटौलाले १२७६२ मत ल्याएका छन् ।
सोही पदमा राप्रपाका ध्रुव कुमार उप्रेतीले ५६५६ मत ल्याए भने मंगोल नेशनल अर्गनाइजेसनका राज कुमारी लावतीले २८६ मत ल्याए । त्यस्तैगरी जसपाका उदय गुरुङले १७१, मौलिक जरोकिलो पार्टीका प्रज्वल अधिकारी शर्माले ९९, स्वतन्त्र उम्मेदवार नगेन्द्र अधिकारीले ३८ मत पाउँदा आमुल परिवर्तन मसिहा पार्टी नेपालका मन कुमार लिम्बूले २२, नेपाल परिवार दलका केदार ढुङ्गानाले १० र नेपाल लोकतान्त्रिक पार्टीका अंचल धिमालले ६ मत पाए ।
यस्तै उपप्रमुखमा एमालेकै उम्मेदवार नगेन्द्रप्रसाद संग्रौला १५५८६ मत सहित विजयी भएका छन् । उनका निकटतम प्रतिद्वन्द्वी नेपाल कम्युनिष्ट पार्टी (माओवादी केन्द्र)का उम्मेदवार चन्द्रप्रसाद कडरियाले ८४५१ मत ल्याएका छन् ।
उपप्रमुखमा राप्रपाकी रञ्जु प्याकुरेलले ६८६० मत ल्याउँदै तेस्रो हुँदा मंगोल नेशनल अर्गनाइजेसनबाट कुखुराको भाले चुनाव चिह्नकी रिता देव शेर्माले २६८, विवेकशील साझा पार्टीकी निसासोनी कर्णले २४२, जसपाकी चीजा राईले २०३ मत ल्याउँदा एकीकृत समाजवादीका तिर्थराज सिग्देलले २०१ मत पाए । सिग्देल पत्रकार समेत हुन् ।
त्यस्तैगरी सोही पदमा मौलिक जरोकिलो पार्टीकी रोमा देवी निरौला (घिमिरे) ले ५४ मत ल्याइन भने संघीय लोकतान्त्रिक राष्ट्रिय मञ्जकी अमृता लावतीले २५ मत पाइन् ।
महतारा जिल्लामा नगरपालिकाको मेयर पदमा निर्वाचित पहिलो महिला बनेकी छन् । उनी यसअगाडि सोही नगरको उपप्रमुख थिइन् ।