स्थानीय तहको निर्वाचनमा अहिलेसम्मको परिणामअनुसार पालिका प्रमुखमा पुरुषहरूको बाहुल्यता रहेको छ । निर्वाचन आयोगका अनुसार नगरपालिकामा २.८० प्रतिशत र गाउँपालिका अध्यक्षमा २.७० प्रतिशत महिलाहरू प्रमुख पदमा निर्वाचित भएका हुन् ।
अहिलेसम्म १७८ नगरपालिकाको अन्तिम मतपरिणाम सार्वजनिक भैसक्दा पाँच नगरको प्रमुख पदमा महिला उम्मेदवार विजयी भएका छन् । नेकपा (एमाले) बाट तीन र नेपाली कांग्रेसबाट दुई महिलाहरू नगरप्रमुखमा निर्वाचित भएका हुन् ।
यस्तै ४०७ गाउँपालिकाको अध्यक्षमध्ये कांग्रेसबाट चार, एमालेबाट चार र नेकपा (माओवादी केन्द्र)बाट तीन जना गरी ११ जना महिला निर्वाचित भएका छन् । यो भनेको कूल निर्वाचित हुनेमध्येको २.७० प्रतिशत हो ।
यस्तै कूल १७७ नगर उपप्रमुखमध्ये महिला १४० जना निर्वाचित भएका छन् । तीमध्ये कांग्रेसबाट ५६, एमालेबाट ६०, माओवादी केन्द्रबाट १०, नेकपा (एकीकृत समाजवादी)बाट पाँच र जनता समाजवादी पार्टी नेपाल (जसपा)बाट तीन जना नगर उपप्रमुखमा निर्वाचित भएका छन् ।
यस्तै लोकतान्त्रिक समाजवादी पार्टी नेपाल (लोसपा)बाट र राष्ट्रिय प्रजातन्त्र पार्टी (राप्रपा)बाट दुई/दुई जना, नेपाल मजदुर किसान र नागरिक उन्मुक्ति पार्टीबाट एक/एक जना उपप्रमुखमा निर्वाचित भएका छन् ।
यसैगरी ४०६ गाउँपालिका उपाध्यक्षमध्ये २८९ जना महिला निर्वाचित भएका छन् । कांग्रेसबाट १२६, एमालेबाट ९८, माओवादी केन्द्रबाट ४४, जसपाबाट ११, नेकपा (एकीकृत समाजवादी)बाट दुई, लोसपाबाट तीन, राप्रपाबाट दुई तथा नागरिक उन्मुक्ति, जनमत पार्टी र विवेकशील साझा पार्टीबाट एक/एक जना गाउँपालिका उपाध्यक्षमा निर्वाचित भएका हुन् ।
यस्तै महिला उम्मेदवार वडाध्यक्षमा ५७ जना निर्वाचित भएको आयोगले जनाएको छ । अहिलेसम्म पाँच हजार ७४७ जना वडाध्यक्षमा निर्वाचित भइसकेका छन् । यस्तै महिला सदस्यमा पाँच हजार ७४१, दलित महिला सदस्यमा पाँच हजार ६४३, सदस्यमा ३९५ जना महिला निर्वाचित भइसकेका छन् । गत वैशाख ३० गते ७५३ स्थानीय तह (केहीमा स्थगित भएर पुन निर्वाचन भएको) निर्वाचन भएको थियो ।
२०७४ सालको स्थानीय तह सदस्य निर्वाचनमा देशभरका ७५३ स्थानीय तहमा निर्वाचित भएका ३५,०४१ जनप्रतिनिधि मध्ये १४,३५३ अर्थात् ४० प्रतिशत बढी महिला निर्वाचित भएका थिए। जसमध्ये १८ महिला स्थानीय निकायको प्रमुखमा र ७०० जना उपप्रमुखमा निर्वाचित भएका थिए।