देशका ७५३ स्थानीय तहमध्ये यो समाचार तयार पार्दासम्म ५७३ पालिकाहरूको मतगणना कार्य सकिएको छ ।
गत वैशाख ३० गते एकसाथ सबै* स्थानीय तहमा भएको निर्वाचनमा हालसम्म अन्तिम मतपरिणाम आएकामध्ये सबैभन्दा बढी पालिकाको प्रमुख तथा अध्यक्ष पद नेपाली कांग्रेसले जितेको छ ।
नेपाली कांग्रेसले हालसम्म २५१ स्थानीय तहको प्रमुख तथा अध्यक्षमा विजय हात पारिसकेको छ । मतगणना सकिएकामध्ये ४३.८० प्रतिशत पालिकामा कांग्रेसका उम्मेदवार विजयी बनेका छन् । उपप्रमुखमा भने कांग्रेसबाट २३८ जना उम्मेदवारहरू विजयी भएका छन् । यो भने कूल गणना भएकामध्येमा ४१.५४ प्रतिशत हो ।
स्थानीय तह निर्वाचनमा प्रमुख र उपप्रमुख पदमा निर्वाचित हुने दोस्रो ठूलो सङ्ख्या नेकपा एमालेका उम्मेदवारको छ । एमालेका उम्मेदवार हालसम्म १६४ स्थानमा प्रमुख तथा अध्यक्ष पदमा विजय भइसकेका छन् । यो भनेको मतगणना सकिएका पालिकामध्ये २८.६२ प्रतिशत हो । उपपप्रमुखमा भने ३०.८९ प्रतिशत अर्थात १७७ स्थानमा जित हाँसिल गरेको छ ।
तेस्रो स्थानमा रहेको नेकपा (माओवादी केन्द्र)ले हालसम्म १०६ स्थानीय तहको प्रमुख तथा अध्यक्ष पदमा जित निकाल्न सफल भएको छ । हालसम्म मतगणना सकिएकामध्ये १८.५० प्रतिशत पालिकामा माओवादीका उम्मेदवार विजयी बनेका छन् । उपप्रमुखमा माओवादी केन्द्रका ११२ जना उम्मेदवारहरू विजयी भएका छन् ।
जनता समाजवादी पार्टी (जसपा), नेपालले हालसम्म १७ प्रमुख र १४ उपप्रमुख पद जित्दै चौथौ दल बनेको छ । उसले एकीकृत समाजवादीलाई पछि पार्दै धेरै स्थानीय तहमा जित हाँसिल गरेको हो ।
नेकपा (एकीकृत समाजवादी)का उम्मेदवार हालसम्म १३ पालिकाको प्रमुख तथा अध्यक्ष र १७ पालिकाको उपप्रमुख पदमा निर्वाचित भएका छन् ।
राष्ट्रिय जनमोर्चाले अहिलेसम्म ४ पालिका प्रमुख र ३ उपप्रमुखमा जित हाँसिल गरेको छ । बाग्लुङको जैमिनी नगरपालिका र वरेङ गाउँपालिका प्यूठानको मल्लारनी गाउँपालिका र अर्घाखाँचीको भुमिकास्थान नगरपालिकामा जनमोर्चाले प्रमुख पदमा जित निकालेको हो । गिलास चुनाव चिह्नले उपप्रमुखमा प्यूठानको स्वर्गद्वारी नगरपालिका र ऐरावती गाउँपालिका र बाग्लुङको काठेखोला गाउँपालिकाको उपाध्यक्ष पद जितेको हो ।
राष्ट्रिय प्रजातन्त्र पार्टी (राप्रपा) ले हालसम्म २ स्थानीय तहको प्रमुख र चार स्थानीय तहको उपप्रमुख पद जितेको छ । हलो चुनाव चिह्नले काठमाडौं जिल्लाको शङ्खरापुर नगरपालिकामा प्रमुख र झापाको हल्दीबारी गाउँपालिकामा प्रमुखमा पदमा जित निकालेको छ । हल्दीबारीमा राप्रपा अध्यक्ष राजेन्द्र लिङ्देनका भाई रविन्द्र प्रसाद लिङदेन दोस्रोपटक पालिका प्रमुखमा निर्वाचित भएका हुन् ।
उपप्रमुखमा भने राप्रपाले झापाको भद्रपुर नगरपालिका र हल्दीबारी गाउँपालिका त्यस्तैगरी रुपन्देही जिल्लाको रोहिणी गाउँपालिकाको र नवलपरासीको रामग्राम नगरपालिकामा उपप्रमुख पद जितेको हो ।
महन्थ ठाकुरको लोकतान्त्रिक समाजवादी पार्टी, नेपाल लोसपाले ३/३ पालिका प्रमुखमा र उपप्रमुख जित्न सफल भएको हो । साइकल चुनाव चिह्नको उक्त पार्टीका उम्मेदवारहरू सप्तरी जिल्लाको महादेवा गाउँपालिका, पर्साको बिन्दबासिनी गाउँपालिका र महोत्तरीको मटिहानी नगरपालिकामा प्रमुख स्थानमा विजयी भएका हुन् । सो पार्टीले उपप्रमुख पदमा महोत्तरीको मटिहानी नगरपालिका रुपन्देहीको मायादेवी गाउँपालिका र सप्तरीको महानदेवा गाउँपालिकाको उपप्रमुख पद जितेको छ ।
सामाजिक सञ्जालमा धेरै चर्चामा रहेको विवेकशील साझा पार्टीले पनि यो समाचार तयार पार्दासम्म एक पालिकाको प्रमुख र उपप्रमुख पद जितेको छ भने रेशम चौधरीको नागरिक उन्मुक्ति पार्टीले २ पालिका प्रमुख र एक उपप्रमुखमा जित निकालेको छ ।
सिके राउतको जनमत पार्टी (जपा) ले दुई स्थानका प्रमुख र एक स्थानको उपप्रमुखमा जित निकाल्दा तमलोपाका उम्मेदवार १ पालिकाको प्रमुख पदमा विजयी भएका छन् ।
नेपाल मजदुर किसान पार्टी (नेमकिपाले) १ पालिकाको प्रमुख र उपप्रमुख पदमा जित हाँसिल गरेको छ । ५७३ स्थानको नतिजा आउँदा सो पार्टीबाट भक्तपुर जिल्लाको भक्तपुर नगरपालिका प्रमुख र उपप्रमुख पदका उम्मेदवारहरू विजयी भएका हुन् ।
मतगणना सकिएकामध्ये ७ जना अर्थात १.२२ प्रतिशत पालिका प्रमुख तथा अध्यक्षमा स्वतन्त्र उम्मेदवार विजयी बनेका छन् । त्यस्तैगरी दुईवटा पालिकाको उपप्रमुखमा स्वतन्त्र उम्मेदवार विजयी भएका छन् ।
* केहीमा स्थगित भएर पुन मतदान भएको ।