भोजपुरको उत्तर षडानन्द नगरपालिकामा पुराना अनुहारलाई हराउँदै नयाँ अनुहार विजयी भएका छन्। प्रदेश १ का मुख्यमन्त्री राजेन्द्र राईको गृहनगर षडानन्द नगरपालिकामा मेयर र उपमेयरमा अघिल्लो निर्वाचनमा पराजित भएकाहरूले यस पटक त्यसबेलाका विजेताहरूलाई पराजित गरेका हुन्।
नगर प्रमुखमा नेकपा (एमाले) का सुरेन्द्र उदास र उपप्रमुखमा नेकपा (माओवादी केन्द्र) की प्रमिला राई निर्वाचित भएका हुन्। उदास ६ हजार ९० मत प्राप्त गरी नगरप्रमुखमा विजयी भए।
उदासका प्रतिस्पर्धी कांग्रेसका वीरवल राईले ५२ सय ८७ मत मात्र ल्याए । राई २०७४ मा निर्वाचित मेयर हुन भने अहिलेका बिजेता उदास पराजित उम्मेदवार हुन्। सो निर्वाचनमा मेयर पदमा वीरबल राई ४९ सय ८६ मतसहित निर्वाचित हुँदा उदासले ४६९४ मत प्राप्त गरेका थिए ।
उपप्रमुखमा राईले ६६३१ मत ल्याउँदा एमालेकी मेरिका राईले ३९६२ मत मात्र प्राप्त गरिन्। मेरिका २०७४ मा एमालेको तर्फबाट विजयी उपमेयर हुन्। अघिल्लो निर्वाचनमा उपमेयरमा मेरिका राई ४६९७ मतसहित निर्वाचित हुँदा प्रमिलाले २४८१ मत प्राप्त गरेकी थिइन् ।
१४ वटा वडा रहेको उक्त पालिकामा एमाले र कांग्रेसबाट समान ६/६ वडामा विजयी हुँदा माओवादी केन्द्र र नेकपा एकीकृत समाजवादी १/१ वडामा जित निकालेको हो ।
एमालेले वडा नम्बर १, ५, ७, १०, १२ र १४ त्यस्तैगरी कांग्रेसले २, ४, ६, ८, ११ र १३ मा वडाअध्यक्ष पद जितेको छ भने माओवादी केन्द्रले ३ नम्बर वडा र समाजवादीले ९ नम्बर वडाको अध्यक्ष पदमा जित निकालेको छ ।