मोरङको विराटनगर महानगरपालिकाको मतगणना सुरु भएको छ । शनिबार (आज) बिहान ८ बजेदेखि सुरु गर्ने तयारी गरिएको थियो । तर वर्षाका कारण दलका प्रतिनिधि नआइपुगेको भन्दै दुई घन्टा ढिलो गरी मतगणना सुरु भएको मुख्य निर्वाचन अधिकृतको कार्यालयका सूचना अधिकारी हेमबहादुर बुढाथोकीले जानकारी दिए ।
विराटनगर-७ स्थित सहिद मैदानअगाडि रहेको आदर्श माविमा गणना सुरु भएको हो । एकै पटक ६ ठाउँबाट मतगणना सुरु गरिएको बुढाथोकीले बताए । विराटनगर–१, २, १६, १७, १८ र १९ नम्बर वडाको मत सुरुमा गनिने छ ।
शुक्रबार भएको मतदानमा ८९ हजार ६ सय ७८ मत खसेको सूचना अधिकारी हेमबहादुर बुढाथोकीले जानकारी दिए । उनका अनुसार महानगरमा एक लाख ३३ हजार एक सय ४२ मतदाता रहेकोमा ४३ हजार २ सय ४६ मत भने खसेन ।
विराटनगरमा १९ वटा वडा छन् । गणनाका क्रममा अप्रिय घटना हुनसक्ने सम्भावनालाई मध्यनजर गर्दै मतगणनास्थलको ६ वटा कोठामा सिसिटिभीसहित तारले घेरा बनाइएको छ । विराटनगरमा सत्तारूढ गठबन्धनबाट नेपाली काङग्रेसका नागेश कोइराला महानगर प्रमुखका उम्मेदवार छन् भने एमालेबाट सागरकुमार थापा मेयर उम्मेदवार छन् ।