झापाको दमक नगरपालिकामा सौन्दर्य प्रतियोगितामा जिताउने प्रलोभन देखाउँदै यौन हिंसा भएको प्रतियोगीले आरोप लगाएकी छन् । ‘मिस्टर एन्ड मिस कलेज २०२२’ नामक सौन्दर्य प्रतियोगितामा आयोजकले विजेता बनाइदिने प्रलोभनमा यौन उत्पीडन गरेको प्रतियोगी १७ वर्षीया अङ्किता बरुवालको आरोप छ ।
आयोजक संस्था शङ्कर आर्ट्स फाउन्डेसनका निर्देशक लालबहादुर शङ्करले आफूमाथि यौन हिंसा गरेको अङ्किताको आरोप छ । प्रशिक्षणका क्रममा ‘प्रतियोगिता जित्ने भए मसँग नजिक हुनुपर्ने र जिताइदिएबापत के दिन सक्छौ ?’ भन्दै यौन हिंसा गरेको र म्यासेज तथा ह्वाट्सएपमा पनि पटक–पटक खराब नियत राखेर जिताउने प्रलोभनमा पारेको अङ्किताले बताएकी छन् ।
वैशाखको पहिलो साताबाट झापा र मोरङका विभिन्न कलेजका प्रतियोगी भेला पारेर आयोजक शङ्करले आइतबार दमकस्थित युनिक कलेजमा सौन्दर्य प्रतियोगिताको फाइनल इभेन्ट आयोजना गरेका थिए । नौ जना छात्रा र चार जना छात्र गरी १३ जना प्रतियोगीको सहभागिता रहेको प्रतियोगिताको उपाधि दमक बहुमुखी क्याम्पस मा कक्षा १२ मा अध्ययनरत छात्रा रक्षा थापाले र युनिक कलेज दमकमा कक्षा ११ मा अध्ययनरत छात्र दिवस उप्रेतीले जितेका थिए ।
फाइनलमा समेत आफ्नो प्रस्तुति दिएकी अङ्किता पहिलो चरणबाट बाहिरिएकी थिइन् । फाइनलपछि अङ्किताको परिवार र आयोजकबीच तनावको अवस्थासमेत सिर्जना भएको थियो । अङ्किताले प्रतियोगिताकी कोरियोग्राफर तथा शङ्करकी पत्नीलाई स्क्रिनसट्स देखाउँदै केरकार गरेपछि दुई पक्षबीच हात हालाहाल भएको थियो । त्यसको केही दिनपछि भने अङ्किता र उनको परिवारले इलाका प्रहरी कार्यालय दमकमा जाहेरी दर्ता गर्न पुगेका थिए ।
‘पछि डरले उहाँहरूले फोन गर्नुभयो, मैले प्रहरीसमक्ष जाने अडान कसेपछि ज्यान मार्ने धम्कीसमेत आयो,’ उनी भन्छिन्, ‘यसैले पनि प्रहरीसमक्ष उजुरी गरेका हौँ । म अन्यायमा परेकी छु ।’
बुधबार दिउँसो अङ्किताको परिवार र साथीहरू प्रहरीमा लिखित जाहेरी दिएको इलाका प्रहरी कार्यालय दमकका डिएसपी दिलीप गिरीले जानकारी दिए । उनका अनुसार जाहेरी परेपछि घटनाको अनुसन्धान थालिएको छ भने सोमबार शङ्करलाई सोधपुछका लागि बोलाइएको छ ।
यता, शङ्कर भने हारेपछि नियोजित रूपमा फसाउन खोजिएको बताउँछन् । प्रलोभनमा पार्नु गलत भएको स्वीकार्दै उनी यौन हिंसा नगरेको स्पष्ट पार्छन् । ‘मेरो नियत त्यस्तो होइन, अगाडिदेखि नै ती बहिनीले आयोजकसँग नजिक हुँदा प्रतियोगिता जितिन्छ भनेर हल्ला चलाएकी हुनाले सोधपुछ गरेको हुँ । कुराकानीका क्रममा मनसाय बुझ्ने हेतुले जिताइदिए के दिन्छौ भनेर प्रश्न गरेको हुँ ? त्यो मेरो भुल थियो, म स्वीकार्छु । तर त्यसबेला केही कुरा भएन, हारेपछि प्रतिशोध साँधियो ।’
यस्तै, शङ्करले पटक–पटक अङ्किताका परिवारले आर्थिक लेनदेनको कुरा निकालेको आरोप लगाउँदै भन्छन्, ‘प्रलोभनमा पार्नु भनेको अरू प्रतियोगीमाथि अन्याय गर्नु हो तर मैले प्रुफ राख्नका लागि त्यस्तो कुराकानी गरेको हुँ । तर स्क्रिनसट्स देखाउँदै मेरी पत्नीमाथि केरार गर्दा झगडा भयो । त्यसपछि उनीहरूले मापसे गरेर फोन गरे, लेनदेनको कुरा निकाले । म अरू विषयमा दोषी छैन, प्रहरी कार्यालय जान तयार छु । दोषी भए जेलनेल भोग्न तयार छु ।’