यही शुक्रबार हुने स्थानीय तह निर्वाचनका लागि मतदान गर्न काठमाडौबाट आफ्नो गाउँघर जानेहरूको सङ्ख्या बढिरहेको छ ।
आज बिहान काठमाडौंको कोटेश्वर आसपास क्षेत्रमा भोट हाल्नको लागि घर जानेहरूको भिडले लामो समयसम्म ट्राफिक जाम गरायो ।
यस्तै अवस्था छ कलंकी र नयाँ वसपार्क क्षेत्रमा पनि । आफ्नो स्थायी ठेगाना भएको स्थानबाट मात्र मत हाल्न पाइने भएकाले अस्थाई रुपमा काठमाडौं बस्नेहरू गाउँघर गएका हुन् ।
केही आफ्नै खर्चमा गइरहेका छन् भने केही स्थानीय तहमा भएका विभिन्न राजनीतिक दलहरूले घरसम्म जानको लागि यातायातको व्यवस्था गरेका छन् ।
तस्बिरहरू
ट्राफिक प्रहरीका अनुसार अहिले दैनिक काठमाडौँ आउनेभन्दा बाहिरिने बढिरहेका छन्। यो क्रम वैशाख लागेदेखि नै सुरु भएको र हाल झनै बढिरहेको छ। औषतमा दैनिक १० देखि १५ हजार मानिसले उपत्यका छाडिरहेका छन्।
कार्यालयका अनुसार सोमबारको तथ्याङ्क हेर्दा उपत्यकाबाट ७ हजार ९११ सवारीमार्फत ५५ हजार ७४६ यात्रु बाहिरिएका छन्। उपत्यका भित्रिने सङ्ख्या भने ४२ हजार ५४४ छन्।
अघिपछि दैनिक भित्रिने र बाहिरिने मानिसको सङ्ख्या बराबरजस्तै हुने गरेकामा अहिले भने १० देखि १५ हजार बढी बाहिरिएका छन्। अबको दुई दिन यो क्रम अझै बढ्ने छ। यसमा निजी गाडी र रिजर्भ गाडीमा गएका यात्रुको सङ्ख्या भने जोडिएको छैन।