यही वैशाख ३० गते हुने स्थानीय तहको निर्वाचनमा उम्मेदवारी फिर्ता लिएकाहरूको तथ्याङ्क निर्वाचन आयोगले सार्वजनिक गर्न सुरू गरेको छ।
शुक्रबार देशभर उम्मेदवारी फिर्ता लिएकाहरूको तथ्याङ्क निर्वाचन आयोगको सिस्टममा अपडेट गर्ने काम भइरहेको छ । केटिएम दैनिकले तथ्यांक सार्वजनिक गर्ने क्रममा आयोग कछुवा गतिमा हिँडिरहेको भन्दै हिजो (शुक्रबार) नै एक समाचार प्रकाशित गरेको थियो ।
शनिबार बेलुका आयोगले सार्वजनिक गरेको विवरणअनुसार देशभर आठ हजार बढी उम्मेदवारहरूले आफ्नो उम्मेदवारी फिर्ता लिइसकेका छन् । यद्यपी यो नै अन्तिम सङ्ख्या भने होइन् । अहिलेसम्मको विवरण अनुसार प्रमुख पदमा विभिन्न दलबाट २६८, उपप्रमुखमा २०४, गाउँपालिका अध्यक्षमा २८०, उपाध्यक्षमा २२५, वडाध्यक्षमा दुई हजार ८३७, महिला सदस्यमा ९७२, दलित महिला सदस्यमा ६७७ र खुला सदस्यमा दुई हजार ५७० गरी कूल आठ हजार ३३ जनाले उम्मेदवारी फिर्ता लिएका हुन् ।
आयोगले सार्वजनिक गरेको २३७ पुष्ठ लामो डकुमेन्टलाई केटिएम दैनिकको टीमले तथ्यांकमा ढालेर गरेको विश्लेषणमा सत्ता गठबन्धनमा रहेका पाँच दलबाट उम्मेदवारी दिएकामध्येमा चार हजार ६ जनाले उम्मेदवारी फिर्ता लिएको पाइएको छ । यो सङ्ख्यामा बागी उम्मेदवारी दिएका वा स्वतन्त्र उम्मेदवारी दिएकाहरूको सङ्ख्या जोडिएको छैन ।
हालसम्म कतिले मनोनयन दर्ता गरेका थिए भन्ने एकिन विवरण आयोगले दिन सकिरहेको छैन । शुक्रबार बेलुकासम्म आयोगको सिस्टममा अपडेट भएको विवरणअनुसार वैशाख ११ र १२ गते देशभर एक लाख ५३ हजार २२० जनाले उम्मेदवारी दिएका थिए । हामीले तयार पारेको यो सामाग्री निर्वाचन आयोगले बैशाख १६ र १७ गते साँझ सार्वजनिक गरेको स्थानीय तह निर्वाचन इ बुलेटिनलाई आधार मानेर तयार पारिएको हो ।
देशभर स्वतन्त्र रुपमा उम्मेदवारी दिएका १२ हजार ७८९ जनामध्ये तीन हजार ६ जनाले उम्मेदवारी फिर्ता गरेका छन् ।
स्वतन्त्रलाई छाडेर राजनीतिक दललाई हेर्ने हो भने, उम्मेदवारी फिर्ता लिनेमा नेकपा एकीकृत समाजवादी पहिलो नम्बरमा परेको छ । यो दलबाट एक हजार ५०१ जनाले फिर्ता लिएका हुन्।
सो दलका तर्फबाट प्रमुख र अध्यक्ष पदबाट ३१/३१ जनाले उम्मेदवारी फिर्ता लिँदा उपप्रमुखबाट ३६ र उपाध्यक्षबाट २७ जनाले फिर्ता लिएका हुन्। त्यस्तैगरी तीन सय ९४ जनाले वडाअध्यक्ष, दुई सय ३० महिला सदस्य, एक सय ५२ दलित महिला सदस्य र ६०० जना खुला वडा सदस्यहरूले उम्मेदवारी फिर्ता लिएका हुन् । पछिल्लो विवरणअनुसार अनुसार उक्त दलबाट ११ हजार ३३० जनाले उम्मेदवार दिएका थिए । अब सो दलबाट नौ हजार ८२९ जना चुनावी मैदानमा होमिएका छन् ।
उम्मेदवारी फिर्ता लिनेमा नेकपा माओवादी केन्द्र दोस्रो नम्बरमा परेको छ । उक्त दलबाट २२ हजार २७९ जनाले उम्मेदवारी दिएकोमा एक हजार ४७४ जनाले फिर्ता लिएका हुन् । प्रमुख पदबाट १८, अध्यक्षबाट २६, उपप्रमुखबाट १७, उपाध्यक्षबाट २४, वडाध्यक्षबाट तीन सय ४६, महिला सदस्यबाट दुई सय ५९, दलित महिला सदस्यबाट एक सय ७६ र खुला सदस्यबाट ६०८ जना गरी कूल एक हजार ४७४ जनाले उम्मेदवारी फिर्ता लिएका हुन् । सो दलबाट अब बीस हजार ८०५ जना उम्मेदवार चुनावी मैदानमा छन् ।
सत्तारुढ दल नेपाली कांग्रेस उम्मेदवारी फिर्ता लिनेमा तेस्रो नम्बर परेको छ । शनिबार बेलुकासम्मको तथ्याङ्क अनुसार प्रमुखबाट ३, अध्यक्षबाट ११, उपप्रमुखमा २०, उपाध्यक्षबाट १७, वडाध्यक्षबाट ८८, महिला सदस्यबाट ११२, दलित महिला सदस्यबाट ११७ र खुला सदस्यबाट दुई सय ७१ गरी कूल छ सय ३९ जनाले उम्मेदवारी फिर्ता लिएका हुन् ।नेपाली कांग्रेसबाट तीस हजार ७८६ जना चुनावी मैदानमा छन् ।
त्यस्तैगरी राष्ट्रिय प्रजातन्त्र पाटी (राप्रपा) बाट उम्मेदवारी दिएका उम्मेदवारहरू मध्ये तीन सय ६४ जनाले फिर्ता लिएका छन् । सो दलको वडाअध्यक्ष र खुल्ला सदस्य पदमा उम्मेदवारी फिर्ता लिनेहरूको सङ्ख्या सय भन्दा बढी छ भने अन्य पदहरूमा पचास भन्दा कमले फिर्ता लिएका छन् । आयोगले दिएको विवरणअनुसार राप्रपाबाट १३० जना वडाअध्यक्ष र ११५ जना खुला सदस्यले आफ्नो उम्मेदवारी फिर्ता लिएका हुन् ।
त्यस्तैगरी सत्ता गठबन्धनभित्रको जनता समाजवादी पार्टी (जसपा) का तीनसय ३३ जनाले उम्मेदवारी फिर्ता लिँदा गठबन्धकै अर्को घटक राष्ट्रिय जनमोर्चाबाट ५९ जनाले उम्मेदवारी फिर्ता लिएका छन् ।
जसपाबाट सबैभन्दा बढी वडाध्यक्ष पदमा एक सय २, खुल्ला सदस्यमा ९३ र बाँकी अन्य पदमा ४० भन्दा कम सङ्ख्यामा उम्मेदवारी फिर्ता भएको हो ।
सबैभन्दा बढी उम्मेदवारी मनोनयन गरेको नेकपा एमालेबाट पनि अन्तिम अवस्थामा आएर केहीले उम्मेदवारी फिर्ता गरेका छन् । सो दलबाट दुइ सय ९३ जनाले उम्मेदवारी फिर्ता लिएको निर्वाचन आयोगको तथ्याङ्कमा उल्लेख छ । उक्त दलबाट खुल्ला सदस्यमा एक सय १५, वडाअध्यक्षमा ५९, महिला सदस्यमा ४९ बाहेक अन्य पदहरूमा सिंगल डिजिट (९ वा सो भन्दा भन्दा कम ) मा उम्मेदवारी फिर्ता भएको निर्वाचन आयोगले जनाएको छ ।
आयोगका अनुसार निर्वाचनमा सहभागी भएका स्वतन्त्रसहित ८० राजनीतिक दलबाट उम्मेदवारी आएकोमा ४४ वटा राजनीतिक दलबाट दिइएको उम्मेदवारी फिर्ता भएको हो ।
*नोट : निर्वाचन आयोगले सार्वजनिक गर्ने यस्ता डेटाहरू नेपाली युनिकोडमा पीडिएफ भर्सनमा उपलव्ध हुने र उक्त डकुमेन्टलाई तथ्यांक प्रशोधन गर्न सकिने फर्म्याटमा बदलेर पुन: तथ्यांक प्रशोधन गर्दा केही मानवीय त्रुटीहरू हुनसक्ने कुरालाई आत्मसाथ गर्दै हाम्रो टीम त्यसलाई न्यूनिकरण गर्न सुरुदेखि नै सचेत छ । यसका बावजुत पनि कुनै मानवीय त्रुटी भएको खण्डमा जानकारी गराएर सहयोग गरिदिनुहुन अनुरोध छ ।