स्थानीय तह निर्वाचनमा आचारसंहिता उल्लंघन गरेको भन्दै प्रेस काउन्सिलले नेपालले विभिन्न सञ्चारमाध्यमलाई स्पष्टीकरण माग गरेको छ ।
काउन्सिलले स्पष्टीकरण माग गर्नेमा कान्तिपुर, नयाँपत्रिका, बाह्रखरी डटकम, शिलापत्र डटकम, लगायत छन् ।
उनीहरूलाई काठमाडौं उपत्यकामा एमालेबाट मेयरको उम्मेदवारी दिएका केशव स्थापितको बारेमा समाचार लेखेबापत काउन्सिलले स्पष्टिकरण माग गरेको हो । धेरैलाई तीन दिनभित्र लिखित स्पष्टीकरण दिन माग गरिएको छ भने केहीलाई सचेत मात्र गराइएको छ ।
चार वर्षअघिको अप्रमाणित घटनालाई उठान गरी व्यक्तिको मानहानी गरेकोले काउन्सिलले सञ्चारमाध्यमहरूसँग लिखित स्पष्टिकरण माग गरेको हो ।
बाह्रखरी डटकमले वैशाख १२ गते ‘एमालेलाई प्रश्न–यौन दुराचारीलाई नै नगरपिता बनाउने हो ? शीर्षकमा समाचार सम्प्रेषण गरेको काउन्सिलले जनाएको छ । उक्त सञ्चारमाध्यमलाई विहीबार पत्र पठाउँदै तीन दिनभित्र लिखित स्पष्टीकरण माग गरिएको हो ।
काउन्सिलका उपप्रशासकीय अधिकृत रामशरण बोहराका अनुसार नेपाल लाइभ डटकमले पनि सोही दिन ‘यौन दूराचारको आरोपबारे स्थापितको जवाफ– विवादमै आएन भने त्यो केशव स्थापित हुन्छ र !’ शीर्षकमा समाचार सम्प्रेषण गरेकाले उक्त सञ्चारमाध्यमलाई सचेत गराउँदै पत्र काटेको छ ।
काउन्सिलले इकान्तिपुर डटकमलाई पनि आचारसंहिता कार्यान्वयनका निम्ति सजग गराएको छ । सो सञ्चारमाध्यमलाई पनि विहीबारै पत्र काटिएको काउन्सिलका उपप्रशासकीय अधिकृत बोहोराले बताए ।
त्यस्तै, शिलापत्र डट कमलाई पनि काउन्सिलले तीन दिनभित्र लिखित स्पष्टीकरण पेश गर्न निर्देशन दिएको छ । सो सञ्चार गृहले १४ गते ‘केशव स्थापितलाई मेयरको टिकट दिएर यौन हिंसा संस्थागत गर्न खोजियो’ शीर्षकमा समाचार सम्प्रेषण गरेको काउन्सिलको भनाई छ।
सोहीअनुसार नयाँ पत्रिका डेली डटकमलाई पनि काउन्सिलले आचारसंहिता उल्लङ्घन गरेको भन्दै आचारसंहिता कार्यान्वयनप्रति लिखित रुपमा सचेत गराएको छ । सो सञ्चार गृहले १२ गते ‘यौन दुराचार आरोपको विषयमा केशव स्थापितले भने-विवादमा नआउने पनि केशव स्थापित हुन्छ ?’ शीर्षकको समाचार सम्प्रेषण गरेको काउन्सिलको भनाई छ।
सोहीअनुसार काउन्सिलले बिहीबार मात्र दृष्टिन्यूज डट कम, दबाव साप्ताहिक काठमाडौं, मजदुर दैनिक भक्तपुर, अग्नीपोष्ट डट कम, एसिपिन्यूज नेपाल डट कम, जनबोली डट कम, नेपाल आज डट कम, पदाफास डट कम, हिमालपोष्ट डट कम, लेखाजोखा न्यूज डट कम, नारायणीअनलाइन डट कम, नेपालजीन्यूज डट कम, लोकपाटी डट कम, मूलखबर डट कम, अर्थडबली डट कम, खबरप्रवाह डट कम, दैनिकीन्यूज डट कम, चित्रवनखबर डट कम लाई आचारसंहिता उल्लङ्घन नगर्न नगराउन काउन्सिलले सचेत गराएको छ।
