यही वैशाख ३० गते हुन गइरहेको स्थानीय तहको निर्वाचनमा वैशाख ११ र १२ गते देशभर मनोनयन गरेका उम्मेदवारहरूको अन्तिम विवरण निर्वाचन आयोगले सार्वजनिक गरेको छ । देशभरका ७५३ स्थानीय तहमा ३५ हजार २२१ जनप्रतिनिधहरूको लागि एक लाख ५३ हजार २२० जनाले उम्मेदवारी दिएका छन् ।
आयोगले सार्वजनिक गरेको विवरणअनुसार प्रमुख पदमा विभिन्न राजनैतिक दलबाट २११ महिलासहित दुई हजार ११७ जनाको उम्मेदवारी परेको छ भने गाउँपालिका अध्यक्षको लागि १५३ महिलासहित दुई हजार ३५७ जनाको उम्मेदवारी परेको छ । यस्तै गरी प्रमुख पदको लागि ५७ महिलासहित एक हजार ४०० जनाले स्वतन्त्र उम्मेदवारी दर्ता गराउँदा गाउँपालिका अध्यक्षमा ४५ महिलासहित एक हजार ३५ जनाले उम्मेदवारी दर्ता गराएका छन् ।
उप्रप्रमुखमा विभिन्न दलबाट ३४२ पुरुषसहित एक हजार ७७७ जनाले उम्मेदवारी दिँदा गाउँपालिका उपाध्यक्ष पदमा ३८९ महिलासहित दुई हजार ४९ जनाको उम्मेदवारी परेको छ । स्वतन्त्र रूपमा २६५ पुरुषसहित ३९८ जनाले उपप्रमुखमा मनोनयन दर्ता गरेका छन् भने २२७ पुरुषसहित ३६७ जनाले उपाध्यक्ष पदमा दाबेदारी गरेका छन्।
वडाअध्यक्ष पदमा विभिन्न दलबाट ८२१ महिलासहित २९ हजार ४८० जनाको मनोनयम दर्ता हुँदा सोही पदमा स्वतन्त्र रुपमा २२९ महिलासहित पाँच हजार ९२० जनाले उम्मेदवारी दर्ता गराएको निर्वाचन आयोगले सार्वजनिक गर्ने स्थानीय तह निर्वाचन इ-बुलेटिन को अंक १७ मा उल्लेख छ ।
महिला सदस्य पदमा विभिन्न दलबाट २५ हजार ८०८ र स्वतन्त्रबाट ७६४ गरी कूल २६ हजार ५७२ उम्मेदवारी पर्दा दलित महिला सदस्य पदमा २३ हजार ९६२ उम्मेदवारी परेको छ । यस पदको लागि स्वतन्त्रबाट ४७६ र दलहरूबाट २३ हजार ४८६ जनाको उम्मेदवारी परेको हो ।
एक वडामा दुईजना सदस्य निर्वाचित हुने खुला सदस्य पदमा विभिन्न दलबाट दुई हजार ४५८ महिलासहित ५३ हजार ३६६ जनाको उम्मेदवारी पर्दा स्वतन्त्रबाट यस पदको लागि १०० महिलासहित दुई हजार ४२९ जनाको उम्मेदवारी परेको छ । कूल १३ हजार ४८६ पदको लागि विभिन्न दल र स्वतन्त्र गरी ५५ हजार ७९५ जनाको उम्मेदवारी परेको छ ।
दलगत रूपमा हेर्ने हो भने नेकपा एमालेबाट ३३ हजार ५०३ जनाको उम्मेदवारी पर्दा सत्तारुढ दल नेपाली कांग्रेसबाट ३१ हजार ४२५, नेकपा माओवादी केन्द्रबाट २२ हजार २७९ जनाले उम्मेदवारी दर्ता गराउँदा राष्ट्रिय प्रजातन्त्र पार्टीबाट १२ हजार ७५२ जनाको उम्मेदवारी परेको छ ।
उम्मेदवारी मनोनयनको आधारमा राप्रपा चौथो नम्बरमा परेको छ । सत्तारुढ दल नेकपा एकीकृत समाजवादी र जनता समाजवादी पार्टी (जसपा) लाई पछि पार्दै राप्रपाले देशभर ठुलो सङ्ख्यामा मनोनयन दर्ता गराएको हो । नेकपा एकीकृत समाजवादीले ११ हजार हजार ३३० जनाको मनोनयन दर्ता गराउँदा जसपाले नौ हजार ८४१ र सत्ता गठबन्धनमा रहेको राष्ट्रिय जनमोर्चाले जम्मा ८८३ जनाको उम्मेदवारी दर्ता गराएको छ ।
नेकपा (एकीकृत समाजवादी) बाट २३ महिलासहित १५१ जनाले नगरप्रमुख पदमा उम्मेदवारी दिइरहँदा गाउँपालिका प्रमुख (अध्यक्ष) को लागि यो दलबाट १२ महिलासहित १८७ जनाको उम्मेदवारी परेको छ । त्यस्तै उपप्रमुखको लागि ७२ पुरुषसहित १७९ जना र उपाध्यक्षको लागि ६९ पुरुषसहित १८१ जनाको उम्मेदवारी परेको तथ्याङ्क निर्वाचन आयोगले जारी गरेको विवरणमा उल्लेख छ ।
उपप्रमुख पदमा भने राप्रपाले नेपाली काँग्रेस र माओवादी केन्द्रलाई उछिनेको छ । उपप्रमुख पदमा माओवादी केन्द्रबाट २१८ र नेपाली कांग्रेसबाट २१२ जनाले उम्मेदवारी दर्ता गराउँदा राप्रपाबाट २३१ जनाले उम्मेदवारी दर्ता गराएका छन् । यो पदको मात्रै कुरा गर्दा राप्रपा उम्मेदवारी दर्ता गराउनेमा दोस्रो दल बनेको छ ।
स्वतन्त्र रूपमा मनोनयन दर्ता गराउनेहरूको सङ्ख्या पनि उल्लेख छ । अन्तिम नामावली प्रकाशित भएपछि स्वतन्त्र उम्मेदवारहरूको सङ्ख्या निकै घट्ने अनुमान गरिएको छ । सत्तारुढ गठबन्धनमा आबद्ध पाँच दलबाट असन्तुष्टहरूले स्वतन्त्र (बागी) उम्मेदवारी दिइरहँदा शीर्ष नेताहरू उनीहरूको उम्मेदवारी फिर्ता गर्न देश दौडाहामा छन् ।
बुधवार गृहमन्त्री बालकृष्ण खाँड असन्तुष्ट कार्यकर्ताहरूलाई फकाउन र उम्मेदवारी फिर्ता लिन अनुरोध गर्नको लागि चितवन पुगेका छन् । यस्तै अन्य नेताहरूले पनि आफ्नो निर्वाचन क्षेत्रमा स्वतन्त्र रूपमा मनोनयन दर्ता गराउनेहरूलाई फिर्ता लिन आग्रह गरिरहेका विवरणहरू प्रकाशित भइरहेको छन् ।
मनोनयन सङ्ख्याकै आधारमा क्रमशः जसपा छैटौँ, सिके राउतको जनमत पार्टी (ज.पा) सातौँ, लोकतान्त्रिक समाजवादी पार्टी, नेपाल (लोसपा) आठौँ, मंगोल नेशनल अर्गानाइजेसन नौ स्थानमा पर्दा सत्तारुढ गठबन्धनमा आबद्ध दल राष्ट्रिय जनमोर्चा १० औँ स्थानमा पुगेको छ ।
जनमोर्चाबाट पार्टीबाट ५४ जना प्रमुख, ३१ जना अध्यक्षले दावेदारी दिइरहँदा उपप्रमुख र उपाध्यक्षमा क्रमशः २७ र २० जनाको उम्मेदवारी परेको छ ।
मंगोल नेशनल अर्गानाइजेसनबाट एक हजार ९३२ जनाले उम्मेदवारी दिएको विवरण आयोगले सार्वजनिक गरेको छ ।
