झापामा वर्षौँदेखि कृष्णप्रसाद सिटौला र विश्वप्रकाश शर्माबीच चल्दै आएको शक्ति सङ्घर्षको असर स्थानीय तह निर्वाचनको टिकट वितरणसमेत देखिएको छ ।
उम्मेदवार सिफारिसमा सम्भव भएसम्म पार्टीको नगर, नभए क्षेत्र, त्यहाँबाट पनि नभए जिल्ला हुँदै प्रदेशले निर्णय गर्ने नेपाली का्रग्रेसको विधानमा उल्लेख छ । प्रदेशले सिफारिस गर्न नसकेको अवस्थामा मात्रै केन्द्रले निर्णय गर्ने विधानमा उल्लेख भए पनि शक्ति सङ्घर्षकै कारण प्रदेशले गरेको निर्णयलाई केन्द्रले लत्त्याइदिएको हो ।
केन्द्रीय राजनीतिका प्रभावशाली नेता शर्मा र सिटौला दुवै झापाली हुन् । उम्मेदवार सिफारिसमा यिनीहरूबिचको रस्साकस्सीका कारण झापाको मेचीनगर नगरपालिकामा टिकट वितरण अलोकतान्त्रिक देखिएको हो ।
यही चैत १० गते पार्टीको प्रदेश समितिले मेचीनगरको प्रमुखका लागि केशवराज पाण्डेलाई सिफारिस गरेको थियो । तर प्रधानमन्त्रीसमेत रहेका पार्टी सभापति शेरबहादुर देउवाले केन्द्रबाटै हस्तक्षेप गरेर चैत १२ गतेको मितिमा उक्त पदको टिकट इन्द्रबहादुर बुढाथोकीलाई दिएका हुन् ।
बुढाथोकीले निर्वाचन समितिलाई केन्द्रले पठाएको पत्र देखाएर नगरपालिकाको प्रमुख पदमा उम्मेदवारी दर्ता गरिसकेका छन् । उम्मेदवारी दर्ता गर्ने क्रममा बुढाथोकी र पाण्डेबीच विवाद समेत भएको थियो ।
निर्वाचन अधिकृतको कार्यालयलाई सम्बोधन गरेर प्रधानमन्त्री शेर बहादुर देउवाको हस्ताक्षरसहित पठाइएको पत्रमा उक्त पालिकाको प्रमुख पदमा इन्द्रबहादुर बुढाथोकी नेपाली काँग्रेसको तर्फबाट आधिकारिक उम्मेदवार भएको उल्लेख गरिएको छ ।
निर्वाचन आयोगले एउटा पार्टीबाट एक जना भन्दा बढीको उम्मेदवारी नलिने भन्दै पाण्डेलाई स्वतन्त्र उम्मेदवारको रूपमा मनोनयन दर्ता गर्न भनिरहेको स्थानीय एक सञ्चारकर्मीले केटिएम दैनिकलाई बताए । कांग्रेस सभापति शेर बहादुर देउवाको परिपत्र पाएपछि आफू उम्मेदवारीबाट पछि हटेको पाण्डेले बताए । नगरपालिका परिसरमा सञ्चारकर्मीहरूसँग कुरा गर्दै पाण्डले कांग्रेस महामन्त्री विश्वप्रकाश शर्माले आफूसँग एकपटक पनि सल्लाह नगरेको, पटक पटक फोन गर्दा नउठाएको र काठमाडौंमा मान्छे भेट्न पठाउँदा समेत भेट नगरेको बताए । उनले महामन्त्री पदको दुरुपयोग गर्दै केन्द्रबाट परिपत्र जारी गर्न लगाएको आरोप लगाएका छन् ।
पार्टीको प्रदेश संसदीय समितिका सभापति उद्धव थापा नेता सिटौलाका विश्वासपात्र हुन् । तर, महामन्त्री शर्माले मेचीनगरको प्रमुख आफूनिकटले पाउनुपर्ने दाबी गरेपछि केन्द्रबाटै हस्तक्षेप गरिएको बुझिएको छ । महाधिवेशनबाट निर्वाचित कांग्रेसको झापा जिल्ला कार्यसमितिमा समेत सिटौला समूहको वर्चस्व छ ।
