पाँच घण्टा युट्युब बन्द भएपछि विश्वभरका प्रयोगकर्ता हैरान भएका छन् । हिजो मध्यरातदेखि बिहान ५ बजेसम्म ठप्प रहेपछि युट्युबको सेवा अहिले सुचारु भएको छ ।
रिपोर्टका अनुसार १२ अप्रिल राति करिब १२ बजे युट्युब डाउन भएको थियो जुन बिहान ५ बजेसम्म रह्यो । युट्युबले पनि ट्वीट गर्दै यसको पुष्टि गरेको छ ।
युट्युबको सर्भिस डाउन भएका कारण विश्वभरका प्रयोगकर्ता समस्यामा परेका छन् । यसबारे सामाजिक सञ्जालमा हजारौं प्रयोगकर्ताले गुनासो गरेका छन् ।
डाउनडिटेक्टरका अनुसार ४८ प्रतिशत प्रयोगकर्तालाई एप, ४२ प्रतिशत प्रयोगकर्तालाई वेबसाइट र १० प्रतिशत प्रयोगकर्तालाई भिडियो स्ट्रिमिङमा समस्या भएको थियो । १० हजार भन्दा बढी प्रयोगकर्ताहरूले डाउनडिटेक्टरमा गुनासो गरेका थिए ।
यस क्रममा युट्युबका साथै युट्युब टिभी, युट्युब म्युजिक, युट्युब स्टुडियोमा पनि प्रयोगकर्ताले समस्या भोग्नुपरेको थियो । प्रयोगकर्ताहरूले खाताहरू स्विच गर्न, लाइभ जान र भिडियो खोजीमा समस्याहरू सामना गरिरहेका थिए। युट्युबका यति धेरै सेवा एकैसाथ बन्द हुनुको कारण भने खुल्न सकेको छैन ।
यस महिनाको सुरुमा, इन्स्ट्यान्ट मेसेजिङ एप टेलिग्राम डाउन भएको थियो। त्यो समयमा टेलिग्राम प्रयोगकर्ताहरूलाई सबैभन्दा बढी समस्या भारत र पाकिस्तानमा परेको थियो। डाउनडिटेक्टरका अनुसार मानिसहरूले अप्रिल २ मा दिउँसो ३ बजे टेलिग्राम डाउन भएको गुनासो गरेका थिए ।
धेरै प्रयोगकर्ताहरूलाई लगइन गर्न समस्या भएको थियो। प्रयोगकर्ताका अनुसार एप रिफ्रेस गर्न आधा घण्टाभन्दा बढी समय लागेको थियो । चार हजार प्रयोगकर्ताहरूले डाउनडिटेक्टर मा गुनासो गरेका थिए ।
