अख्तियार दुरुपयोग अनुसन्धान आयोगले क्षेत्रीय अनुसन्धान केन्द्र सुनसरीको बंङ्गुर अनुसन्धान इकाईका तत्कालीन इकाई प्रमुख रामदेव पण्डितसहित सातजना विरुद्ध भ्रष्टाचार मुद्दा दायर गरेको छ ।
उनीहरुले बङ्गुर बिक्री गर्दा हुनुपर्ने औसत र न्यूनतम तौलभन्दा पनि कम तौल देखाइ विक्री वितरण गरेको आरोप लगाउँदै अख्तियारले आज विशेष अदालत काठमाडौंमा मुद्दा दायर गरेको हो ।
अख्तियारले मुद्दा दायर गरेका अन्यमा सहायक कर्मचारीहरु शकुन्तला राई र प्रकाश कुमार यादव, लेखा अधिकृत सोभितलाल यादव, लेखा अधिकृत तिलक राजबंशी, स्टोर प्रमुख तथा प्रशासन प्रमुख कृष्ण प्रसाद पोखरेल र क्षेत्रीय निर्देशक हरिकृष्ण श्रेष्ठ रहेका छन् ।
आयोगले तत्कालीन इकाई प्रमुख पण्डितसँग सात लाख, शकुन्तला राईसँग छ लाख ३१ हजार २००, प्रकाश कुमार यादवसँग तीन लाख ३८ हजार दुई सय ४०, हरिकृष्ण श्रेष्ठसँग तीन लाख ५२ हजार चार सय ८०, सोभितलाल यादवसँग तीन लाख १८ हजार सात सय २०, लेखा अधिकृत तिलक राजवंशीसँग तीन लाख १० हजार दुई सय ४०, स्टोर प्रमुख तथा प्रशासन प्रमुख कृष्ण प्रसाद पोखरेलसँग सात लाख गरी कूल सात जनाको नाममा ३० लाख ५० हजार सात सय ८० रकम बिगो माग गर्दै मुद्दा दायर गरेको हो ।
