लालीगुराँस डटकमका सञ्चालक कमल सरगम चौलागाईंलाइ राष्ट्रिय लोक तथा दोहोरी गीत प्रतिष्ठान नेपालका उपाध्यक्ष दीपक खड्काले दुर्व्यवहार गरेको घटनाप्रति नेपाल पत्रकार महासङ्घ ललितपुर शाखाले आपत्ति जनाएको छ ।
लोक तथा दोहोरी गीत प्रतिष्ठान नेपालले आयोजना गरेको राष्ट्रिय टुबोर्ग दोहोरी रनिङ्गसिल प्रतियोगिताको रिपोर्टिङ गर्न पुगेका लालीगुराँस डटकमका सञ्चालक तथा पत्रकार महासङ्घ ललितपुर शाखाका सदस्य कमल सरगम चौलागाईं माथि दुर्व्यवहार भएको भन्दै पत्रकार महासङ्घ ललितपुरले एक विज्ञप्ति जारी गर्दै कारबाहीको माग गरेको हो।
गत चैत्र १९ गते बेलुकी समयमा भृकुटीमण्डपमा भएको विशेष दोहोरी प्रतियोगिताको समाचार सङ्कलनको क्रममा आफूमाथि दुर्व्यवहार भएको सरगमले जानकारी दिए। दोहोरीबाट पराजित तारा थापाको टिम सँग अन्तरवार्ता गर्दै गर्दा राष्ट्रिय लोक तथा दोहोरी गीत प्रतिष्ठान नेपालका उपाध्यक्ष दीपक खड्काले अन्तरवार्ता लिँदै गर्दा क्यामेरा बन्द गर्न दबाब सहितको धम्की दिएको र क्यामेरा समेत बन्द गरेको भन्दै सरगमले कारबाहीको माग गरेका हुन्।
रिपोर्टिङ गरिरहेकै क्रममा दोहोरी प्रतियोगितामा पराजित भएकी तारा थापाको टिम सँग अन्तरवार्ता लिने क्रममा प्रतिष्ठानकै उपाध्यक्ष कलाकार दीपक खड्काले पत्रकार चौलागाईंमाथि दुर्व्यवहार गरेको नेपाल पत्रकार महासंघका ललितपुरका सचिव रामहरि कार्कीले जारी गरेको विज्ञप्तिमा उल्लेख छ ।
हरेक घटनाको सत्य तथ्य सूचना पाउने जनताको अधिकार हो,उक्त अधिकारको रक्षा गर्न र सत्य तथ्य सूचना सङ्कलन गर्न जाँदा पत्रकार चौलागाईं माथि कलाकार दीपक खड्काबाट गरिएको दुर्व्यवहारले स्वतन्त्र पत्रकारिता र लोकतन्त्रको उपहास भएको छ शाखाले जनाएको छ ।
ललितपुर शाखाले उक्त घटनाको घोर निन्दा एवम् भर्त्सना गर्दै दोषी उपर कारबाहीको माग समेत गरेको छ ।
