पछिल्लो समय महिला तथा बालिकाहरूमाथि यौन दुर्व्यवहारका घटना बढ्दै गएको भन्दै त्यसप्रति पार्टीको स्पष्ट धारणा सार्वजनिक गर्न माग गर्दै राष्ट्रिय प्रजातन्त्र पार्टी (राप्रपा) समक्ष पाँच बुँदे ध्यानाकर्षण पत्र बुझाइएको छ ।
राप्रपाको केन्द्रीय कार्यालय धुम्बाराहीमा अध्यक्ष राजेन्द्र लिङ्देनसमक्ष पत्रकार निशा ओली र पत्रकार तथा अधिकारकर्मी रसना ढकालले ध्यानाकर्षण पत्र बुझाएका हुन् । सो क्रममा राप्रपाको केन्द्रीय सदस्य देबु पराजुली पनि सहभागी भएकी थिइन् ।
उनीहरूले देशमा बढ्दै गइरहेको महिला/बालिका बलात्कारका घटनाहरूमा पार्टीको स्पष्ट नीति ल्याउन माग गरेका छन् । आउँदै गरेको स्थानीय तहको निर्वाचनमा महिलालाई प्रमुख पदहरूमा उम्मेदवार बनाउन अग्रसरता देखाउने, बालबालिका र महिलाको सर्वोतम हितको लागि “छोरी सुरक्षा अभियान” अपरिहार्य भएको हुनाले हरेक टोल टोलमा यो अभियान लैजानको लागि पार्टीले स्पष्ट नीति बनाउनुपर्ने, बलात्कार र महिला हिंसाका विषयलाई एजेण्डा बनाएर चुनावी प्रचार प्रसारमा सामेल गर्न र राजनीतिबाट युवाहरू आक्रान्त बनिरहेको हुँदा, उनीहरूलाई पनि समेट्दै अगाडि बढ्नको लागि स्वतन्त्र वातावरण सिर्जना होस भन्दै पाँच बुँदे ध्यानाकर्षण पत्र बुझाएका हुन् ।
पत्र बुझ्दै अध्यक्ष लिङ्देन भने “तपाईहरूले उठाउनुभएको माग एकदमै जायज छन् । यो कुरालाई मैले गम्भिर रुपमा लिएको छु । यसबारे पार्टीले छिट्टै केही निर्णय गर्नेछ ।”
पार्टीका प्रवक्ता मोहन श्रेष्ठले आफूहरूले यस विषयलाई गम्भिर रुपमा लिएको बताए । उनले भने “यी घटनाहरूले अभिभाकहरू चिन्तित बनेका छन् । यस्ता कुराहरू रोक्न घरघरबाट अभियान सुरु गर्नेबेला भएको छ । राप्रपाले चुनावी अभियानमा तपाईहरूले दिएका सुझावहरू गहन रुपमा लिनेछ । ”
अधिकारकर्मी ढकालले अन्य राजनीतिक दलका शीर्ष नेताहरूलाई पनि भेटेर यस विषयमा ध्यानाकर्षण पत्र बुझाउने तयारी भइरहेको बताइन् । केही पार्टीका शीर्ष नेताहरू राजधानी बाहिर हुनुहुन्छ । चुनावी कार्यक्रमले गर्दा उहाँहरूसँग समय मिलाउने प्रयास जारी छ ।
