नायक पूर्णविक्रम शाह (पल शाह) लाई तनहुँ जिल्ला अदालतले पुर्पक्षको लागि थुनामा पठाउने आदेश दिएसँगै शाहले कैदी बन्दी जिवन बिताउनु पर्नेछ ।
एक नाबालक गायिकाले आफूलाई ललाइफकाई बलात्कार गरेको बताएपछि उनका बाबुले पलविरुद्ध जिल्ला प्रहरी कार्यालय तनहुँमा ११ फागुनमा किटानी जाहेरी दिएका थिए ।
१५ फागुनमा प्रहरीसमक्ष आत्मसमर्पण गरेका पलमाथि अनुसन्धान भइररहेका बेला नवलपुरमा पनि जाहेरी पर्यो । पललाई नवलपुर पुर्याएर बयान लिएको प्रहरीले सरकारी वकिलको कार्यालयमार्फत ३ चैतमा मुद्दा दर्ता गर्यो ।
सामान्तयाः ३ वर्षभन्दा बढी सजाय हुने गम्भीर प्रकृतिका घटनामा पुर्पक्षका लागि थुनामा पठाइन्छ ।
के हो पुर्पक्ष भनेको ?
नेपाली वृहत शव्दकोष संशोधित र परिवर्धित दसौँ संस्करणका अनुसार पुर्पक्ष भनेको “अदालतमा कुनै विषयलाई प्रमाणित गर्नाका निम्ति गरिने उक्तिप्रत्युक्ति” भनेर व्याख्या गरिएको छ । यसको अर्थ अब पल शाहले अदालतले यो मुद्दामा फैसला नगरेसम्म कैद बन्दी भएर बस्नुपर्ने हुन्छ ।
प्रहरीले जुटाएको प्रमाणहरूमाथि अदालतले परिक्षण गर्नको लागि केही समय लिन्छ । त्यसमा सबैको बकपत्र लिने र अन्तिममा फैसला गर्ने गर्दछ । यसरी फैसला गर्ने समयसम्म अदालतले परिक्षण गर्नको लागि अभियुक्तलाई पुर्पक्षको लागि थुनामा राख्ने, सामान्य तारेखमा रिहा गर्ने वा धरौटीमा रिहा गर्ने भनेर तिनवटा विकल्प हुन्छ । अदालतले अहिले पल शाहलाई थुनामा राख्ने आदेश दिएको हो ।
सामान्यता कोही व्यक्ति विदेश भाग्ने अवस्था भएमा वा गम्भिर प्रकृतिका मुद्दाहरू भएमा उनीहरूलाई पुर्पक्षको लागि थुनामा राख्ने चलन छ ।
तर अधिवक्ता महेश्वर चौधरी भने नायक पल शाहसँग अर्को पनि विकल्प भएको बताउँछन् । केटिएम दैनिकसँग कुराकानी गर्दै अधिवक्ता चौधरीले भने “पल शाहसँग दुईवटा विकल्प छन् एउटा भनेको अहिलेको आदेशलाई पालना गर्दै जेलमै बसेर फैसला पर्खने दोस्रो भने मुलुकी फौजदारी कार्यविधि संहिता २०७४ को दफा ७३ अनुसार जिल्लाको आदेश बदर गराउने उच्च अदालतमा “धरौटी वा सामान्य तारेखमा राखेर मुद्दा पुर्पक्ष गराइ पाउन निवेदन हाल्ने” ।
पल शाह उच्च अदालतमा गए वा उच्च अदालतले जिल्लाको आदेशलाई बदर गर्यो भने उनी धरौटी वा सामान्य तारेखमा रहेर पनि मुद्दा पुर्पक्ष गर्न पाउँछन् ।
तात्कालिन सभामुख कृष्णबहादुर महराले पनि जिल्ला अदालत काठमाडौंको पुर्पक्षको लागि थुनामा बस्ने आदेशको विरुद्ध उच्च अदालत पाटन पुगेका थिए ।
नोट : यसअगाडि समाचारमा कैदी लेखिएकोमा त्यसलाई सच्चाएर बन्दी बनाइएको छ । अदालतबाट अभियोग पुष्टि भएर जेल चलान भएपछि उक्त व्यक्तीलाई कैदी भनिन्छ भने पुर्पक्षको लागि थुनामा रहेकालाई बन्दी भनिन्छ । अहिले पल शाहको मुद्दामा उनी अदालतबाट दोषी ठहर भैसकेका छन् । मुद्दाको किनारा लगाउनको लागि अदालतले उनलाई पुर्पक्षको लागि जेलमा राख्ने निर्णय गरेको हो । शाहसँग यस आदेशविरुद्ध उच्च अदालतमा जाने ढोका भने खुल्लै छ ।
