मोरङको लेटाङ नगरपालिका–५ स्थित शिक्षा विकास माध्यमिक विद्यालयका शिक्षक मनोज पौडेलले सोही विद्यालय कक्षा ७ मा अध्ययनरत छात्रामाथि यौन दुव्र्यवहार गरेको घटनाप्रति सामुदायिक विद्यालय व्यवस्थापन समिति महासंघ नेपाल केन्द्रीय कार्यसमिति घोर भत्र्सना गरेको छ ।
महासंघका अध्यक्ष कृष्ण थापाले आफ्नो पेसाप्रति ख्यालै नगरी लज्जित हुने कार्य गरेकोमा निज शिक्षकमाथि शीघ्र कानुनी कारबाही गर्न मोरङ जिल्ला प्रशासन कार्यालयसँग माग गरेका छन् ।
सो घटनाको शीघ्र छानबिन गर्नका लागि सम्बन्धित जिल्ला शिक्षा समन्वय एकाइ, शिक्षक संघ/संगठन, सम्बन्धित नगरपालिकाको शिक्षा शाखा र सोही विद्यालयका विद्यालय व्यवस्थापन समिति तथा प्रधानाध्यापकसमेतको संलग्नतामा घटनाको छानबिन समिति गठन गरी कारबाही प्रक्रिया अगाडि बढाउनसमेत आग्रह गर्दै पीडित छात्राको आवश्यक उपचार र क्षतिपूर्ति दिनसमेत माग गरिएको छ ।
लेटाङ नगरपालिका–३ का ५६ वर्षीय शिक्षक मनोज पौडेलमाथि चार वर्षअगाडि पनि आफ्नै छात्रामाथि यौन दुर्व्यवहारको आरोप लागेको थियो ।
लेटाङ–५ खेरुवास्थित शिक्षा विकास माध्यमिक विद्यालयमा सामाजिक शिक्षा पढाउने पौडेलमाथि २०७४ साल फागुनमा कक्षा ५ का विद्यार्थीमाथि यौन दुर्व्यवहारको आरोप लागेको थियो ।
त्यसबेला सबै छात्राले निवेदन दिएपछि विद्यालयले छलफल आयोजना गरेको थियो । छलफलमा उनले खुट्टा ढोगेर माफी मागे । उनले मौखिक र लिखित रूपमा माफी पाए । विद्यालय व्यवस्थापन समितिले आइन्दा यस्तो नगर्ने उल्लेख गरेको कागज गराएर जोगायो । घटना खासै बाहिरिएन ।
