मोरङको लेटाङ नगरपालिका-८ कि १२ वर्षीया बालिकालाई जबरजस्ती करणी गरी हत्या गर्ने एक जनालाई प्रहरीले सार्वजनिक गरेको छ । मोरङको लेटाङ-८ का ६४ वर्षीय दीपक गिरीलाइ जिल्ला प्रहरी कार्यालय मोरङले सार्वजानिक गरेको हो ।
बालिकालाई गिरीले बलात्कारपछि पोल खुल्ने डरले हत्या गरेको प्रहरीले बताएको छ । बुधबार साथीसँग स्कुल आएकी १२ वर्षीय करुणा राई स्कुल सकिएपछि एक्लै घरतर्फ लागेकी थिइन्।
जाँते माध्यमिक विद्यालयको कक्षा ६ मा अध्ययनरत उनको घर स्कुलबाट दुई घण्टाको पैदल दुरीमा पर्छ । बुधबार साढे ४ बजे स्कुल छुट्टी भएपछि एक्लै घर गएकी उनलाई बाटोमा लेटाङ–८ का ६४ वर्षीय दीपक गिरीले पिछा गरे । जङ्गलको बाटो हिँड्ने क्रममा आधा बाटो पुगेपछि छोटो बाटो भन्दै उनले जङ्गलभित्र लगेको प्रहरीले बताएको छ ।
जङ्गलभित्र पुगेपछि गिरीले बालिकालाई यौन सम्पर्कको प्रस्ताव गरेका थिए । तर उनले मानिन् । नमानेपछि गिरीले जबरजस्ती करणी गरे । जबरजस्ती करणीपछि बालिकाले बुबालाई भन्दिन्छु भन्दै भागेपछि गिरीले समातेका थिए ।
पोल खुल्ने डरले उनले बालिकाको घाँटी थिचेर हत्या गरेको जिल्ला प्रहरी कार्यालय मोरङका प्रहरी उपरीक्षक जनार्दन जिसीले बताए । जबरजस्ती करणीपश्चात बालिकाले आफूमाथि भएको घटना बुबालाई भन्दिन्छु भन्दै दौडिएपछि पोल खोल्न सक्ने डरले गिरीले घाँटी थिचेर हत्या गरेको प्रहरी उपरीक्षक जिसीले बताए ।
बालिकाको घरदेखि तीन किलोमिटर दक्षिण लेटाङ नगरपालिका– ८ लाल हिरा सामुदायिक वनमा शव ढुङ्गाले छोपी मृतावस्थामा फेला परेको प्रहरी उपरीक्षक जिसीले बताए । बालिकाको हत्यापछि शवलाई ढुङ्गाले छोपेका गिरीले उनले लगाएको कपडा गिरीले आफ्नो घर छेउको खोल्सोमा जलाएका थिए ।
जलाउँदा बचेका सामग्रीले खोल्यो पोल
फाल्गुन ११ गते बेलुकी अबेरसम्म पनि घर नफर्किएकाले घर परिवारका सदस्यले सोही दिन इलाका प्रहरी कार्यालय लेटाङमा जानकारी गराएका थिए । त्यसपश्चात १३ गते बिहान खोजतलासमा खटिएको प्रहरी टोलीले बालिकाको घरदेखि ३ किलो मिटर दक्षिण लेटाङ-८ लाल हिरा सामुदायिक वनमा बालिकाको शव ढुङ्गाले छोपी मृतावस्थामा फेला परेको थियो ।
यता, गिरीको घर पछाडि रहेको खोल्सीमा स्कुलको लोगो रहेको बेल्टको बक्कल र कडी, जुत्ताको सोलको भाग, ज्याकेटको बटमहरू, फरकको खिपहरू खरानीको थुप्रोमा डढेको अवस्थामा र नजिकै लाइटरसमेत फेला पारेको थियो ।
तर सोधपुछका क्रममा उनले हालैमात्र मृत्यु भएकी पत्नीका कपडा जलाएको बताएका थिए । पछि ती सामानहरू भेटिएपछि भने घटनाको पोल खुलेको थियो । घटनामा संलग्न गरेका पक्राउ प्रतिवादी गिरीको थप अनुसन्धान भइरहेको जिल्ला प्रहरी कार्यालय मोरङले जनाएको छ ।