कर्णाली प्रदेशका मुख्यमन्त्री जीवनबहादुर शाहीले सरकारलाई पूर्णता दिएका छन् ।
१६ कातिकमा मुख्यमन्त्री बनेका जीवनबहादुर शाहीले आफ्नै दल नेपाली कांग्रेस, माओवादी केन्द्र र एकीकृत समाजवादीबाट मन्त्री नियुक्त गरेका छन् ।
प्रदेश सरकारमा सात सांसद र एक गैरसांसद मन्त्री बनेका छन् । गैर सांसद्लाई मन्त्री बनाउँदा महिला र दलितको सहभागिता भने शून्य छ ।
हाल मौजुदा ३५ सदस्यीय कर्णाली प्रदेशसभामा १३ महिला, पाँच जना दलित एक जना जनजाति समुदायबाट छन् । सत्ता गठबन्धनका दल काँग्रेसमा एक दलित महिलासहित दुई महिला, माओवादी केन्द्रमा एक दलित महिलासहित चार जना महिला र एक महिलासहित दुई जना सासंद दलित समुदायबाट छन् । यस्तै समाजवादीमा एक जना महिला छन् । तर, उनीहरू कसैलाई पनि मन्त्री बनाइएन् ।
माओवादीका १२ सांसद मध्ये सीता नेपाली र रातो कामी दलित समुदायको प्रतिनिधित्व गर्छन् । यस्तै सीता नेपालीसहित पुष्पा घर्ती, विमला केसी र कृष्णा शाह महिला सांसद छन् । तर, माओवादीले हुम्लाका गैरसांसद छिरिङ डम्डुल लामा (कार्चेन) लाई मन्त्री बनाएको छ । माओवादी केन्द्रबाट जाजरकोटका गणेशप्रसाद सिंह र हुम्लाका गैरसांसद छिरिङ दमदोल लामा (कार्चेन) मन्त्री बन्दा महिला र दलितले अवसर पाएका छैनन् ।
कर्णाली प्रदेशका मुख्यमन्त्री जीवनबहादुर शाहीले मन्त्री बनाएका कार्चेन लामा भनिने छिरिङ दमदोल लामा फौजदारी मुद्दामा सजाय पाएका व्यक्ति हुन् । उनी प्रदेशसभाका सदस्य समेत हैनन् । प्रदेशसभा सदस्य नै नभएको व्यक्ति कुनै पनि प्रदेशमा अहिलेसम्म मन्त्री बनेका थिएनन् । तर सत्ता गठबन्धन दलको भागवण्डामा माओवादी केन्द्रले हुम्लाका लामालाई उद्योग पर्यटन बन तथा वातावरण मन्त्री बनाएको हो । गैर सांसदलाई छ महिनाका लागि मन्त्री बनाउने पाउने व्यवस्था अनुरुप माओवादी केन्द्रले लामालाई मन्त्री बनाएको हो ।
नेपाली कांग्रेसबाट सुर्खेतका यज्ञबहादुर बिसी र दैलेखका हिमबहादुर शाही मन्त्री बनेका छन् । बीसी यसअघि माओवादी केन्द्र नेतृत्वको सरकारमा सामाजिक विकासमन्त्री थिए भने प्रमुख सचेतक शाही पहिलो पटक मन्त्री बनेका हुन् ।
यसअघि पनि मन्त्री बनीसकेका यज्ञबहादुर बुढालाई पुनः मन्त्री दोहोर्याउँदा महिला र दलितलाई भने पाखा लगाएको छ । कांग्रेसका ६ सासंद मध्य झोवा विक दलित तथा महिला दुवै र अमृता महिला तर्फकी सांसद हुन् ।
एकीकृत समाजवादीबाट चन्द्रबहादुर शाही यसअघि नै भूमि व्यवस्था कृषि तथा सहकारी मन्त्री नियुक्त भएकोमा पदमबहादुर रोकाय भौतिक पूर्वाधार तथा सहरी विकासमन्त्री बनेका छन् ।
तीन सांसद रहेको समाजवादीमा चन्द्रबहादुर शाही र पदम रोकाय मन्त्री बन्दा महिला सांसद देवी ओली मात्र छुटेकी छन् ।
मुख्यमन्त्री शाहीले यसअघि माओवादीका सांसद विन्दमान विष्टलाई आर्थिक मामिला तथा योजना मन्त्री र समाजवादीका प्रदेश सभा संसदीय दलका नेता चन्द्रबहादुर शाहीलाई भूमि, व्यवस्था, कृषि तथा सहकारी मन्त्री बनाइसकेका छन् ।