तेलुगू भाषाको चलचित्र ‘पुष्पाः द राइज’ले हिन्दी डब भर्सनले सय करोड भारु उठाएको छ । साउथ अभिनेता अल्लु अर्जुन अभिनित चलचित्र हिन्दीतर्फ पनि सय करोड क्लबमा प्रवेश गरेको छ ।
यस फिल्ममा साउथ सुपरस्टार अल्लु अर्जुन छन्, जसको अभिनय र शानदार स्टाइलले फ्यानहरुको मन जितेको छ । यता, अभिनेत्री रश्मिका मन्डन्नालाई पनि दर्शकले निकै रुचाएका छन् । जसका कारण पनि यो फिल्मको कमाईले रेकर्ड तोडिरहेको छ ।
यो फिल्म हेर्न फ्यानहरु ठूलो संख्यामा थिएटरमा पुगेका छन्, जसका कारण अहिले यो फिल्मको हिन्दी संस्करणले १०० करोड कमाएको छ ।
गोल्डमाइन्स टेलिफिल्म्सले आफ्नो ट्वीटर अकाउन्टमा फिल्म ‘पुष्पा’ को पोस्टर शेयर गरेको छ, जसमा उनीहरुले यस फिल्मको हिन्दी संस्करणको १०० करोड कमाएको जानकारी दिएको छ ।
कोरोनाको समयमा चलचित्र क्षेत्रले ठूलो क्षति बेहोर्नु परेको छ । अर्कोतिर सिनेमा हलमा रिलिज हुन सकेको छैन । तर जब अल्लु अर्जुनको फिल्म ‘पुष्पा’ थिएटरमा आयो, फ्यानले यो फिल्मलाई धेरै माया गरे ।
चलचित्र सन् २०२१ मा रिलिज भएका चलचित्रमध्ये सबैभन्दा बढी कमाइ गर्ने चलचित्र समेत बनेको छ । कोरोना महामारीको तेस्रो लहर चलिरहँदा पनि स्वास्थ्य सुरक्षा मापदण्ड पालना गरेर यो चलचित्र हेर्न सिनेमा हलसम्म दर्शक पुगिरहेको उल्लेख छ ।
फिल्मले आन्ध्र प्रदेशको पहाडी क्षेत्रमा रातो चन्दन लुट्ने कथालाई चित्रण गरेको छ । सुकुमारद्वारा निर्देशित यो फिल्मले चन्दन तस्करहरूको वास्तविक जीवनका घटनाहरूलाई चित्रण गरेको छ। यद्यपि यो एक एक्सन थ्रिलर फिल्म हो तर यसमा रोमान्स र कडा भावनाहरू पनि छन्। पुष्पालाई दुई भागमा बनाइनेछ ।
पुष्पा फिल्ममा अल्लु अर्जुनको अपोजिटमा अभिनेत्री रश्मिका मन्डन्ना छिन् । यी दुईले सँगै स्क्रिन सेयर गरेको यो पहिलो पटक हो । यस चलचित्रमा अभिनेत्री रश्मिका मन्डन्नाले अल्लु अर्जुन अर्थात् पुष्पराजसँग प्रेम गर्ने ‘श्रीवल्ली’ नामकी केटीको भूमिका निर्वाह गरेकी छिन् ।
यो फिल्म मलयालम, कन्नड, तेलुगु, तमिल र हिन्दी गरी पाँच भाषामा हिट साबित भएको छ ।
‘पुष्पा २’ को छायांकन मार्चबाट सुरु
हालैको एक अन्तर्वार्ताका क्रममा पुष्पा स्टारर रश्मिका मन्डन्नाले ‘पुष्पाः द राइज’ को पार्ट २ ‘पुष्पाः द रुल’ को सुटिङ मार्चबाट सुरु हुने बताएकी छन् ।
यो फिल्म यसै वर्षको डिसेम्बरमा रिलिज हुने बताइएको छ । अल्लु अर्जुन र रश्मिकाका अलावा फहद फासिल पनि फिल्ममा देखिनेछन् ।