झापाको मेचीनगर नगरपालिकाकी उपप्रमुख मीना उप्रेतीले चढ्ने सरकारी गाडीको ठक्करबाट एक मोटरसाइकल चालकको मृत्यु भएको छ । उप्रेतीले प्रयोग गर्ने मे१झ १७२ नम्बरको सरकारी स्कारपियोले मोटरसाइकललाई ठक्कर दिँदा मोटरसाइकल चालक मेचीनगर–७ का सन्तोष राजवंशीको मृत्यु भएको हो ।
बुधबार साँझ करिब ७ बजेतिर उक्त गाडीले मे९प ७९२७ नम्बरको नम्बरको मोटरसाइकललाई ठक्कर दिएको थियो । दुर्घटनामा राजवंशी गम्भीर घाइते भएका थिए । राजवंशीलाई उपचारका लागि बिएन्डसी अस्पताल लैजाने क्रममाः बुधबार बेलुका नै बाटोमा मृत्यु भएको जिल्ला प्रहरी कार्यालय झापाका प्रहरी प्रवक्ता प्रहरी नायव उपरीक्षक वसन्त पाठकले केटिएम दैनिकलाई बताए ।
उपमेयर उप्रेती भने उक्त गाडीमा सवार थिइनन् । राष्ट्रिय सभा निर्वाचनका लागि उपमेयर उप्रेतीलाई लिएर गाडी विराटनगर आएको थियो । उपमेयर उप्रेती विराटनगर नै बसेकी थिइन् भने अरूलाई लिएर गाडी भने झापा फर्केको थियो ।
चालक राजकुमार प्रधानले चलाएको उक्त गाडीमा नेकपा एमाले मेचीनगर कमिटीका अध्यक्ष राजु पोख्रेललगायत कार्यकर्ताहरू थिए । उनीहरूलाई काँकरभिट्टा पुर्याउने क्रममा टोकला गेटमा दुर्घटना भएको प्रहरीले जनाएको छ ।