केन्द्रीय तथ्यांक विभागले बुधबार सार्वजनिक गरेको राष्ट्रिय जनगणना २०७८ को प्रारम्भिक तथ्यांक अनुसार काठमाडौं महानगरका प्रत्येक घरमा ८ जना भन्दा मानिसहरू बसोबास गर्ने गरेको पाइएको छ ।
विभागले सार्वजनिक गरेको तथ्यांकअनुसार काठमाडौं महानगरपालिका १ लाख ५ हजार ६४९ घर छन् । ती घरहरूमा ८ लाख ४५ हजार ७६७ व्यक्तिहरू बसोबास गर्छन् ।
उपत्यकामा भएका घर र त्यहाँ बसोबार गरेका मानिसहरूको सङ्ख्या हेर्दा प्रत्येक घरमा औसतमा ८ जना भन्दा बढी बस्ने गरेको देखिन्छ ।
काठमाडौं जिल्लाभरको तथ्याङ्क हेर्ने हो भने त्यहाँको जनघनत्व ५ हजार १०८ छ । अर्थात प्रत्येक १ वर्ग किलोमिटर क्षेत्रफलमा ५ हजार १०८ मानिसहरू बसोबास गर्दछन् ।
जनघनत्वको हिसावले काठमाडौँ उपत्यकाका तीन जिल्ला उच्च बसोबास छ । भक्तपुरमा ३ हजार ६१७ र ललितपुरमा १ हजार ४२४ जनघनत्व रहेको विवरण विभागले सार्वजनिक गरेको छ ।